Ti pojkiyon bʼa Székesfehérvár, jun chonabʼ bʼa Hungría bʼa ayxa mas ja mil jabʼili sok jel jastik ekʼel sbʼaj. Pe wani xyaki triste’il yuja mito xchʼay jkʼujol ja janekʼ wokol yaʼakan ja tiw ja Xchabʼil Guerra ekʼ bʼa spetsanil ja Luʼumi.

Jani yawe k’ikon ja jmexep soka jtatawelo. Jelto xnaʼawe, pe mastoni ja jmexep Elisabeth. Ja yeʼn sjeʼaki skʼuʼajel bʼa Dyos. Masan yajni ayto kiʼoj oxe jabʼil kʼajyiyon yaljelsok ja orasyon bʼa JTatikon teya bʼa satkʼinal. Pe tito jnaʼa jas wa stojolan ja orasyon jaw ja yajni ayxa kiʼoj 30 jabʼil.

Yeʼn stalnayon ja jmexep soka jtatawelo yajni chʼinonto, pes ja jnan sok ja jtat kʼakʼu akwal wa x-aʼtijiye bʼa jachuk oj bʼobʼ sman-e jun na’its mi jel chaʼanuk stsʼakol. Pe kada chab’tike sábado spetsanil ja pamilya wa stsomo jbʼajtikon bʼa waʼel lajan. Gustoxta wa xjul jkʼujol ja ekʼeleʼik jaw.

Ja bʼa 1958 bʼobʼni sman-e ja jas jel skʼanawe ja jnantati: jun na’its. ¡Ojxani bʼobʼ ajyukon soka yeʼnle! Jelni gusto ajyiyon, pe ja gustoʼili mini albʼi; kechanta wake ixaw tsaʼan, ja jtati cham yuj cáncer.

Jelni yaj kabʼ juntiro. Wa xjul jkʼujol ke kalayabʼ ja Dyosi: «Jpata akʼujol bʼa oja koltay ja jtati. ¡Jelni xmakunikuj! ¿Jas yuj mi amaklayoni?». Mini xnaʼa jas oj jkʼuluk yuja mi xnaʼa bʼa waj ja jtati. Jobʼo jbʼaj: «¿Ti maʼ waj bʼa satkʼinal, ma chʼaytani snajel bʼa tolabida?». Kilkʼujolan ja yal untik bʼa sakʼanto ja stateʼi.

Jitsan jabʼil ekʼi wajyon ja b’a kampo santo jach kada k’ak’u. Wala koyon mekʼan ja bʼa stiʼ skʼeʼen ja jtati sok wa xkayi orasyon: «Awa pabor Dyos, wa xkʼana oj jnaʼ bʼay ja jtati». Cha jkʼanayi a-skoltayon yabʼjel stojol jas yuj skʼulanotiki.

Yajni ay kiʼoj 13 jabʼil kala oj jnebʼ alemán, pes wa xkʼuʼan ojni jtaʼ ja sjakʼjelik wa xleʼa ja bʼa jitsan libro alemana. Ja bʼa 1967 waj jkʼul estudiar bʼa chonabʼ Jena, bʼa k’oteltoni parte bʼa Alemania. Chʼak jkʼumuk ja slibro’e ja matik jel bibo bʼa Alemania, pe mastoni ja it wa staʼa tiʼal sbʼaj jas yuj tey ja winiki. Pe ama jtaʼa jujuntik jastik jel chaʼanyabʼal, mini jtaʼa ja sjakʼjelik wanon slejeli. Ja yuj mini kaʼakan skʼanjelyi ja Dyosi.

Ja bʼa 1970 kumxiyon bʼa Hungría sok ti jnaʼa sbʼaj tiw ja maʼ kʼot jcheʼumuki, ja Rose. Ja bʼa tyempo jaw, ja Hungría jatoni wa x-aji mandar yuja comunismo, ja yuj tʼusan tsaʼan yajni nupanitikon jpakatikon ajnel bʼa Austria. Ja jas wa xkʼanatikoni jani oj elkotikon ja tiw sok oj wajkotikon bʼa Australia, bʼa Sydney, bʼa tey tiw jun jtiyo.

Sok mi ekʼ mas tyempo tixta jtaʼa kaʼtel ja bʼa Austria. Jun kʼakʼu, jun jmoj aʼtel yalakabʼ ke ja Biblia wa xbʼobʼ yayi sjakʼjel spetsanil ja sjobʼjelik kiʼoji sok yaki chabʼ libro bʼa jani wa staʼa tiʼal. Wego chʼak jkʼumuk, pe wani xkana oj jnaʼ mas, ja yuj jtsʼijbʼanyi ja maʼ yaʼunej eluk ja libro jaw, ja testigoʼik bʼa Jyoba, sok jk’anayile mas juʼunik.

Ja yajni tsʼikwi jun jabʼil nupanelotikon yulatayotikon jun kerem Testigo. Yi’ajanki ja juʼunik jk’anuneji sok skʼapaki jun estudio b’a Biblia. Sok wegoxtani jkʼana. Jelni gusto ajyiyon b’a sneb’jel, ja yuj wa xyaki estudio chabʼ ekʼele ja semana, ¡sok kada estudio wala alb’itikon chane ora!.

Jelni gusto ajyiyon yuja jas wa sjeʼaweki ja Testigoʼik soka Biblia. Yajni sjeʼaweki ja sbʼiʼil ja Dyos ja bʼa jBiblia bʼa húngaro, mini xbʼobʼ jkʼuʼuk. Ayxa 27 jabʼil wala wajyon bʼa misa sok mini bʼa jun ekʼele kabʼunej ja sbʼiʼil ja Dyosi, ja Jyoba. Chamto kila ja sjakʼjelik bʼa stojolik sok sbʼej wa xyaʼa ja Biblia. June ja bʼa jas jnebʼa jani ke chamwiniki mixatoni jas snaʼawe, bʼa lajansok ochel lek swayele (Eclesiastés 9:5, 10; Juan 11:11-15). Cha jnebʼa ke ojni ajyuk jun yajkʼachil luʼumkʼinal bʼa «mixani oj ajyuk chamelal» (Apocalipsis 21:3, 4). Ja wego wa xkʼuʼan lek ke ojni «ajyuk jun sakʼwelal» ja bʼa yajkʼachil luʼumkʼinal jaw sok ojni cha kil pilan ekʼele ja jtati (Hechos 24:15).

Ja Rose jelni skoltayon. Wegoxta jnebʼatikon sok chʼak jkʼultikon estudiar bʼa kechanta chabʼ ixaw. Ochtikon spetsanil ja sreunione ja Testigoʼiki; jelni cham xkilatikon ja jel xyajtaniye’i, ja jel jaman skʼujoleʼi soka jastal jel tsomaneʼi (Juan 13:34, 35).

Ja bʼa 1976, ajikitikon permiso bʼa oj wajkotikon bʼa Australia. Yajni kʼotikoni, jleʼatikon ja Testigoʼiki sok kabʼtikon jastal teytikon bʼa jnatikon. Ja bʼa 1978 ochtikon testigo bʼa Jyoba.

Man jtaʼa sjakʼjelik ja b’a sjobʼjelik ya’unej jpensaraʼuk jitsan jabʼil. Cha jtaʼa ja lekil tatali: ja Jyoba (Santiago 4:8). Pe mini kechanuk ja jaw, ja wego ayni kiʼoj ja smajlajel bʼa oj kil yajkʼachil ekʼele ja mero jtat ja bʼa tsamal lugar wan skʼapjel ja Dyosi (Juan 5:28, 29).

Ja bʼa 1989 cha kumxitikon bʼa Hungría bʼa yaljelyabʼ ja jpamilyatikon, ja kamigotikon sok ja tuk kristyano ja skʼuʼajel kiʼojtikoni. Ajyelkujtikon ja cholal bʼa sjejelyi jitsan kristyano. Masxa ja setenta ochyeta Testigoʼil, june ja bʼa yeʼnleʼi jani ja kala nani.

Ayxa 17 jabʼil wa xkʼanayi ja Dyos ayayi sjakʼjel ja sjobʼjelik kiʼoji, sok ekʼelxa 39 jabʼil ja sjak’unejkiʼi. Pe man wego wantoni xkayi orasyon, ja wego wa xkala: «Tsʼakatal kala tat bʼa satkʼinal yuja ajak’aki ja korasyoniki ja yajni keremontoʼi».