Tʼusan mi spetsaniluk ja pamilyaʼiki wa xyaʼawe ordenik. Ordenik bʼa julel saj ja bʼa naʼitsi, ordenik bʼa yajel makunuk ja aparatoʼik, ordenik sbʼaja jastal oja jeʼ jawa modo..., sok jitsan ordenik.

 ¿Jas oj ekʼuk ta mi akʼuʼan ja ordenik jaw? Mini xbʼobʼa tukbʼes ja jasa kʼulani, pe ayni jas oj bʼobʼ akʼuluk bʼa mi oj ipaxuk ja jastik junuki. Ja bʼa artikulo it oj yala wabʼ jas oja kʼuluk.

•  Ja jas mi xbʼobʼa kʼuluki

•  Ja jas mas leki

•  Ja jas wa spensarane tuk keremtik akʼixuk

•   Ta jawa Nanatat mini snaʼawe ja jas akʼulani, bʼobʼta oj koʼan ja bʼa trampa bʼa mi oj wal.

•   Ta snaʼawe ja jas akʼulani, bʼobʼta oj koʼan ja bʼa trampa bʼa oja koltay abʼaj ma yajel smuluk pilan kristyano.

 Mini wa xkaltikona wabʼ lek ja chabʼ rason jawi. ¿Jas yuj? Yujni snakʼjel jastik junuk ma yaljel jastik bʼa skoltajela bʼaj, jaʼita wa skʼulan ja maʼ mito takʼanuki. Jawa nantat oj spensaraʼuke kʼotelato jun yal untik.

 «Slejel abʼal, mini lekuk. Yujni tolabida wa xchijkaji ja smeranili sok mastoni tsats oj ajukawi ja kastigo yuja mi awala wego jawa muli» (Diana).

•   Moka nakʼ ja jasa kʼulan. Ja Biblia wa xyala: «Ja maʼ wa snakʼa ja smuli mini lek oj wajyuja» (Proverbios 28:13). Jawa nantati wani snaʼa mini tojxta oj chʼaka kʼuluk. Ja sjobʼjeli: ¿Oj maʼ awal jawa muli?

   «Jawa nantati masni oj yabʼya stojol ta waxa wala yabʼye ja smeranili. Yajni wa xyilawe waxa wala jaman lek, wa sjipa skʼujole amok sok bʼa mini jas waxa nakʼayile» (Olivia)

•   Kʼana perdon. Ja Biblia wa xyala: «Chʼin xa huaa bajex apetzanilex» (1 Pedro 5:5). Wani skʼana yajela jbʼaj chʼin bʼa yaljel «tixa waʼa perdonexa» sok bʼa mi ocha wal jastik junuk bʼa skoltajel abʼaj.

   «Ja maʼ tolabida wa sleʼa jastal oj skolta sbʼaj jani mi wan skisjel ja conciencia. Wa skʼulan jastik bʼa mi lekuk, sok ja scociencia mixa syajbʼesjiyuj» (Heather).

•   Kisa ja kastigo. Ja Biblia wa xyala: «Maklayik ja tojelali». (Proverbios 8:33) Kisa ja kastigo oj yawi jawa nantati, mok kʼeʼan soke kʼumal sok mok bʼulbʼunan.

   «Yajni mas wala kʼumani, masto wa x-ajiwi kastigo, ta ay jas timjiya, kʼuʼan sok mokxa jel apensaraʼuk ja bʼa jas mixa xbʼobʼa kʼuluki» (Jason).

•   Jeʼayile ojto bʼobʼ sjip skʼujole amok. Ja Biblia wa xyala «tʼilan oja wawex eluk ja poko modoʼal, bʼa jani kʼotel jawa modoʼex ajyi» (Efesios 4:22, TNM). Jeʼayile ja bʼa jastik waxa kʼulan, kʼotelexa june bʼa wanxa spensaraʼan.

   «Ta waxa tsaʼa lek ja jasa oja kʼuluki sok waxa jeʼayi jawa nanatat mixa oja kʼuluk ja jasa mi lek akʼulanta, takal takal ja yeʼnle oj cha sjip skʼujole amok» (Karen).

 JUN RASON: Mok kechan akʼuluk ja jasa wa xkʼanji awiʼi, jeʼa ojto bʼobʼ sjip skʼujole amok. Jun sjejel, yajni la el sok paxyalanel jawa wamigoʼik, alayabʼ jawa nantat ja yajni kumxumaxa ja bʼa wa naji, anima sajto kumxuma. Lajansok wana yaljel yabʼye «Wa xkʼana ojto ajipa kʼujolex mok».