YOLOMAJEL JA BʼA SPATIKI
¿Machunkiluk ja taʼumantiʼik bʼa Jyoba?
«Jitsanxa jabʼil wa xnaʼa sbʼaja Mike. Ja yeʼn jun taʼumantiʼ bʼa Jyoba, soka srelijyoni jelni tuk wa xkila. ¿Machunkiluk ja Jyoba? ¿Jas yuj ja Taʼumantiʼiki mi skʼintaye ja kʼiniki? ¿Ti maʼ chʼikan bʼa jun secta ja Mike?» (Becky, bʼa California, Estados Unidos)
«Ja jbesinoʼiki och spaklaye ja Biblia soka taʼumantiʼik bʼa Jyoba soka keʼn jpensaraʼan: ‹¡Jelni tuk yabʼjel ja sbʼiʼil ja relijyon jaw! ¿Jas maʼ wa stojolan?›» (Zenon, bʼa Ontario, Canadá)
«Ja keʼn soka jtatami wa xpensarantikon ja Taʼumantiʼiki kechanta wa xjakye bʼa oj syajbʼes ja jastal wala taxtikon yuja mi wala wajtikon ja bʼa iglesia. Pe jpensaraʼantikon ta mi jtaʼatikon ja bʼa relijyonik mas tʼilanik ja jasa wantikon slejeli, mini oj cha jtatikon bʼa tuk sectaʼik bʼa jel tuk yabʼjel jastal ja taʼumantiʼik bʼa Jyoba.» (Kent, bʼa Washington, Estados Unidos)
«Ja smeranili, ja ajyi mini xnaʼa machunkiluke sok jasa wa skʼuʼaneʼi.» (Cecilie, bʼa Esbjerg, Dinamarca)
Bʼobʼta awilunej wa xcholowe bʼa naʼits naʼits, bʼa bʼejik, yajelkan juʼunik elel bʼa Biblia sok skʼapjel sjejelik bʼa Biblia jach kʼebʼubʼal. Bʼobʼta ja rebista wana skʼumajeli yeʼn yaʼunejawi june bʼa yeʼnle. Pe bʼobʼta apensaraʼunej junxta jastal ja tuk ixuk winik kalatikta bʼa kʼeʼeli sok xa jobʼo abʼaj machunkiluk meran ja taʼumantiʼik bʼa Jyoba.
Ta aya wiʼoj sjobʼjelik ma jastik junuk sbʼaja taʼumantiʼik bʼa Jyoba, ¿jasa oj bʼobʼa kʼuluki? ¿Bʼa oj bʼobʼa ta sbʼaja jas wa skʼuʼaneʼi, bʼa wa x-el ja takʼin bʼa skʼulajel ja yaʼteleʼi sok yajel kʼeʼuk ja lugarik bʼa wa stsomo sbʼajeʼi, sok jas yuj wa xwajye bʼa wa naj ma wa x-ochye loʼila mok bʼa bʼej?
Ja Cecilie, taxi tiʼal bʼa kʼeʼeli, yala: «Jkʼuman bʼa Internet jitsan jastik junuk sbʼaja taʼumantiʼik bʼa Jyoba. Kabʼunej jujuntik abʼal kʼumal sok jitsan pensarik bʼa wa xtaji tiʼal mi lekuk ja Taʼumantiʼiki bʼa yiʼajon och spensarajel jastik mi lekuk bʼa yeʼnle». Pe yajni staʼa loʼil ja Taʼumantiʼiki, jachuk el soka sduda yiʼoji.
Bʼobʼta ja weʼn waxa kʼana oja kʼuluk ja jaw. Ta waxa kʼana oja nebʼ mas sbʼaja taʼumantiʼik bʼa Jyoba, ¿jas yuj mixa jobʼo yile ja yeʼnleʼi? Yeʼn yaʼuneje eluk ja rebista it sok kechani yeʼnle ja mas lek oj yawe awi sjakʼjeli (Proverbios 14:15). Wa xmajlatikon ja artikuloʼik jakumi oj skoltaya bʼa snajel machunkiluke, jasa wa skʼuʼane sok jasa wa skʼulaneʼi.
