Jun kerem sbʼiʼil Will, wa xyala: «Bʼobʼta lajansok jel axwela sbʼaj ja Biblia, pe kechanta jachuk yani mixa naʼa jastal oja kʼumuk».

 ¿Wan maxa kʼana oja naʼ jas oja kʼuluk bʼa oja wabʼ stsamalil skʼumajel ja Biblia? Ja artikulo it oj skoltaya.

•  Asakʼwuk ja loʼilik bʼa Biblia

•  Paklay

•  Ja jas wa spensarane tuk keremtik akʼixuk

 Asakʼwuk ja loʼil yajni wana skʼumajel ja bʼa modoʼik nochani:

1.   Tsaʼa jun loʼil b’a Biblia ke waxa kʼana oja kʼul estudiar. Ojni bʼobʼuk bʼa jun jasunuk ekʼel wa staʼa tiʼal ja Biblia, jun loʼil ja bʼa Evangelioʼik ma skʼumajel loʼilik elel bʼa Biblia wa xtax ja bʼa jw.org.

2.   Kʼuman ja loʼili. Oj bʼobʼa kʼumuk atuchʼil ma jach tsats soka wa pamilya ma jawa wamigoʼiki. Ojni bʼobʼ och june ja maʼ wa xcholo sok jaxa tuk oj bʼobʼ skʼumuke ja loʼil ja bʼa tuk personajeʼiki.

3.   Kʼulan probar junuk ja bʼa modoʼik it:

   •   Kʼulan jun dibujo ja bʼa loʼili ma mas dibujoʼik bʼa wan xcholjel ja bʼa tyempo ja jastal mero ekʼeli. Tsʼijbʼan yaljelik bʼa wan xcholjel ja jas wan ekʼel bʼa kada dibujo.

   •   Kʼulan jun lista. Jun sjejel, yajni waxa kʼuman bʼa jun personaje toj waji, a-syak sbʼaj ja jas skʼulani, ja smodoʼik sok ja slekilalik staʼa.

   •   Akʼotuk ja loʼil jastal jun noticia. Cholo bʼa tuktukil modo sok kʼulan «entrebistar» ja matik wa staʼa tiʼal ja bʼa loʼili sok ja tuk personaje b’a yilaweni ja jastik ekʼi.

   •   Ta june ja bʼa personaje ja bʼa loʼil stsaʼa skʼulajel jun jasunuk mi lekuk, pensaraʼan bʼa jun xchʼakulabʼil tuk lek. Jun sjejel, pensaraʼan ja jas ekʼ sbʼaj ja Pedro, bʼa yala mi snaʼa sbʼaj ja Jesús (Marcos 14:66-72). ¿Jasa bʼobʼta tʼilan oj skʼul ajyi ja Pedro ama yuja tʼenwanel?

   •   Ta jach aya xa wabʼ, tsʼijbʼan ja jasa wan ekʼelabʼaj bʼa wa syaka sbʼajsok jun loʼil elel bʼa Biblia. Chʼika ja sjejelik wa xbʼobʼ nebʼxuk ja bʼa loʼili (Romanos 15:4).

 Ta waxa paklay lek jun loʼil bʼa Biblia ojni bʼobʼa taʼ jastik jel chaʼanyabʼalil. Ay ekʼele june ma chabʼ yaljelik ayiʼojan jastik jel tʼilan.

 Jun sjejel, a-slaj sbʼaj ja Mateo 28:7 soka Marcos 16:7.

•   ¿Jas yuj ja Marcos yala ke ja Jesús ojxta sjeʼ sbʼajsok ja nebʼumanik «sok ja Pedro»?

•  Xcholjel bʼa snajel: Ja Marcos mini ti ajyi; lajansok jani ja Pedro ja maʼ choljiyabʼyuji.

•  Jastik chaʼanyabʼal bʼa Biblia: ¿Jas yuj ojni ajuk kʼulan skʼujol ajyi ja Pedro snajel oj cha iljuk yajkʼachile ekʼele yuja Jesús? (Marcos 14:66-72). ¿Jastal sjeʼa ja Jesús kʼotel jun meran amigo bʼa Pedro? ¿Jastal oj bʼobʼa noch ja sjejel bʼa Jesús ta waxa kʼana oj kʼotan jun lekil amigo?

 Yajni wa xwa sakʼwuk ja loʼilik sok waxa paklay sbʼaja jastik ti chʼikani masni oja wabʼ stsamalil skʼumajel ja Biblia.