Ja Dyosi skʼumunej ja ixuk winiki. Ja it skʼulunej yajel makunuk ja yipi bʼa oj ya ekʼ bʼa spensar ja tsʼijbʼanumik bʼa Biblia ja spensarik ja Yeʼn (2 Pedro 1:20, 21). Ja yuj, wani xbʼobʼ jnatik sbʼaj lek ja Dyosi skʼumajel ja Yabʼali. (Kʼuman ja Juan 17:17, (YD) sok 2 Timoteo 3:16.)

Ja bʼa Biblia, ja Dyosi wa xya jnatik jitsan jastik junuk sbʼaja yeʼn. Wa xcholo jas yuj skʼulan ja ixuk winiki, jasa oj skʼuluk sbʼaja ixuk winiki sok jastal wa skʼana oj jetik ja jmodotiki (Hechos 17:24-27). Ja Jyoba wa skʼana oj jnatik ja smeranil sbʼaja yeʼn. (Kʼuman ja 1 Timoteo 2:3, 4.)

Ja Jyoba yeʼn ja Dyos bʼa smeranili sok sjekakon ja Yunini, ja Jesukristo, bʼa oj jak sjekitik. Ja yuj, ja matik wa sleʼawe ja smeranili wani skisawe ja jastik jun sjeʼa ja Jesusi (Juan 18:37). Ja Dyosi wa skʼana ja tikʼe ixuk winik jaw ayaweyi stoyjel ja yeʼn. (Kʼuman ja Juan 4:23, 24.)

Ja Satanás spukunej abʼalik sbʼaja Dyosi, soka abʼalik jaw yaʼunej jitsuk ja ixuk winik ja bʼa stsʼeʼel ja Dyosi (2 Corintios 4:3, 4). Ja matik mi syajtaye ja smeranili yujni ja wa xpayjiye skʼuʼajel ja sjejelik bʼa mi meranuki (Romanos 1:25). Pe jitsan ixuk winik wani staʼawe ja smeranil sbʼaja Dyosi skʼumajel ja Biblia. (Kʼuman ja Hechos 17:11.)