Jastalni wa xyala jun censo, ja 80% ja keremtik akʼixuk ja bʼa Estados Unidos wa xyaweyi orasyon ja Dyos, pe kechanta snalan ja bʼa yeʼnle wa skʼulane kada kʼakʼu. Bʼobʼta jujuntik wa sjobʼo sbʼaje: «¿Kechanta maʼ jun terapia ja orasyon bʼa oj kabʼ maxa lek ayon?».

•  ¿Jasunuk meran kʼotel ja orasyon?

•  ¿Meran maʼ wa smaklayon ja Dyos?

•  ¿Sbʼaj jastik oj bʼobʼ kayi orasyon?

•  Ja jas wa spensarane tuk keremtik akʼixuk

 Ja orasyon jani loʼilanel soka Jyoba, ja Kʼuluman bʼa yibʼanal ja jastik junuki. Pensaran ja bʼa jas wa stojolan ja jaw: ama ja yeʼn mas niwan yuja kristyanoʼiki, «mini jel najatuk ay bʼa kada jujune ja keʼntiki» (Hechos 17:27). Chomajkil, ja Biblia wa xyaʼakitik ja tsamal lokjelal it: «Mojxanik soka Dyosi sok jaxa yeʼni ojni mojxuka mokex» (Santiago 4:8).

 ¿Jas oja kʼuluk bʼa oj mojxansok ja Dyosi?

•   Yajelyi orasyon. Jani ja modo bʼa loʼilanel soka yeʼn.

•   Yajelyi estudio ja Biblia. Yujni jach jastal it ja Dyos wa xbʼobʼ «skʼumuka».

 Ja loʼilanel lajan jastal it, ja yajelyi orasyon sok skʼulajel estudiar ja Biblia, ojni skoltaya bʼa oja wamigoʼuk mas ja Dyos.

 «Kʼumal soka Jyoba, wa xkʼan alxuk, loʼilanel soka ja Maʼ jel Niwani, jani june ja cholal mas niwan yiʼoj ja kristyanoʼiki» (Jeremy).

 «Ja wa xcholoyabʼ ja Jyoba ja jastal wa xkabʼ ayoni wani xya kabʼ mas mojan ayonsok» (Miranda).

 Ama waxa kʼuʼan bʼa Dyos sok waxa wayi orasyon, bʼobʼta wokolni bʼa weʼn spensarajel ta meran wan smaklaya. Chomajkil, ja Biblia wa xyala ke ja Jyoba kʼotelni ja «Maklanum bʼa orasyon» (Salmo 65:2). Cha wa stsatsankʼujolana bʼa oja walyabʼ yibʼanal ja jas wa xchamakʼujol. ¿Jas yuj? Yujni ja Dyos wa xcham skʼujol bʼa weʼna (1 Pedro 5:7).

 Pensaran ja it: ¿Tikʼan maʼ waxa kʼuman jawa wamigoʼiki? Pes junxtani oja kʼulsok ja Dyos. Kʼuman tikʼan ja yeʼn sok amakunuk ja sbʼiʼil Jyoba (Salmo 86:5-7; 88:9). Chomajkil, ja Biblia wa slokowa oja wayi orasyon tikʼan (1 Tesalonicenses 5:17).

 «Ja orasyon kʼotel jun loʼilanel soka jTat bʼa satkʼinali, bʼa wa xjamayi spetsanil ja jkʼujoli» (Moises).

 «Wa xkalyabʼ ja Jyoba jastik jel tʼilan, jastalni wa xkʼulanyi ja jtat sok ja lekil kamigoʼiki» (Karen).

 Ja Biblia wa xyala: «Bʼa chikan jastal wala taxyex, sok orasyonik sok spatjel kʼujolal sok yajel tsʼakatal, awik snaʼ ja Dyos ja jastik waxa kʼanawexi» (Filipenses 4:6).

 ¿Wan maʼ stojolan ja jaw lek oja walyabʼ jawa wokoliki? ¡Waniʼa! Ja Biblia wa slokowotik oj kʼuluktik: «Jipa jawa wijkats sbʼaja Jyoba, soka yeʼn ojni skoltaya» (Salmo 55:22).

 Pe tʼilani mi kechan oja walyabʼ jawa wokoliki. Jun akʼix sbʼiʼil Chantelle wa xyala: «Mini jelxta lekil amigaʼuka bʼa Jyoba ta kechan waxa wayi orasyon bʼa skʼanjelyi skoltajel». Cha wa xyala: «Bʼa keʼna wani xbʼobʼ kal, bʼajtan ja jas tʼilan oj kʼuluktik jani yajelyi tsʼakatal sok tixa ja lista bʼa jastik yajel tsʼakatal mas albʼeli».

 Pensaran ja it: ¿Sbʼaj jastik waxa waʼa tsʼakatal? Pensaran oxe jasunuk bʼa oja wayi tsʼakatal ja Jyoba.

 «Ama jun jasunuk chʼin, jastal yiljel jun tsamal nichim, ojni bʼobʼ snikotik yajelyi jun orasyon ja Jyoba bʼa yajelyi tsʼakatal» (Anita).

 «Pensaraʼan jun bersikulo ke jelxa kʼulan gusto ja bʼa Biblia ma june ja bʼa jasunuk skʼulunej ja Jyoba sok wa snikawa. Tsaʼan ayi tsʼakatal yuja jaw» (Brian).