Ja jekabʼanum Pablo stsʼijbʼan: «Yajni wa xkʼana oj jkʼuluk ja bʼa jas toji, tini ay jmok ja bʼa jas mi lekuki» (Romanos 7:21, TNM). ¿Ay maʼ bʼa jach awabʼunej abʼaj ja weʼn? Ta jachuk, ja artikulo it oj bʼobʼ skoltaya bʼa oj kuchukawuj ja preba bʼa skʼulajel ja bʼa jas mi lekuki.

•  Ja jas tʼilan oja naʼ

•  Ja jas oj bʼobʼa kʼuluki

•  Ja jas wa spensarane tuk keremtik ak’ixuk

 Ja prebaʼik sok ja stʼenwanel ja tuki syakunej sbʼaj. Pes ja Biblia wa xyala ke ja «matik mi lek smojtajele wa xchʼayawe snajel ja lekil kostumbreʼiki» (1 Corintios 15:33, TNM). Ja stʼenwanel ja tuki ma ja jastik wa xpukxi ja b’a aparatoʼik oj bʼobʼ ya k’i kʼankʼunelik ja b’a wa kʼujoli b’a oj ya ochan probar ma oja noch ja tuki bʼa skʼulajel jastik bʼa malo (Éxodo 23:2).

 «Yajelkan bʼa oj stʼena ja tuki bʼa kechanta lek oj iljan ma bʼa oj kisjan ojni bʼobʼ yiʼa och bʼa skʼulajel junxta jastal ja yeʼnle, kechanta bʼa lek oj iljan» (Jeremy).

 Pensaran ja it: ¿Jas yuj masni wokol oj kuchukawuj ja prebaʼik ta jel xchamakʼujol ja jas wa spensarane ja tuki? (Proverbios 29:25).

 Xchʼakulabʼil: Mok awakan ja stʼenwanel jawa mojiki oj yaʼ kʼok ja jastik lek aneb’uneji.

 Naʼa sbʼaj lek ja jas waxa kʼuʼani. Ta mi seguro ayuka sbʼaja jas waxa kʼuʼani, ojni kʼot paxan jastal jun muñeco bʼa jaxani oja kʼuluk ja jas wa xyalawe ja tuki. Masni lek nocho ja rason it: «Pero spetzanil ja cosa, aa lec acuidadoex ta jaʼ mero sbaj ja Diosi. Ti la ajyiyex ja ba lado ja bay ja lequi» (1 Tesalonicenses 5:21). Ta wa xkʼota wabʼ lek stojol ja jas waxa kʼuʼani, masni pasil oj ajyan toj sok kuchelawuj ja preba bʼa skʼokjel abʼal.

 Pensaran sbʼaja it: ¿Jas yuj jelni lek bʼa weʼna ja skʼuʼajel ja jastik yaʼunej kujlajuk ja Dyosi?

 «Kilunej ke ja yajni toj wala ajyiyon soka jas wa xkʼuʼani sok wa xkuchkuj ja preba, ja tuki masni wa skisawone» (Kimberly).

 Jun lekil sjejel bʼa Biblia: Ja Daniel. Ja yajni wanto soltero’axeli, ja Daniel stsaʼa «ja bʼa skʼujol» ke jani oj skʼuʼuk ja sleyik ja Dyosi (Daniel 1:8).

 Naʼa jasa mas wa xya wokolanani. Ja Biblia wa staʼa tiʼal sbʼaja «maʼ untic to, ay ba jex cʼancʼoni juntiro ja sleejel ja smuli», wa xkʼan kaltik, ja kʼankʼunelik jel tsats ja b’a styempo’il jaw ja b’a sakʼanili (2 Timoteo 2:22). Mini kechanuk ja kʼankʼunel yi’oj ja kuerpoʼali, cha jachni ja kʼankʼunel bʼa kanel lek soka tuki sok ja skʼanjel bʼa weʼnxa oja tsaʼ ja jas waxa kʼana oja kʼuluki ama mito chapanuka.

 Pensaran ja it: Ja Biblia wa xyala ke «kada jujune wa x-aji och probar yajni wa xpayjiyuj sok wa xmonjiyuj ja jas wa xkʼankʼuniyuji» (Santiago 1:14, TNM). ¿Jas kʼankʼunel mas wa smonowa ja weʼn?

 «Moka loʼlabʼaj weʼnta mismo sbʼaja jastik junuk wa xya ochan probari. Paklay mas bʼa snajel jastal oj kuchukawuj sok aʼochkan juʼun ja jastik mas oj bʼobʼ skoltaya. Jachuk ja bʼa pilan ekʼele xjakabʼaj ja preba jaw, ojxa anaʼ jastal oj kuchukawuj» (Sylvia).

 Jun lekil sjejel bʼa Biblia: Ja David. Bʼa jujuntik ekʼele koʼ ja bʼa stʼenwanel ja tuki ma asta soka jas yeʼnta wa xkʼankʼuni yuji. Pe ja David snebʼa ja bʼa jastik mi lek skʼulani sok skʼujolan bʼa oj stojbʼes sbʼaj. Yalayabʼ ja it ja Jyoba bʼa orasyon: «Kʼulan ja bʼa keʼn jun kʼujolal bʼa toj, ah kala Dyos, sok aʼochuk ja bʼa keʼn jun yajkʼachil ipal, june bʼa yij lek» (Salmo 51:10).

 Komoʼabʼaj. Ja Biblia wa xyala: «Mi xa huaa bajex ba oj scʼuluquex ganar ja maloili» (Romanos 12:21). Ja it wa stojolan mi oj koʼan ja bʼa prebaʼiki. Weʼnani oj bʼobʼa tsaʼ skʼulajel ja bʼa jas leki.

 Pensaran ja it: ¿Jasa oj bʼobʼa kʼuluk bʼa oja komabʼaj sok skʼulajel ja bʼa jas leki yajni wala och probar bʼa skʼulajel ja bʼa malo?

 «Wa xpensaran jastal oj kabʼ oj ajyukon ta koyon ja bʼa preba. ¿Masxa maʼ lek oj ajyukon? Bʼobʼta, pe kechanta bʼa jutsʼin. ¿Lek maʼ oj kabʼ oj ajyukon tsaʼan? Miniʼa, mastoni jel tuk oj ajyukon. Anto, ¿tʼilan maʼ oj jkʼuluk? Pes miyuk» (Sophia).

 Jun lekil sjejel bʼa Biblia: Ja Pablo. Ama ja yeʼn yala ajyi spensarik bʼa mi lekuk, pe skomoni sbʼaj. Yeʼn mismo xcholo bʼa wani stojo ja skuerpo sok wa xya ajyuk jastal smoso (1 Corintios 9:27).

 Xchʼakulabʼil: Weʼnani wa xbʼobʼa naʼ jastal oj kuchukawuj ja prebaʼiki, ojni bʼobʼa komabʼaj.

 Ajuluka kʼujol ja prebaʼiki mi x-albʼi. Ja Melissa bʼa ayiʼoj 20 jabʼil, wa xyala: «Jitsan ja bʼa niwak prebaʼik wa xkila ajyi ja wego mixa jach wa xkila». Tsaʼan wa xyala: «Spensarajel sbʼaja jaw wa xya jkʼuʼuk ja prebaʼik kiʼoj ja wego cha ojni chʼak ekʼuk. Oj kʼot jun kʼakʼu bʼa oj juljkʼujol sok mini oj jnaʼ malaya yuja mi jkisa.