Bʼobʼta jujuntik wa spensarane mini ay stojolil skʼuʼajel sbʼaja sakʼwelali. Ja jekabʼanum Pablo mi jach spensaran yeʼn, pes yala: «Ke‘ntikni ja mas a‘julal jbʼajtik ja bʼa yoj snalan spetzanil ja ixuk winik jumasa‘i ta [wa xkʼu‘antik] wa xmajlatik ja kristo kechan ja bʼa lu‘umkʼinal iti. mi jachukuk. ja kristo sakʼwini‘a. ye‘nani bʼajtan ja bʼa yoj snalan ja chamwinik jumasa‘i» (1 Corintios 15:19, 20, YD). Sbʼaja Pablo, ja sakʼwelal ja chamwiniki ojni kʼot smeranil. ¿Jas yuj skʼuʼunej leki? Yuja sakʼwita ja Jesusi, jachuk skʼuʼan lek ojni ajyuk ja sakʼwelali (Hechos 17:31). * Ja yuj, ja Pablo yala ja Jesús «ye‘nani bʼajtan» sakʼwi bʼa oj ajyuk sakʼan bʼa tolabida. Ta yeʼn bʼajtan sakʼwi ja Jesusi, stojolni lek ja oj jpensaraʼuktik ojni ajyuk mas sakʼwelalik.

Ayni pilan rason bʼa oj jkʼuʼuktik lek ojni ajyuk ja sakʼwelali: Jyoba, ja Dyos smeranili, «mi xbʼobʼ oj slo‘Iayotik» (Tito 1:2, YD). Ja yeʼn mini bʼa loʼlanel sok mini oj loʼlanuk. Ja Dyosi wa skʼapa oj ya sakʼwuk ja chamwiniki, sok wa sjeʼa ayni yiʼoj yip bʼa skʼulajel, pe ¿wan maʼ xa kʼuʼan ja weʼn kechanta oj bʼobʼ skʼape sok mi oj ya kʼotuk ja jasa wa skʼapa? Ja jaw mini oj bʼobʼ skʼuluk.

Ja Jyoba wa xnikji yuja syajal skʼujoli sok spensaraʼunej oj ya sakʼwuk ja matik chameli. Ja Job sjobʼo: «Ta jun winik xchami, ¿oj maʼ cha bʼobʼ sakʼwuk?». Sok cha yala: «Weʼn oj paywanan, sok ja keʼn oj jakʼe. Wani xkʼankʼuni awuj yiljel jawa kʼulbʼeni» (Job 14:14, 15). Ja sTat tey bʼa satkʼinali wani xkʼankʼuni yuj oj ya sakʼwuk ja Job, soka yeʼn skʼuʼunej lek ja it. ¿Wanto maʼ xkʼankʼuni yuja Dyosi yajel sakʼwuk ja matik chameli? Ja Biblia wa xyala: «Keʼn ja Jyoba; mini tukbʼelukon» (Malaquías  3:6). Meraniʼa, ja Dyosi mini xyaʼakan skʼanjel oj ya sakʼwuk ja matik chameli bʼa ayabʼye stsamalil jun sakʼanil bʼa gusto lek. Jani jaw ja jasa wa skʼana ja nantatali matik chamel yuj yuntikili. Ja slekili, ja Dyosi mi kechanta wa xkʼankʼuni yuj, pes ayni yiʼoj ja yip bʼa skʼulajel (Salmo 135:6).

Ja Jyoba oj yayi ja yip ja Yunini bʼa oj ya sakʼwuk ja matik chameli. Ja it jelni oj ya ajyuk gustoʼil sbʼaja matik chamel yuj spamilya. Soka Jesús jelni wa skʼana oj skʼuluk ja jaw. ¿Jastal wa xnaʼatik? Pes bʼajtanto oj ya kumxuk ja sakʼanil ja yamigo Lázaro, «ja Jesusi ti bojti yoqʼuela» ja yajni yila wane yijel wokol ja smoj-aljelik soka yamigoʼik ja Lázaro (Juan 11:35). Bʼa pilan ekʼele, yajni yila jun biguda cham yuja kechanta skeremi, ja Jesús «ti stalna syaujulal ja nanal jahui. Ti yal yaba: -Mi la oqʼui». Sok wego ya sakʼwuk ja keremi (Lucas 7:13). Ja bʼa chabʼ loʼil it, wa xnebʼatik janekʼto syajal wa xyabʼ ja Jesús yuja wokol wa xyaʼakan ja chamelali. Ja yujil, ¡janekʼto stsamalil oj ajyuk yajni ja tristeʼili xya paxuk bʼa gustoʼil!

¿Ay maʼ bʼa chamel juna pamilya ja weʼn? Bʼobʼta xa pensaraʼan ja chamelchʼakeli jun jasunuk bʼa mixa ay yajnal. Pe ayni yajnala, ja Dyosi oj ya sakʼwuk ja chamwiniki sok jaʼ yaʼunej bʼa skʼabʼ ja Yunini bʼa oj skʼuluk ja it. Ajuluka kʼujol, ja Dyosi wa skʼana ti oj ajyan ja tiw bʼa oja wil oj sakʼwuke jawa pamilyaʼik matik chameli. ¡Pensaran ja tixa aya tiwi wanex xchapjel lajan ja jasa oja kʼulukex ja bʼa tyempo jakumto sok mixa oj kʼotuk ja kʼakʼu bʼa oja cha jipkana bʼajex!

Lionel, ja it jtaʼatiktajan tiʼali, wa xyala: «Yajni ay maʼ yala kabʼ ja smajlajel sbʼaja sakʼwelali, mini jel pasilukxta jkʼuʼan sok jpensaran ta kechan wa sloʼlayon. Pe tsaʼan kila ja bʼa Biblia sok jkʼuʼan merani oj kʼotuka. ¡Jelxani jgana oj kil yajkʼachil ekʼele ja jtatawelo!».

¿Wan maʼ xa kʼana oja nebʼ mas? Ja taʼumantiʼik bʼa Jyoba jelni sgustoʼe oj sjeʼe awi bʼa Biblia jas yuj skʼuʼuneje lek oj sakʼwuke ja chamwiniki. *