Ja taʼumantiʼik bʼa Jyoba wa xkʼuʼantikon bʼa «spetzanil ja yabal ja Diosi, Dios ni ya jac scʼujol ja maʼ stzʼijba cani» (2 Timoteo 3:16). Wa xkatikon makunuk ja Biblia bʼa oj jnatikon sbʼaja Kʼulumani sok bʼa oj cha stoj-otikon bʼa yijel jun lekil jsakʼaniltikon.

Ja Biblia wa xyala: «Oj snaʼ ja ixuk winiki ja weʼn, wa bʼiʼil Jyoba, kechan weʼn ja mas niwana bʼa spetsanil ja luʼumkʼinali» (Salmo 83:18). Ja yuj kechantani yeʼn wa xkatikonyi stoyjel ja Jyoba Dyos, sok skʼujolajel bʼa oj katikon snaʼ ja tuki ja sbʼiʼili, pes yujni staʼumantiʼotikon (Isaías 43:10-12).

Snochumanotikon ja Kristo sok wa xkʼuʼantikon ja yeʼn «ja yunin ja Diosi», * bʼa jak bʼa Luʼum sok yeʼn kʼot ja Mesías (Juan 1:34, 41; 4:25, 26). Tsaʼan ja yajni chami, ja Jesús sakʼwi sok kumxi bʼa satkʼinal (1 Corintios 15:3, 4). Tyempoʼik tsaʼan aji och Mandaranum ja bʼa sGobyerno ja Dyosi (Apocalipsis 11:15). Ja Mandaranum jaw jun gobyerno bʼa wanxa yajel mandar sok ojxta cha ya paxuk ja Luʼumi jun tsamal kʼachinubʼ (Daniel 2:44). Ja Biblia wa skʼapakitik: «Ja matik chʼin wa xyaʼa sbʼaji oj sbʼajuke ja luʼumi, sok jel oj yabʼye stsamalil ajyel laman» (Salmo 37:11, 29).

Ja Taʼumantiʼiki wa xkʼuʼantikon ja jasa wa xyala ja Biblia oj bʼobʼ skoltay ja ixuk winik ja bʼa jtyempotiki (Isaías 48:17, 18). Ja yuj, wani xkʼulantikon ja janekʼ wa xbʼobʼ kujtikoni bʼa skʼulajel ja mandarik yiʼojani. Jujuntik sjejel, yuja Biblia wa xyala mokni katik kuxbʼuk ja jkwerpotiki soka jpensartiki, ja yuj mi xnukʼutikon may sok mi xkabʼtikon droga (2 Corintios 7:1). Cha mini wa xkʼulantikon jastik junuk yajni wa xyala ja Biblia mi lekuk skʼulajel, jastal ja yakbʼel, koʼel mulal sok ixuk winik soka elkʼaneli (1 Corintios 6:9-11).