YOLOMAJEL JA BʼA SPATIKI
¿Lek maʼ xyila ja Dyos ja kʼakʼaneli?
Jitsan ixuk winik wa spensarane ja Dyosi lek xyila ja kʼakʼaneli, pes ja bʼa najate sjekani ja yaʼtijumik bʼa awajuke jujuntik ja bʼa kʼakʼaneli, jastalni wa x-ilxi bʼa Biblia. Pe cha ay jujuntik wa snaʼawe ja Jesús, ja Yunin ja Dyosi, sjeʼayi ja snebʼumaniki a-syajtaye ja skontraʼeʼi (Mateo 5:43, 44). Wa xkʼot spensaraʼuke ja Dyosi stukbʼes ja spensar sok ja wego mixa lek xyila ja kʼakʼaneli.
¿Jas waxa pensaran ja weʼn? ¿Lek maʼ xyila ja Dyos ja kʼakʼaneliki ma miyuk? Ta lek xyila, ¿jas kʼoleʼil ti chʼikan ja bʼa jtyempotiki? Snajel ja sjakʼjel ja sjobʼjelik it oj bʼobʼ ya tukbʼuk ja jas waxa pensaran sbʼaja kʼakʼaneli. Jun sjejel, pensaraʼan ja Dyos lek xyila ja kʼakʼaneli sok tey chʼikan ja bʼa kʼole teya ja weʼn, bʼobʼta oja wale ja kʼakʼanel jaw lekniʼa sok ojni akʼul ganar. Pe ¿jaxa ta awabʼ ja Dyosi tey ja bʼa kʼole wa kontra? Bʼobʼta oja wal ja kʼakʼaneli mi lekuk.
Pe ayto jas mas chʼikan. Snajel jasa wa spensaran ja Dyos sbʼaja kʼakʼaneli ojni tukbʼuk ja jastal waxa pensaran sbʼaja Dyosi. Ta ja weʼn ti chʼikana ja bʼa jitsan miyon ixuk winik wa xyiʼaje wokol yuja kʼakʼaneliki, ojni akʼan oja naʼ ja sjakʼjel ja sjobʼjel it: ¿Jach maʼ ja Dyos jastal wa skʼuʼane jujuntik bʼa lek xyila ja kʼakʼaneli sok yeʼn wa xya jakuk ja wokolik wa xyaʼakan ja kʼakʼaneli, ma mi xchamskʼujol ja jas wa x-ekʼ sbʼaje ja tuki?
Chamni oja wabʼ yajni xa naʼa ja jas wa xyala ja Biblia tukni lek yuja pensarik jaw. Man tyempo najate sok man wego, ja Dyosi mini tukbʼeluk ja spensar sbʼaja jaw. La jpaklaytik jasa wa xyala ja Biblia sbʼaja kʼakʼanelik ja bʼa najate soka bʼa styempo ja Jesús. Ja it oj skoltayotik yabʼjel stojolil jasa wa spensaran ja Dyos sbʼaja kʼakʼanel bʼa jtyempotiki, sok snajel ta ojto ajyuk kʼakʼanel ja bʼa tyempo jakumto.
