YOLOMAJEL JA BʼA SPATIKI | ¿OJTO MAʼ SAKʼWUKOTIK JA YAJNI WALA CHAMTIKI?
¿Jasa wa x-ekʼ yajni ay maʼ wa xchami?
«Ja keʼn wa xpensaran ajyi ay oxe lugar bʼa oj wajuk ja ixuk winik ja yajni wa xchami: wajel bʼa satkʼinal, bʼa infierno ma purgatorio. Wa xpensaran mini jel lekukon bʼa ti oj wajkon bʼa satkʼinal, cha mini jel maloʼukon bʼa ti oj wakon bʼa infierno. Pe ja mi xnaʼa lek ajyi jani jasunkiluk ja purgatorio. Mini bʼa jkʼumunej ja jas wa xyala ja Biblia; kechan wa xnaʼa ja jas wa xyalawe ja ixuk winiki.» (Lionel.)
«Jeʼubʼalki tini oj wajkotik jpetsaniltik bʼa satkʼinal, pe mini xkʼuʼan lek ta meran ja jaw. Wa xkʼuʼan ajyi ja chamelchʼakeli ti tikʼan wa xchʼak yibʼanal.» (Fernando.)
¿Ay maʼ bʼa ajobʼunejabʼaj jasa wa x-ekʼ ja yajni ay maʼ wa xchami? ¿Wane maʼ yijel wokol bʼa jun lugar ja jpamilyatik matik chameli? ¿Ojto maʼ kiltike yajkʼachil ekʼele? ¿Jastal oj bʼobʼ jnajtik ja smeranili? Bʼa oj jtatik ja sjakʼjeliki, ¿jas mi xpaklaytik ja jas wa sjeʼa ja Biblia? Bʼa sbʼajtanil, la jpaklaytik sbʼaja chamelchʼakeli sok tsaʼan oj kiltik ja sjakʼjel ja bʼa pilan oxe sjobʼjeliki.
¿Jastal wa xtaxye ja matik chamelexa?
JA SJAKʼJEL WA XYAʼA JA BIBLIA: «Ja matik sakʼan ayi wa snaʼawe oj chamuke, pe ja matik chamelexa mixato jas snaʼawe, mixa smajlay stsʼakole, yujni ja spensarajel bʼa yeʼnleʼi wa xchʼayi. Ja yuj chikan jas aʼtel tey bʼa wa kʼabʼ oja kʼuluk, kʼujolan skʼulajel yujni ja bʼa Kʼeʼen, ja lugar wala waj ja wala chami, mixa ay aʼtel, mixa tʼabʼan akʼujol bʼa ay jas oja taʼ, mini snajel sok mini biboʼil.» * (Eclesiastés 9:5, 10.)
Ja «Kʼeʼen», bʼa tʼusanta yaljel, jaʼa lugar bʼa wa xwajye ja matik wa xchamyeʼi. Ja it kechanta jun senya, jani wa staʼa tiʼal ja lugar bʼa mixato ay snajel sok mini aʼtel. Pensaran jastal yabʼ stojolil ja Job yajni staʼa tiʼal sbʼaja kʼeʼeni. Kechanta bʼa jun kʼakʼu ja yuntikili chʼak chamuk sok chʼayuj spetsanil ja jastik yiʼoji. Tsaʼan, yiʼaj wokol yuja kʼoʼon chʼak eluk ja bʼa skwerpo. Anto ti skʼanayi ja Dyosi: «Ah tiʼukxta bʼi xa nolowon bʼa Kʼeʼen [«infierno», jastal wa xyala ja La Sagrada Biblia, bʼa Guillermo Jünemann], tiʼukxta bʼi xa nakʼawon tiw» (Job 1:13-19; 2:7; 14:13). Chikan lek stojolil, sbʼaja Job ja kʼeʼeni mi jun lugaruk bʼa yoj kʼakʼ, bʼa tiʼ oj waj yi wokol mas, pes ja yeʼn spensaraʼan bʼa jun lugar bʼa xlikiki, bʼa jijlel.
Snajel jastal wa xtax ja matik chamelexa jani cha skʼumajel ja loʼilik wa xtax bʼa Biblia sbʼaja ixuk winik matik sakʼwiyeʼi. ¿Jas yuj mixa paklay ja bʼa rekwagro « Waxake sakʼwelal wa xcholxi ja bʼa Biblia»?
Mini june bʼa yeʼnle yalawe ta ti ajyiye bʼa jun lugar jel xyaʼa gustoʼil ma bʼa yijel wokol. Lek wajukexta bʼa jun lugar jastal jaw, ¿mi maʼ ojukni xchol-e jastal ja lugari? ¿Mi maʼ ojni cha kan tsʼijbʼunubʼal bʼa Biblia bʼa oj naxuk bʼa wajyeʼa? Ja Yabʼal Dyosi mi xcholo sbʼaja it. Ja ixuk winike jaw mini jas xcholowe, pes yujni mi jas oj bʼobʼ xchol-e. Yajni chamel ajyiyeʼi mini jas snaʼawe, yujni jach ajyiye jastal wantik lek wayel. Pes ja Biblia wa xya makunuk ja yaljel «huayel» yajni wa staʼa tiʼal sbʼaja chamelchʼakeli. Jun sjejel, yajni ja Lázaro chami, ja Jesús yala: «Ja camigotic Lázaro huan xa huayel, pero oj huaj yujques cani» (Juan 11:11).
Anto, ¿ti maʼ wa xchʼak yibʼanal ja wala chamtiki? ¿Oj maʼ «sakʼwukejan» ja matik wane wayel ja bʼa chamelchʼakeli?
^ par. 7 Ja Seol bʼa kʼumal hebreo soka Hades bʼa kʼumal griego wa stojolan «kʼeʼen». Bʼa jujuntik Biblia sutubʼal «infierno», anima ja spensarajel jun lugar bʼa wa xwaj yiʼe wokol bʼa yoj kʼakʼ ja matik wa xchami mi wa xtax ja bʼa Yabʼal Dyosi.
