Kʼiyon bʼa jun barrio pobre ja bʼa chonabʼ Montreal. Keʼnon ja ijtsʼinal ja bʼa waxake kermanoʼik. Yajni ayto kiʼoj wake ixaw, ja jtati chami sok ja jnani yeʼnxani stalnayotikon.

Ja drogaʼik, ja tajnelsok takʼin sok ja tiroʼanel jaxani kʼe jkʼuluk ja bʼa jsakʼanil man jchʼinil. Ajyiyoni sok matik wa sleʼawe chaʼanik smule. Kechantoni lajune jabʼil kiʼoj, wanxani xkʼulan mandado sbʼaja ixuke wa xchono sbʼaje, sok ja bʼa matik wa xyaʼawe jel takʼin ja bʼa barrio. Jelni xkʼulan gusto sloʼlajel ja kristyano. Jachni jastal ja droga.

Yajni ayxa kiʼoj 14 jabʼil jelxani xnaʼa juntiro ja loʼlanel. Jun sjejel, yajni wa xmana jitsan relojik, pulseraʼik sok anilloʼik kʼulubʼalsok oro, wa xkayi senya bʼa ay yiʼoj 14 quilates sok wa xchono bʼa calle sok bʼa estacionamientoʼik bʼa niwak tiendaʼik. ¡Jelni pasil skʼulajel ganar sok takʼin! Bʼa jun ekʼele, bʼa kechanta jun kʼakʼu jkʼulan ganar 10,000 dolarik bʼa Canadá.

Yajni ayxa kiʼoj 15 jabʼil, yawe elkon ja bʼa naʼits bʼayoni. Tixani wala kanyon wayel bʼa calleʼik, bʼa parkeʼik ma bʼa snajik ja kamigoʼiki.

Jujuntik ekʼele ja policía syamawone bʼa sjobʼjelki ja jastik wa xkʼulani. Pe yuja mi kelkʼaluk ja jastik wa xchono, mini lutjiyon preso. Ama jelni chaʼan jtupu yuja loʼlanel sok yuja mey jlisencia jawa xchono. Mi jas la xiwyonyuj sok mini maʼ la xiwyonyuj; cha aʼtijiyon bʼa skʼulajel cobrar ja matik ay jas wa sjela. Sok yuja jelni xiwela sbʼaj, ay ekʼele wa xkiʼaj arma. Asta aʼtijiyon sok kristyanoʼik bʼa wa xmilwaniye.

Ja sbʼajtanil ekʼele kabʼ sbʼaja Biblia aytoni kiʼoj 17 jabʼil. Ajyiyoni sok jun jmakbʼen, bʼa chak kʼe skʼul estudiar ja Biblia soka testigoʼik bʼa Jyoba. Pe yuja mi kiʼaj gusto ja jastik kujlajel ja bʼa Biblia, kakani sok wajyon sok pilan akʼix bʼa wanonxani elelsok.

Pe ja stukili eske ja akʼix it cha kʼe skʼul estudiar ja Biblia soka testigoʼik bʼa Jyoba. Jelni cham kabʼ ja jastal stukbʼes sbʼaji: maxani ajyiyuj jun lekil smodo sok spasensya. Jun kʼakʼu slokowone ja bʼa sreunione wa skʼulaneʼi, sok wajyon. Jtaʼa kʼot kristyanoʼik tuke lek; jel leke sok tsamalxta skʼulanone resibir. Mini bʼa kabʼunej jel gusto ajyelon. Yajni yal chʼinonto mini jel yajtajiyon, sok ja jpamilya mini tʼun skisawone. Ja jastal yajxta yilawone ja testigoʼik bʼa Jyoba jani ja jas mero wa xkʼana. Yajni kʼapjiki jun estudio bʼa Biblia, wegoxtani jkʼana.

Ja jas jnebʼa skoltayoni bʼa mi oj chamkon. Jchapunejxani oj elkʼanukon sok chawane elkʼanumik, pes wani xmakunikuj 50,000 dolarik bʼa stupjel ja jelik bʼa tajneli. ¡Lekxta yujila mi jkʼulani! Ja chawaneʼi skʼulaneni ja jas chapubʼali sok june bʼa yeʼnle milji, jaxa juni chʼikji bʼa preso.

Ja kestudio bʼa Biblia skoltayoni yiljel ayto jas mas oj jtukbʼes. Jun sjejel, ja 1 Corintios 6:10, ja Biblia wa xyala: «Ja elkʼanumik, ja matik jel x-okʼ skʼujol ja jastik junuki, ja matik wa xyakbʼi, ja matik wa xyala jastik bʼa wa xyajbʼesni sok ja matik wa sloʼlay ja kristyano bʼa yijelkan ja jastik sbʼaji mini oj sbʼajuke ja sGobyerno ja Dyosi». Yajni jkʼuman ja bersikulo jaw, och okon. Tʼilani oj jtukbʼes jbʼaj bʼa yibʼanal (Romanos 12:2). Jelni piero ja jmodo, sok ja jsakʼanili jelni jomel ay.

Pe cha jnebʼa ja Jyoba jel lek sok wa xyaʼawotik perdon (Isaías 1:18). Ja yuj kayi orasyon sok spetsanil jkʼujol, jpatayi skʼujol bʼa a-skoltayon yajelkan ja jastik kʼajyel wa xkʼulani sok stubʼesel ja jsakʼanili. Soka skoltaneli, takal takal kakani. Ja jas mas tʼilan kʼe jkʼuluki jani nupaniyon soka jmakbʼeni.

Ja bʼa tyempo jaw, bʼa ayxa kiʼoj 24 jabʼil, ayxani oxe kuntikil. Wani xmakunikuj jun kaʼtel bʼa smakʼlajele. Pe yuja mi jel wajelukon bʼa eskuela mini ay lek kiʼoj experiencia bʼa aʼtelik. Cha jkʼanayi ja skoltanel ja Jyoba sok elyon bʼa slejel kaʼtel. Yajni wa xwaj jleʼ ja kaʼteli, wa xkala ojni jtukbʼes jbʼaj sok yijel jun jsakʼanil mi jel chaʼanyabʼaliluk. Ay ekʼele, wani xkala wanoni skʼulajel estudiar ja Biblia bʼa kʼotel jun lekil kristyano. Pe mini yaweki kaʼtel. Tsaʼan yajni chʼak jcholyabʼ jun winik ja jastik ekʼel jbʼaji, yalakabʼi: «Mini xnaʼa lek jas yuj, pe ayni jas wa xyalakabʼ bʼa oj kawi awaʼtel». Wani xkʼuʼan lek jani waj ja sjakʼel ja bʼa korasyoniki. Tyempoʼik tsaʼan, ja jcheʼum sok ja keʼn ochtikon testigo bʼa Jyoba.

Sakʼan ayon tsʼakatal yuja kaʼunej makunuk ja rasonik bʼa Biblia sok yuja jnochunej ja sjejel bʼa Kristo. Ay jun tsamal jpamilya sok wa xkabʼ stsamalil sok jun lekil jconciencia, wani xkʼuʼan lek ja Jyoba yaʼunejon perdon.

Ayxani 14 jabʼil wanon skʼulajel jun aʼtel bʼa tyempo tsʼikan: wani xpila lek styempoʼil skoltajel ja tuk bʼa ayabʼye stojol ja Biblia. Ajkʼachtoni och jmok ja bʼa aʼtel it ja jcheʼumi. Chomajkil, ja bʼa tsaʼanikxta 30 jabʼili, jkoltunej 22 ja bʼa jmojik kaʼtel bʼa ochele testigo bʼa Jyoba. Wantoni la wajyon ja bʼa niwak tiendaʼik, pe mixani bʼa yelkʼajel ja kristyanoʼik jastal ajyi. Jitsan ekʼele wa xleʼa modo yajelyi tuk kristyanoʼik ja tsamal majtanal: ja smajlajel bʼa ajyel sakʼan bʼa jun luʼumkʼinal mixa ay elkʼanum (Salmo 37:10, 11).