Yajni chawane wa x-ochye loʼil tikʼan wa stsatsbʼi ja jastal wa xyila sbʼajeʼi. Ja Dyosi wa slokowotik oj jkʼumuktik bʼa oj kamigoʼuktik. Wa xyala kabʼtik: «Ja weʼnlexi oja kʼumukonex sok oj jakanik sok oja waʼexki orasyon, sok ja keʼn ojni jmaklayex» (Jeremías 29:12). Yajni wa xkʼumantik ja Dyosi, wala mojxitik soka yeʼn, jaxa yeʼn ‹ojni mojxuk jmoktik› (Santiago 4:8). Ja Biblia wa xyala: «Ja Jyoba tini ay mojan sok spetsanil ja matik wa xleji yuji» (Salmo 145:18). Yajni mas wa xkatikyi orasyon, masni wa stsatsbʼi ja jastal wa xkila jbʼajtik soka yeʼn.

Ja Jesús yala: «¿Machuncʼa junuc ja huenlexi ja hua huuninexi, ta huan cʼa scʼana huilex jun pan, oj ma huaex yi jun ton ba? Ma huas scʼana huilex jun chay, ¿oj ma huaahuex yi jun mal chan ba? Ja huenlexi [...], huan ni xa huaahuex yi ba lec ja smajtan ja hua huuntiquilexi. ¡Jauc to ma ja hua Tatex ja maʼ tey ba satqʼuinali! Puro ni lequil majtan oj yaa yi ja matic huas scʼana» (Mateo 7:9-11). Ja Dyosi wa skʼana oj katikyi orasyon yujni ‹huan nix yaawotik sata› sok wan skʼanjel oj skoltayotik (1 Pedro 5:7). Mi jaʼukta, wa xcha yalakabʼtik oj jletik ja yajni ay kiʼojtik wokoliki. Ja Biblia wa xyala: «Chican jastal huax ecʼ ahuujilexi, mix cham acʼujolex. Cʼumanic ja Diosi. Cʼanahuic yi lec pavor ja Dios ba oj scoltayex» (Filipenses 4:6).

Ja matik jel chapane bʼa spaklajel ja smodo ja ixuk winiki yiluneje jitsan miyon wani xyilawe stʼilanil ja yajel orasyoni. Ja matik mi skʼuʼan ja Dyos soka matik wa xyalawe jel wokol snajel jastik junuk sbʼaja Dyosi wani xcha yawe orasyon. * Ja it wa sjeʼa kʼulajitik bʼa skʼanjel kujtik mojxel soka jKʼulumantiki. Pes ja Jesús yala: «Mi quechanuc ja huaelal huax yaa sacʼanil ja cristiano, jaʼ ni spetzanil ja jas huax el ja ba sti ja Diosi» (Mateo 4:4). Jun modo bʼa skʼulajel, jani yajelyi orasyon tikʼan ja Jyoba.

¿Jasa oj ekʼuk ta jkisatik ja lokjelal wa xyaʼa ja Dyos bʼa oj yamigoʼukotiki?