YOLOMAJEL JA BʼA SPATIKI | JASTAL YAJEL LAMXUK JA JITSAN CHAMKʼUJOLILI
Ja jitsan chamkʼujolili: wan ekʼel bʼa yibʼanal ja luʼumi
«Waj jman waʼelal, pe kechan jtaʼa gayetaʼik, ¡sok lajune mil ekʼele mas chaʼan ja stsʼakoli! Jaxa bʼa pilan kʼakʼu, mixa naka jas ay.» (Paul, Zimbabue)
«Ja jtatami yala kabʼ oj sjip-onkan. Lajansok oj chamkon ja kabʼi. ¿Jas maʼ oj ekʼuk soka kuntikiltikoni?» (Janet, Estados Unidos)
«Yajni wa xkʼe okʼuk ja alarma, ajnelxta wala wajyon ja lugar bʼa oj jkolta jbʼaji sok wa xjipa jbʼaj bʼa luʼum ja yajni wan bʼojtel ja bombaʼiki. Wa x-ekʼ ja oraʼiki sok wanontoni kʼitkʼunel.» (Alona, Israel)
Ja bʼa jkʼakʼutiki jel ja chamkʼujoli, pes juni tyempo bʼa jel «ja huocoli» (2 Timoteo 3:1). Jitsan wa xchamskʼujole sbʼaja takʼini, ja pamilya, ja kʼakʼaneli, ja tsatsal chameli, ja desgrasyaʼik wa x-ekʼ ja bʼa luʼumkʼinali ma ja desgrasyaʼik wa xya ekʼuk ja ixuk winiki. Cha tey ja chamkʼujolil bʼa jujuneʼotik. Jujuntik wa xiwye oj aljuk yabʼ yuja loktor bʼa ayiʼoj cáncer. Tuk wa xchamskʼujole sbʼaja sakʼanil ja yuntikile soka yijeʼi.
Mini tolabida maloʼuk ja oj jchamkʼujoltiki. Pes yajni oj ajyukawuj jun examen, oj kʼumanan bʼa stiʼ sat jitsan ixuk winik ma oja leʼ juna waʼtel, wani xbʼobʼ ya tʼun chamkʼujolil. Ja yajni ay tʼusan xiweli wani skoltayotik bʼa mi jas oj ekʼ jbʼajtik. Jun spaklajel axi bʼa mas ja 68,000 bʼa matik axa skʼujoleʼi ilxi ja tʼusan chamkʼujolili wani xbʼobʼ ipaxuk bʼa mas wego oj chamuke. Merani lek ja jas yala ja Jesús: «¿Huan ama xa hualahuex que oj ajyan jitzan tiempo [...] yuj ja chamcʼujol xta ayexi?». Ja smeranili, anima jel xcham jkʼujoltik mini xbʼobʼ najatbʼuk mas ja jsakʼaniltiki. Ja yuj, ja yeʼn yaʼa ja rason it: «Mi lom xa cʼulanex pensar jastal oj ajyanic» (Mateo 6:25, 27). ¿Pe jastal oj bʼobʼ ja jaw?
Tʼilani oj jnatik jas oj jkʼuluktik. Cha tʼilani oj jkʼantikyi ja skoltajel ja Dyos bʼa orasyon sok sjipjel jkʼujoltik sbʼaja jas skʼapunej oj skʼuluki. Bʼobʼta mini wanuk ekʼel jbʼajtik ja it, pe bʼobʼta oj ekʼ jbʼajtik ja bʼa tyempo jakumi. Ja yuj, la kiltik jasa koltajiye ja Paul, Janet soka Alona bʼa mi jel chamskʼujole.
