Jitsan ixuk winik wa skʼuʼane ja yajel orasyoni kechanta lom xchʼayjel tyempo, sok mini maʼ wa xmaklajiyeyuj. Tuk yaʼunejeyi orasyon pe wa xyabʼye mini wa xjakʼjiyile. Jun winik mi skʼuʼan Dyos och spensaraʼuk jastal maʼ ja Dyosi sok yayi orasyon: «Anima kechanta xa saja loʼilayon». Pe yala ja Dyosi «xchʼabʼabʼixta» kani.

Pe ja Biblia wa xyala ja Dyosi wani smaklay ja orasyoniki. Ja bʼa Yabʼali kanel tsʼijbʼunubʼal ja yaljelik aljiyabʼ jun chonabʼ ja bʼa najate: «[Ja Dyosi] meran lek oj snaʼa yajulal yuja wala awani bʼa skʼanjel akoltajeli; ja yeʼn wegoni oj sjakʼawi ja yajni xyabʼi» (Isaías 30:19). Pilan bersikulo wa xyala: «Ja yorasyon ja matik toji jelni lek xyabʼ ja Yeʼni» (Proverbios 15:8).

Ja Biblia ayiʼoj sjejelik bʼa orasyonik bʼa ayni maʼ smaklay. Bʼa jun bersikulo wa xyala ja Jesús «och scʼumuc ja Dios Tatali [...]. Ja Diosi smacla ni ja jas yala ja Jesusi», pes ja Dyos ya sakʼwuk ja Jesús (Hebreos 5:7). Wa xtaʼatik mas sjejelik bʼa Daniel 9:21 sok 2 Crónicas 7:1.

Anto, ¿jas yuj jujuntik ixuk winik wa spensarane mini ay maʼ wa smaklay ja yorasyoneʼi? Pe ta wa xkʼanatik ja Jyoba, * ja sDyosil ja Biblia, a-smaklayotik, tʼilani kechanta yeʼn oj katikyi orasyon. Mini lek oj katikyi orasyon tuk dyosik sok mini ja matik ekʼpaxtakujtiki. Chomajkil, ja kʼulumani wa skʼana oj jkʼantikyi ja jastal «huas scʼana ja yen». Ta jachkʼa wa xkʼulantik ojni «smaclayotica» (1 Juan 5:14). Ja yuj, ta wa xkʼanatik oj smaklayotik ja Dyosi, jelni tʼilan oj jnatik sbʼaj sok ajyel kʼuʼabʼal.

Jitsan ixuk winik skʼuʼuneje lek ja yajel orasyoni mi kechanukta jun kostumbre bʼa relijyon, ja Dyosi merani wa smaklay sok wa sjakʼa ja yorasyoneʼi. Ja Isaac, bʼa Kenia, yala: «Wa xkayi orasyon bʼa skʼanjel jkoltajel yabʼjel stojolil ja Biblia. Tʼusan tsaʼan, ay maʼ jak staʼon sok skʼapaki ja koltajel wa xkʼanaʼi». Hilda, sbʼaj bʼa Filipinas, wa skʼana oj yakan ja snukʼjel mayi. Jitsan ekʼele sleʼa modo, pe mini bʼobʼyuj. Ja yuj, ja statami yala yabʼ a-skʼanyi skoltajel ja Dyosi. Tsaʼan yajni yayi orasyoni, ja yeʼn yala: «Jelni cham kila ja jastal skoltayoni. Och el jgana ja snukʼjeli. Bʼobʼnikuj yajelkan ja mayi».

Ta ja jas wa xcham akʼujol tini chʼikan soka jas wa skʼana ja Dyosi, ¿oj maʼ skoltaya ja yeʼn?