Bʼobʼta jani mas wa xnaji jbʼajtikon yuja wa xcholotikoni. Wa xcholotikon bʼa naʼits naʼits, bʼa lugarik jel ja ixuk winiki ma bʼa chikan jas lugarik ay ixuk winik. ¿Jas yuj wa xkʼulantikoni?

Ja taʼumantiʼik bʼa Jyoba wa xcholotikon bʼa yajelyi stoyjel ja Dyosi sok bʼa oj najuk sbʼaj ja sbʼiʼili (Hebreos 13:15). Wa xcha jkʼulantikon bʼa skʼuʼajel ja mandar bʼa Kristo: «Caaxic, cax ja ba spetzanil ja lugari ba jachuc oj och jnebumanil ja cristiano jumasa. [...] Jeahuic ba oj scʼuuque spetzanil ja jmandari» (Mateo 28:19, 20).

Sok wa xkʼulantikon yuj wa xyajtaytikon ja ixuk winiki (Mateo 22:39). Wa xnaʼatikon tʼusan mi spetsaniluk ja ixuk winiki ayni yiʼoje pilan skʼuʼajel sok mi yibʼanaluk oj smaklaye ja jasa wa xcholotikoni. Pe jkʼuʼunejtikon lek ja jasa wa sjeʼa ja Biblia ojni bʼobʼ ya staʼ sakʼanil ja ixuk winiki. Ja jaw wa snikawotikon bʼa ‹mi oj katikonkan sjejel ekʼe› ja lekil yaljelik sbʼaja Kristo, jastalni skʼulane ja bʼajtan nebʼumaniki (Hechos 5:41, 42).

Jitsan ja matik wa skʼuman ja juʼuntikoni mi taʼumantiʼik bʼa Jyoba. Chomajkil wa xjeʼatikon yile bʼa Biblia jitsan mil ixuk winik bʼa ayiʼoje tuk relijyon sok bʼa wa skʼanawe awaj ulatajuke yuj jun Taʼumantiʼ.

Aytoni maʼ awiʼoj sjobʼjelik sbʼaja keʼntikoni. Ay tuktukil modoʼik bʼa oj bʼobʼa taʼ ja sjakʼjeliki:

• Jobʼoyi jun taʼumantiʼ bʼa Jyoba.

• Ochan ja bʼa jsitiotikon bʼa Internet, jw.org.

• Kaʼax ja bʼa jtsomjeltikoni. Mi xtupxi sok wa xbʼobʼ ochuk chikan machʼa.