«Jleʼunej modo skʼumajel ja Biblia, pe wani xkila jastal jun libro jel jitsan yiʼoj» (Briana, bʼa 15 sjabʼil).

 ¿Cha jach maʼ waxa wila? Anto ja artikulo it wa bʼajni weʼna.

•  ¿Jas yuj jel tʼilan skʼumajel ja Biblia?

•  Modoʼik bʼa jastal skʼumajel ja Biblia

•  Ja jas wa spensarane tuk keremtik akʼixuk

 ¿Jel maʼ axwela sbʼaj xa wila skʼumajel ja Biblia? Wani x-abʼxi stojol. Bʼobʼta waxa pensaraʼan ja Biblia jach jastal jun libro jitsan slamik, bʼa ayiʼoj chʼin letraʼik sok mey yiʼoj dibujo. ¡Mini tʼun oj slaj ja telebisyon sok ja bideoʼiki!

 Ila bʼa jun modo jastal it: Lekbʼi xa taʼa jun poko kopre bʼa ayiʼoj jastik jel chaʼanyabʼal, ¿anke jelni oj kʼankʼunukawuj sjamjel?

 Pes ja Biblia jach jastal ja kopre jaw bʼa ayiʼoj jastik jel chaʼanyabʼal. Ja tiw oja taʼ jitsan biboʼil ke oj skoltaya bʼa:

•   Oja stsaʼ lek ja jas oja kʼuluki.

•   Oja wilabʼaj lek soka wa nantati.

•   Oja taʼ lekila wamigoʼik.

•   Oj kuchukawuj ja estres.

 ¿Jastal lek jun libro pokoxa jelto xmakuni bʼa keʼntik? Pes jani yuja «Yibʼanal ja Yabʼal ja Dyosi jani stojunej soka yipi» (2 Timoteo 3:16). Ja it wan xkʼan alxuk ke ja rasonik wa xtaʼatik ja bʼa Biblia tini jakel bʼa june Maʼ jel chaʼanyabʼal ja bʼa sutsatkʼinali.

 Jun modo jani skʼumajel bʼa skʼeʼulabʼil man xchʼakulabʼil. Ja it ojni ya naʼ bʼa yibʼanal ja rason yiʼoj ja Biblia. Oj bʼobʼa kʼul bʼa tuktukil modo, la kiltik bʼa chabʼ sjejel:

•   Ojni bʼobʼa kʼumuk ja 66 libroʼik wa xkʼe bʼa Génesis man Apocalipsis.

•   Cha ojni bʼobʼa kʼumuk ja Biblia ja bʼa jastal mero tyempoʼik ekʼi, wa xkan alxuk ja jas mero styempoʼil ekʼ ja jastik junuki.

 Ja jas oj bʼobʼa kʼuluk: Ja bʼa xetʼan 4-A ja bʼa poyeto Koltajel bʼa spaklajel ja Yabʼal ja Dyosi oja wil jun lista ja bʼa mero tyempoʼik ekʼi, ja jastik jel tʼilan ja bʼa sakʼanil ja Jesús ja bʼa Luʼumi.

 Bʼa xchabʼil modo jani oja tsaʼ jun loʼil bʼa wa staʼa tiʼal jun wokol wan ekʼelabʼaj. Jun sjejel:

•   ¿Wan maʼ xa kʼana oj ajyuka wamigoʼik bʼa meran oja jipa kʼujol? Anto kʼuman ja loʼil bʼa David sok ja Jonatán (1 Samuel kapituloʼik 18 man 20). Tsaʼan, tixa kʼulan probar ja it «Cómo encontrar amigos de verdad» bʼa oja nebʼ sjejelik jel xmakuni ja bʼa loʼil it.

•   ¿Wan maʼ xa kʼana oj ajyukawuj mas ipal bʼa kuchelawuj ja prebaʼiki? Oj bʼobʼa kʼumuk ja loʼil bʼa José sok yiljel jastal kuchyuj jun preba (Génesis kapitulo 39). Tsaʼan, tixa kʼulan probar ja it «Cómo resistir las tentaciones» sok «Acusado falsamente», ke oj sjeʼawi sjejelik jel xmakuni.

•   ¿Wan maʼ xa kʼana oja naʼ jastal oj bʼobʼ skoltaya ja orasyoni? Kʼuman ja jas ekʼ sbʼaj ja Nehemías (Nehemías kapitulo 2). Tsaʼan, tixa kʼulan probar skʼulajel ja it «Jehová contestó su oración» bʼa oja nebʼ sjejelik jel chaʼanyabʼal.

 Ja jas oj bʼobʼa kʼuluk: Yajni xa kʼana oja kʼumuk ja Biblia, leʼa jun lugar chʼabʼan bʼa oj waj leka kʼujol.

 Bʼa yoxil tsaʼa jun loʼil ma jun salmo, kʼuman sok tsaʼan pensaran jastal oj bʼobʼ skoltaya. Yajni chʼakta kʼumuk aʼabʼaj ja sjobʼjelik it:

•    ¿Jas yuj ja Jyoba xchʼikunejkan ja loʼilik it ja bʼa Biblia?

•    ¿Jas wa sjeʼaki ja bʼa jastal kʼotel ja Jyoba sok sbʼaja jastal wa skʼulan ja jastik junuki?

•    ¿Jastal oj bʼobʼ skoltayon ja bʼa jsakʼanil ja jas wanto jkʼumani?

 Ja jas oj bʼobʼa kʼuluk: Aʼajyuk juna kʼelsat. Oj bʼobʼa tsʼijbʼuk jun yajtabʼ bʼa oj kʼeʼan skʼumajel ja Biblia yajel makunuk ja «Programa bʼa skʼumajel ja Biblia» ke oja taʼ ja bʼa jsitiotikon bʼa Internet.