Spetsanil jabʼilik wa xkatikon eluk sok wa xpukutikon jitsan miyon Biblia sok juʼunik elel bʼa Biblia. Wa xkatikon kʼeʼuk opisinaʼik sok imprentaʼik bʼa yibʼanal ja luʼumi sok wani makunelkujtikon. Tsomanotikon bʼa jitsan mil kongregasyon sok wa stsomo jbʼajtikon bʼa lugarik sensiyoʼik sok lek skʼeljel bʼa wa xkatikon sbʼiʼiluk Naʼits bʼa Tsomjel. ¿Maʼ wa stupu yibʼanal ja it?

Ja kaʼteltikoni wa xkʼulaxi soka takʼin wa xyaʼawe sok spetsanil skʼujol ja ixuk winiki (2 Corintios 9:7). Bʼa 1879, ja bʼa xchabʼil ekʼele el ja rebista it, wa sbʼiʼilan ajyi Zionʼs Watch Tower yala: «[Ja rebista iti], jastalni wa xkʼuʼantikon, ja JYOBA jani ja koltanumi, sok yajni yeʼn wan koltanel mi oj kʼankʼunuk ekʼ skʼanjel takʼin bʼa oj koltajuk yuja ixuk winiki». Man wego, jani it ja jasa wa xkʼuʼantikon leki.

Ja matik wa skʼana oj ya takʼin sok spetsanil skʼujol oj bʼobʼ sjek junuk ja bʼa naʼitsik Betel kiʼojtikoni ma oj bʼobʼ yaʼ ja bʼa kajaʼik wa xtax ja bʼa Naʼits bʼa Tsomjeli. Mi xkʼanatikon diezmo, cha mini xkʼanatikon takʼin, mini jtsʼakoltikon yuja aʼtel wa xkʼulantikon ja bʼa jrelijyontikoni cha mini xkʼanatikon stsʼakol ja juʼuntikoni. Mi wala tupjitikon yuja wa xcholotikoni, ja wa xjeʼatikon ja bʼa tsomjelali sok ja wa xkatikon kʼeʼuk lugarik bʼa tsomjeli. Pes ja Jesús yalunej: «Acʼubal ni ahuilexa y mi amanunejuquex. Jayuj mi sbejuc oja cʼuluquex cobrar ja huenlex» (Mateo 10:8). Mini june wa skʼana stsʼakole ja matik wane aʼtel ja bʼa yechalil wa xkʼelxi ja kaʼteltikoni soka bʼa tuk naʼitsik Beteli, cha mini ja Tsome Tojwanumi ma ja matik wa stojowe ja taʼumantiʼik bʼa Jyoba.

Chomajkil, ja yal sat takʼini wa xcha axi makunuk bʼa koltanel ja bʼa wa x-ekʼ desgrasyaʼiki. Ja nebʼumanik bʼa bʼajtan siglo skoltaye gusto lek ja matik ekʼ sbʼaje wokoliki (Romanos 15:26). Jachni ja bʼa jtyempotiki, wa xkoltaytikon ja matik wa x-ekʼ sbʼaje desgrasya yajel kʼe snaje sok yajel swaʼele, skʼuʼe sok aʼanik. Wa xcha jtojbʼestikon ja Naʼitsik bʼa Tsomjel bʼa wa x-ekʼ desgrasya.