Jun libro bʼa parteraʼik wa xyala ke «ja yalel smix ja nanal mini oj slaj ja lech bʼa wa xmanxi». June ja bʼa rason yuja lech it jel lek ja bʼa yal alatsi jani yuja skuerpo ja nanal wa skʼulan adaptar ja bʼa jastal wa xmakuniyuj ja alatsi.

 Pensaran ja it: Ja yalel smix ja nanal wanxtani tukbʼel kada ekʼele wa xchuni ja yalatsi. Ja bʼa skʼeʼulabʼili, ayiʼoj mas proteínaʼik, vitaminaʼik, mineralik sok jaʼ. Sok yajni ojxa chʼak chunuk ja alatsi, ja lechi masni ayiʼoj grasaʼik bʼa oj bʼutʼuk. Asta ja lech wa xtukbʼi jastalni ja sjabʼil ja alatsi sok ja tyempo.

 Ja yalel smix ja nanal cha wani xtukbʼi ja bʼa oraʼik bʼa kʼakʼu. Ja bʼa akwali ayiʼoj mas melatonina bʼa wa skoltay oj wayuk ja alatsi. Jaxa bʼa satkʼakʼu ay pilan jastik junuk bʼa wa xyaʼakan ke mi jel oj wayuk ja alatsi. Ja it wa xkoltani bʼa mi oj ekʼ swayel.

 Yajni pojkita ja alatsi, ja bʼajtanik kʼakʼu ja yalel smix ja nanali ayiʼoj jun yelaw kʼan bʼa wa sbʼiʼilan calostro. Ja calostro mini xyaʼa malo sok jel yiʼoj jastik junuk. Ama ja alats kechan jutsʼin xchuni jelni wa xbʼobʼ ya el slekilal ja slukumi. Ja calostro ayiʼoj jitsan jastik junuk bʼa wa skoltay ja alatsi, bʼa mi jel oj koʼ chamel. Chomajkil, wani sjiʼa ja slukum ja yal alatsi.

 Ja nanali mini oj xcham skʼujol ta mey lek yalel xmix, cha mini ta ayiʼoj loj. Wani x-ajyi mas yaʼal xmix ja bʼa jastal wa xmakuniyuj ja alatsi.

 ¿Jas waxa pensaran? Ja yalel xmix ja nanal sok ja jastik yiʼoj bʼa jel cham yabʼjel, ¿ay maʼ stojbʼes ma miyuk?