Pensaraʼan wajela bʼa jun pilan país bʼa sbʼajtanil ekʼele. Ja tiw awila ja ixuk winiki, ja kostumbre, ja waʼelali sok tuk jasunuk tuk lek yuja bʼa anaʼunej sbʼaja weʼni. Ja smeranili jelni tuk oja wila.

Jachni junxtatik oja cha wabʼ ja weʼn ja yajni xkʼe akʼumuk sbʼajtanil ekʼele ja Biblia. Yajni wana skʼumajeli, wala kumxi bʼa tyempo najate sok waxa wila ja luʼumkʼinali tuk lek yuja luʼumkʼinal waxa naʼa sbʼaja weʼn. Oja naʼ sbʼaj bʼa jitsan chonabʼik, jastal sbʼaja filisteoʼiki. Oja cha nebʼ yajkʼachil kostumbreʼik, jun sjejel, jastal ja xchʼijel ja skʼuʼeʼi. Chomajkil, sbʼa jun waʼelal sbʼiʼil maná (Éxodo 16:31; Josué 13:2; 2 Samuel 3:31). Bʼobʼta spetsanil ja it oj sjoma wolom. Yajni ti wala tax bʼa pilan país, jelni oja wayi tsʼakatal ta ay maʼ skoltaya. ¿Mi maʼ jelni gusto oja wabʼ ta ay maʼ xcholo awabʼ ja bʼa mixa wabʼ stojolil ja jasa wa xyala ja Biblia?

Man kʼe tsʼijbʼaxuk ja Biblia, ja bʼa siglo 16 bʼajtanto ja bʼa jtyempotiki, axelni koltajel bʼa oj abʼxuk stojolil. Jun sjejel, ja Moisés, ja bʼajtan olomal ja bʼa chonabʼ Israel, ja yeʼn xcholo jas wa stojolan ja jasa stsʼijbʼani (Deuteronomio 1:5).

Junuk lajune siglo tsaʼan, ajyini ixuk winik bʼa chapane bʼa sjeʼawe sbʼaja Yabʼal ja Dyosi. Ja bʼa jabʼil 455 bʼajtanto ja bʼa jtyempotiki, jun niwan tsome judíoʼik, chomajkil yal untik, stsomo sbʼaje ja bʼa spatyoʼil ja chonabʼ Jerusalén. Ja matik chapane bʼa sjejel ja Biblia «snochowe skʼumajel tsats lek ja bʼa libro, bʼa sLey ja Dyos smeranili, xcholjel jaman lek, sok skʼumajel stojolil lek; jachuk skoltaye ja ixuk winiki bʼa oj yabʼye stojolil ja jas wan kʼumaxeli» (Nehemías 8:1-8).

Junuk 500 jabʼil mas tsaʼan, ja Jesús cha skʼulani ja aʼtel jawi, junxtatik jastal skʼulane ja tuki. Pes ja ixuk winiki kʼot snaʼe sbʼaj jastal ‹maestro› (Juan 13:13). Sjeʼayi bʼa jujune sok bʼa jitsan ixuk winik. Bʼa jun ekʼele, sjeʼayi bʼa jun niwan tsome sok ti yaʼa tiw ja sloʼil jel naʼubʼal sbʼaji, ja sLoʼil bʼa Yaxkʼuli. «Jel och ja spensar ja cristiano yuj ja jas huax yala.» (Mateo 5:1, 2; 7:28.) Ja bʼa jabʼil 33, ja Jesús och loʼil sok chawane ja snebʼumaniki yajni wajume bʼa jun chonabʼ mojan ja bʼa Jerusalén. «Jaʼ ni huan seejel[yi]» ja snebʼumanik «ja jas tzʼijbanubal ja ba slibro ja Diosi.» (Lucas 24:13-15, 27, 32.)

Jachuk ja snebʼumanik ja Jesús chapani ajyiye bʼa sjeʼawe ja Yabʼal ja Dyosi. Bʼa jun ekʼele, jun winik jel chaʼan xchol ja bʼa Etiopía wan skʼumajel ja Yabʼal ja Dyosi. Ja nebʼuman Felipe och smoje sok sjobʼoyi: «¿Huan ma xa huab sbej ja jas huana sqʼueljeli?». Ja winiki yala: «Miyuc, como mi ni maʼ huas sea qui». Anto ja Felipe xcholoyabʼ ja jasa wan skʼumajeli (Hechos 8:27-35).

Jastalni ja bʼa najate ajyi matik chapane bʼa sjeʼawe ja jasa wa xyala ja Biblia, ja bʼa jtyempotiki, ja taʼumantiʼik bʼa Jyoba junxtani wane skʼulajel bʼa 239 país sok lugarik (Mateo 28:19, 20). Ja bʼa semana wa skoltaye mas ja bʼalune miyon ixuk winik bʼa oj yabʼye stojolil ja jasa wa sjeʼa ja Biblia. Jitsan ja bʼa ixuk winike it ja spamilyaʼeʼi mi xyaʼteltaye ja Dyosi. Ja sjejelik it kʼebʼubʼal wa x-axi. Oj bʼobʼ ajukawi bʼa wa jnaj ma bʼa pilan lugar, chomajkil bʼa telepono ma bʼa Internet.

Ta waxa kʼana jun sjejel bʼa Biblia, kʼuman jun taʼumantiʼ bʼa Jyoba. Ojni awil ja Biblia mi jun libroʼuk bʼa wokol yabʼjel stojol. Oj awil «ta mi cʼa tojuc ayotic, huas scomohuotic. Huas see quitic ja ba lequi ba oj quiitic jun jvidatic ba mas toj [...]. [Sok] chapan ni oj ajyucotic ba oj cʼultic spetzanil ja ba lequi» (2 Timoteo 3:16, 17).