Sjobʼjelik sbʼaja Biblia
¿Jas yuj ay ja jastik mi lekuki?
¿Machun sleʼa modo bʼa oj ya koʼ luʼum ja Jesús bʼa oj skʼuluk ja bʼa mi lekuki? (Mateo 4:8-10)
Jpetsaniltik wa xkʼanatik skʼulajel ja bʼa leki, mok jletik abʼal sok snajel syajulal ja tuki. Anto, ¿jas yuj jel ja spekʼjel chikʼ, skʼulajel bʼa mi tojuki soka mi xnaxi syajulal ja tuki? Tikʼanxta wa xkilatik notisyaʼik bʼa jel xyaʼa xiwel. Pe ¿maʼ ti chʼikan bʼa yibʼanal ja jastik mi lekuki? (Kʼuman ja 1 Juan 5:19.)
¿Skʼulanotik maʼ ja Dyosi bʼa oj jkʼantik skʼulajel ja bʼa mi lekuki? Miyuk. Ja yeʼn skʼulanotik jastalni ja yeʼn, bʼa oj cha yajtanukotik (Génesis 1:27; Job 34:10). Pe cha skʼulanotik bʼa keʼn oj jtsatik ja jas oj jkʼuluktiki. Ja bʼajtan jnantatiki mini skʼana oj snoch-e ja lekil smodo ja Dyosi sok skʼulane ja bʼa mi lekuki. Anto, ja yeʼnle kʼotye mulanum. Sok yajni ajyi yuntikileʼi, yawe ekanyi ja skʼanjel skʼulajel ja bʼa mi lekuki. (Kʼuman ja Deuteronomio 32:4, 5.)
¿Tolabida maʼ oj ajyuk ja bʼa mi lekuki?
Ja Dyosi wa skʼana akuchkujtik bʼa mi oj jkʼuluktik ja bʼa mi lekuki (Proverbios 27:11). Sok wa sjeʼakitik jasa wa xmakunikujtiki bʼa oj jkʼuluktik ja bʼa leki. Ta jnochotik ja lekil smodo soka jas wa xyala, ojni bʼobʼ ajyukotik meran gusto. ¿Mi maʼ ojni kʼotuk ja kʼakʼu bʼa oj jnochtik tsʼikan lek ja Dyosi? (Kʼuman ja Salmo 32:8.)
Ja Dyosi wanto xyaʼakan akʼulaxuk ja jastik mi lekuki bʼa oj kiltik ja jasa wa xyaʼakani. Pe mi tolabidaʼuk oj yakan jachuk (2 Pedro 3:7-9). Xmojojixtajan ja Luʼumi oj ajyuk bʼutʼel ixuk winik bʼa toje sok gusto oj ajyuke bʼa oj snoch-e ja smodo ja Dyosi. (Kʼuman ja Salmo 37:9-11.)
Chomajkil ayxa elel bʼa jw.org/toj