«Ayni ekʼele wa xkomo ja jas wa xkala, pe ay ekʼele lajansok ja jchijnakʼi mini wa skomo ja jas wa x-el ja bʼa jtiʼi» (James).

 «Yajni wanon xiweli, mi wa xpensaraʼan ja jas wa xkala sok yajni laman ayoni, mas wala kʼumaniyon. Ja yuj tolanibida wa xkala bʼa mi xpensaraʼan» (Marie).

 Ja Biblia wa xyala: «Ja yal chʼin cʼacʼ jahui, jaʼ ni mero smoj ja jtiitiqui» ma kakʼtiki, sok cha «quechan jun yal chʼin snich cʼacʼuc pero malan soc ja jahui, oj tzic nihuan lec ja lugari» (Santiago 3:5, 6). ¿Wan maʼ xa chʼika bʼaj bʼa wokol yuja jas waxa wala? Ta jel x-ekʼabʼaj, ja artikulo it oj bʼobʼ skoltaya.

•  ¿Jas yuj tolabida wa xkala ja jas mi sbʼejuk?

•  Nebʼa skomjel jawa wakʼi

•  Sjobʼjelik yiʼoje ja keremtik akʼixuk

 Ja mulal kiʼojtik. Ja Biblia wa xyala: «Mi ni ay june ja maʼ mi huax bob staa smuli pero jel lec huax yila ja maʼ mi huas slea smul soc ja stii. Ja cristiano jahui, yuj ni toj xa ni aya» (Santiago 3:2). Yuja mulanumotik, jel pasil wa xkʼojchin koktik ja wala jbʼejyitik, cha jachuk ja wala kʼumanitik sok wa xkalatik jas mi sbʼejuk.

 «Yuja jchijnakʼ soka kakʼ ayni yiʼoj mulal, mini ay sbʼej ja oj kal wa xkomo toj lek» (Anna).

 Jel la kʼumani. Ja Biblia wa xyala: «Yajni jel jitsan ja jas wa x-alxi, wani x-alxi bʼa mi lekuk» (Proverbios 10:19). Ja kristyano maʼ jel xkʼumani, sok mi jel smaklay, masni jel wego oj bʼobʼ syajbʼes ja tuk soka jas wa xyala.

 «Ja kristyanoʼik jel bibo bʼa jun kwarto mi tolabidaʼuk yeʼn wa xkʼumani. Ja Jesús yeʼn ja mas jel bibo ajyi sakʼan ja bʼa Luʼumi, sok ayni ekʼelik kan chʼabʼan» (Julia).

 Ixta loʼil bʼa kʼenanel. Ja Biblia wa xyala: «Ja yajni mi xpensaraʼaxi ja jas wa x-alxi jach jastal ja syajbʼesnel jun espada» (Proverbios 12:18). Jun tikʼe kʼumal bʼa mi xpensaraʼaxi ja jas wa x-alxi, jani jaʼ ixta loʼil bʼa kʼenanel. Ja ixta loʼil it jani yajel makunuk yaljelik bʼa wa xyajbʼesni yujni wa skʼana oj skʼul burlar june. Ja kristyanoʼik wa kʼumaniye ixta loʼil bʼa kʼenanel bʼobʼta wa xyalawe tajnel loʼil, pe yajelkan jel skoʼelal ja tuk mini bʼa tseneluk. Ja Biblia wa xyala kabʼtik mok «caatic yajbuc ja jmojtiqui. A chʼay jcʼujoltic juntiro ja jpensartic malo soc ja jmojtiqui» (Efesios 4:31).

 «Chikan jas wa xkala sok jel jgusto ja tajnel loʼili, pe ja modoʼal jaw wa x-ikʼwani bʼa ixta loʼil bʼa kʼenanel sok ay ekʼeleʼik wa xchʼika jbʼaj bʼa wokol» (Oksana).

 Snebʼjel skomjel ja wakʼi bʼobʼta jelni wokol, pe ja rasonik bʼa Biblia ojni bʼobʼ skoltayotik. Jun sjejel, pensaran ja it:

 «Ala ja jas oja wal ja bʼa kʼujoli, [...] sok kanan chʼabʼan» (Salmo 4:4).

 Ay ekʼeleʼik ja mas lek yajel ja sjakʼjeli jani kanel chʼabʼan. Jun akʼix sbʼiʼil Laura wa xcholo: «Ja jastal wa xkabʼ yajni tajkel ayoni bʼobʼta mixani jach oj kabʼ mas tsaʼan». Wa xcha yala: «Yajni wala lamxiyon, jelni la gustoʼaxiyon yuja mi kala ja jas wa xpensaraʼani». Spensarajel jutsʼin bʼobʼta mini oja wal ja bʼa mi sbʼejuki.

 «¿Yuj ma’ mi wa xyabʼ yajbʼal ja jchikintik ja yaljeliki, jastalni ja kak’tik wa xyabʼ yajbʼal ja waʼelali?» (Job 12:11).

 Mini jel oja chʼikabʼaj bʼa wokol ta waxa kʼulan probar ja jas wa xkana wal yajela bʼaj ja sjobʼjelik it:

•   ¿Meran maʼ? ¿Wan maʼ xkoltani? ¿Jel maʼ tʼilan? (Romanos 14:19).

•   ¿Jastal maʼ oj kabʼ ta ay maʼ pilan yalkabʼ ja jaw? (Mateo 7:12).

•   ¿Wan maʼ xkisa ja jastal wa spensaraʼane ja tuk kristyano? (Romanos 12:10).

•   ¿Ja maʼ styempoʼil ja yaljel ja bʼa jutsʼin jaw? (Eclesiastés 3:7).

 «Sbej que nihuan oja huilex ja hua mojexi, jaxa huenlexi, chʼin aa bajic» (Filipenses 2:3).

 Ja rason it oj skoltaya bʼa spensarajel lek ja bʼa tuk, sok ojni bʼobʼ skoltaya bʼa skomjel ja wakʼi sok spensarajel bʼajtanto oj kʼumanan. Ama mixa jaʼuk ja styempoʼil sok awalata bʼa jas wa xyajbʼesni, ja chʼin yajel abʼaj oj skoltaya bʼa oja kʼan perdon sok wego skʼulajel (Mateo 5:23, 24). Tsaʼan kʼujolan skomjel jawa wakʼi.