Jun diccionario wa xyala ja yaljel ciencia jun «tsome snajelik sbʼaja jastik junuki, ja jastik wa xtax ja bʼa sutsatkʼinali, jakel sbʼaja spaklajel wa x-axi sok sbʼaja jas wa x-ilxi». Skʼulajel ja it jelni wokol, pes tsatsal aʼtel sok ay ekʼele kechan lom aʼtel. Ja científico wa x-ekʼyujile jitsan semana, ixaw ma jabʼilik bʼa skʼulajel probar ja jas wa spaklayeʼi. Ayni ekʼele ja yaʼtel wa skʼulaneʼi mi jas wa staʼawesok, pe ay tuk yaʼtele yaʼuneje el slekilal ja ixuk winiki. La kiltik jujuntik sjejel.

Jun empresa bʼa Europa skʼulunej jun filtro jach sok plastiko bʼa jel x-albʼi sok wa xmakuni bʼa xchijel ja kuxil jaʼi bʼa lekxa yujel. Aparatoʼik jastal ja it axel makunuk ja bʼa wa x-ek desgrasyaʼiki, jastal ja terremoto ekʼ ja bʼa Haití bʼa 2010.

Bʼa jitsan kilometro bʼa nalanchaʼani, ay sateliteʼik bʼa wa xya ekʼ sbʼaje senyalik, sok jachuk wa xbʼobʼ sleʼ chikan jas lugar ja bʼa luʼumkʼinali, ja it wa xnaxi sbʼaj jastal GPS. Ja it tojbʼesji bʼa oj yawe makunuk ja kʼakʼanumiki, pe ja wego wanxa xcha makuniyuj ja choperiki, yamuman abyon, yamuman barko, paxyalanum ma yama chanteʼik bʼa oj snaʼ bʼa lugar wa xtaxye. Stsʼakatal ja científico matik yawe eluki, ja wego jelxani xmakuni bʼa oj jnatik chikan bʼa lugar oj wajkotik.

¿Ay maʼ wiʼoj ja weʼn jun celular, jun computadora ma Internet? ¿Ay maʼ aʼanik bʼa stojbʼesneja yuj jun tikʼe chamel? ¿Ay maʼ bʼa kʼeʼela abyon? Ta jachuki, awaʼunejni el slekilal ja jastik lek skʼuluneje ja científico. Ja ciencia skoltunejni ja jsakʼaniltik bʼa tuktukil modoʼik.

Ja bʼa jtyempotiki, ja científico wane kʼotel snajel sok wane spaklajel mas sbʼaja sutsatkʼinali soka jastik ay bʼa Luʼumi. Jujuntik científico wane slejel modo bʼa oj snaʼe jastal wa x-aʼtiji ja átomo, sok tuk wa xkumxiye jitsan miyon jabʼil bʼa snajel jastal kujlaji ja sutsatkʼinali. Jujuntik wa spensarane soka chaʼan spaklajel skʼuluneje sbʼaja jastik mi xbʼobʼ ilxuki soka bʼa mi xbʼobʼ yamxuki, ojxani sjeʼe ja sDyosil ja Biblia ja lek merani sakʼan ayi.

Ja científico soka filósofo matik jel naʼubʼal sbʼajeʼi wanto xjelxiye el soka jas wa spensaraneʼi. Jastal wa xyala ja tsʼijbʼanum Amir Aczel, wa xyala «ja ciencia yaʼata och probar bʼa mini ayuk meran ja Dyosi». Jun sjejel, jun científico bʼa jel naʼubʼal sbʼaj ja bʼa luʼumkʼinali yala yuja mey prebaʼik ja bʼa sutsatkʼinali bʼa wa sjeʼa ay jun Dyos, ja it wa sjeʼa mini ayuk jun dyos sakʼan. Tuk wa xyalawe skʼuʼajel ja jastik wa skʼulan ja Dyos bʼa Biblia kechanta «magia» ma «trukoʼik bʼa mi x-abʼxi stojolil». *

 Pe ja wego tʼilan la jobʼ jbʼajtik: ¿kʼotel maʼ snaʼe lek ja ciencia sbʼaja luʼumkʼinali bʼa oj yal-e ja jasa wa xyalaweʼi? Ja smeranili miyuk. Anima ja ciencia jelxa yiʼoj snajel, pe jitsan científico wa snaʼawe aytoni jitsan jastik junuk mito xkʼot naxuk ma mini oj kʼot taxuka. Steven Weinberg, jun científico bʼa skʼulan ganar jun premio jel chaʼan, yala: «Mini oj kʼotkotik man bʼa yechalil ja jastik junuki». Martin Rees, jun científico sok maestro bʼa Gran Bretaña, yala: «Ayni jastik junuk bʼa mini oj kʼot snaʼe ja ixuk winiki». Ja smeranili, jeltoni jitsan ja jastik oj kʼot jnatik sbʼaja luʼumkʼinal sjoybʼunejotiki, man ja bʼa yal chʼinik célula sok ja bʼa sniwanil ja sutsatkʼinali. La kiltik jujuntik sjejel:

• Ja paklanumik sbʼaja kwerpoʼali mito xkʼot snaʼe jasa wa x-ekʼ ja bʼa yojol ja celulaʼiki: bʼa wa xjak ja yipalil bʼa oj aʼtijuki, bʼa wa xjak ja proteínas sok jastal wa spila sbʼaj. Ja it sjobʼjelik bʼa mito snaʼunejuk ja ciencia.

• Ja gravedad kʼakʼu kʼakʼu wa xmakuni, pe mitoni xkʼot naxuk jastal mero ay. Ja científico mito xkʼot snaʼe lek jastal ja ipal it wa sjokowotik bʼa luʼum ja yajni wala lujpitiki soka jastal wan sututuk ja Luna bʼa sutanal ja Luʼumi.

• Ja paklanumik sbʼaja sutsatkʼinali wa xyalawe junuk 95% ja bʼa jastik ay ja bʼa sutsatkʼinali mi x-ilxi sok mi xbʼobʼ bʼisxuk soka yaʼtijubʼe ja científico. Ja it wa xnaxi sbʼaj: jastik junuk bʼa mi x-ilxi sok ipal bʼa mi x-ilxi. ¿Jasun kʼotel? Mini maʼ wa snaʼa.

Sok aytoni tuk jastik junuk mi xkʼot snaʼe ja científico. ¿Jas yuj jel ay stʼilanil ja it? Jun científico jel naʼubʼal sbʼaj, stsʼijbʼan: «Ja jastik jun mi xnaʼatik sbʼaji mastoni jel jitsan yuja jastik wa xnaʼatik sbʼaji. Bʼa keʼna, ja ciencia wa skoltayon bʼa oj kʼan spaklajel sok snajel mas sok mi kechan bʼa oj slut ja jpensari».

Bʼobʼta ja weʼn xa pensaran yuja ciencia ayxa naka yiʼoj ja sjakʼjeliki, wanxa ni xbʼobʼ slokʼolukan yuja jas wa xyala ja Dyosi soka Biblia. Pe ajuluka kʼujol, anima ja científico jelxa chapan ja yaʼtijubʼe bʼa spaklajel ja jastik junuki, mini kʼoteluk snaʼe yibʼanal sbʼaja luʼumkʼinal sjoybʼunejotiki. Pilan preba sbʼaja it jaʼa jas wa xyala ja Encyclopedia Britannica sbʼaja kʼiʼeljan spaklajel ja kʼanaliki soka planetaʼiki: «Ja bʼa jtyempotiki, junukxa 4,000 jabʼil bʼa spaklajeljan ja kʼanalik soka planetaʼiki, ja sutsatkʼinali jelni wokol bʼa keʼntik yabʼjel stojolil jastalni maʼ cha ekʼ sbʼaje ja swinkil Babilonia». Anto, ¿jasa oj jkʼuluktik sbʼaja jastik jun mito kʼoteluk yabʼye stojolil ja ciencia? ¿Ti maʼ xyila sbʼaja?

Ja taʼumantiʼik bʼa Jyoba wa xkisatikon ja sderecho yiʼoj bʼa jujune oj spensaraʼuk sbʼaja jaw. Wani xkʼujolantikon snochjel ja rason it bʼa Biblia: «Sbej ni spetzanil ja cristiano oj yil que tzamal ja hua modoexi» (Filipenses 4:5). Wa xlokowatikon bʼa oja paklay sok juna pensar bʼa jaman jujuntik ja jas wa xyala ja Biblia wa slaja sbʼaj soka ciencia sok jastal wa syaktalan sbʼaj.