SJOBʼJELIK YIʼOJE JA KEREMTIK AKʼIXUKI

¿Jastal oj bʼobʼ jtoj ja jconciencia?

STSANJEL BʼA

¿Jasa oj slaj ja jconcienciatiki?

Jastal jun GPS (ma jun mapa)
Jastal jun espejo
Jastal jun amigo
Jastal jun jues

Ja smeranili wani slaja sbʼaj xchanil, sok ja bʼa artikulo it oj kiltik jas yuj.

¿Jasunkiluk ja conciencia?

Ja conciencia jach jastal jun kʼumal ja bʼa kojoltik bʼa xyala wabʼ ja jas leki sok ja bʼa jas mi lekuki. Ja Biblia wa sjeʼa ja conciencia jach jastal jun ley tsʼijbʼunubʼal ja «ba scʼujole» (Romanos 2:15). Ta jawa conciencia tojubʼaluk lek, ojni skoltaya bʼa oja pensaraʼuk lek bʼa jun jasunuk a-kʼulanta ma wana spensarajel ojto a-kʼuluk.

Ja conciencia jach jastal jun GPS (ma jun mapa). Wa stojowa ja bʼa lekil bʼeji bʼa mi oj ekabʼaj wokolik.
Ja conciencia jach jastal jun espejo. Wa chiktes jastal mero jawa modo sok ja jastal mero kʼotela.
Ja conciencia jach jastal jun lekil amigo. Wa xyawi lekil rasonik sok wa skoltaya bʼa lek oj wajukawuj. Pe tʼilani oja kise.
Ja conciencia jach jastal jun jues. Wa xya muluk yajni ay jas waxa kʼulan mi lekuk.

Jun conciencia bʼa tojubʼal ojni bʼobʼ skoltaya bʼa oja tsaʼ lek ja jas oja kʼuluki.

Xchʼakulabʼil: Ja conciencia jelni xmakuni bʼa 1) stsajel sok biboʼil ja jas oj kʼulaxuk sok 2) stojbʼesel ja jas mi lekuk akʼuluneji.

¿Jas yuj tʼilan oja jtoj jawa jconciencia?

Ja Biblia wa xyala: ‹A’ayuk juna lekil a-conciencia› (1 Pedro 3:16). Jelni wokol oja kʼuluk ta mi a-tojunejuk.

«Jleʼa yile abʼal ja jnantat ja bʼa wala wajyoni sok mi xkala. Ja kʼeyontʼani mini jel lek xyabʼ ja conciencia, pe yajni ekʼ ja tyempo ja jas wa xkʼulani mixa jeluk malo xkabʼi» (Jennifer).

Kʼot ja sjutsʼinil ja Jennifer skisa ja sconciencia sok yala yabʼ ja snantat ja jas wan skʼulajeli, yujni mixa skʼana oj sleʼ yile mas abʼal.

Pensaran sbʼaja it: ¿Jas sjutsʼinil oj yajbʼesjuk ajyi ja sconciencia ja Jennifer?

«Yijel chabʼ sakʼanil mini pasiluk sok jel xya wokolanukotik. Ta jawa conciencia wa xyaʼakan bʼa oja jkʼul ja jas mi lekuki, masni pasil oja kʼuluk jastik bʼa mi lekuk» (Matthew).

Jujuntik kristyano mini tʼun skisawe ja sconcienciaʼe. «Mi xa ay sqʼuixhuele», jach wa xyala ja Biblia (Efesios 4:19). Ja la Nueva Versión Internacional wa xcholo jachuk: ‹Mixani tʼun xkʼixwiye ja bʼa jastik wa skʼulaneʼi›.

Pensaran ja it: ¿Wan maʼ xwajyujile lek ja kristyano bʼa mini tʼun xyajbʼesjiye yajni wa skʼulane jastik bʼa mi lekuk? ¿Bʼa jas wokolik oj xchʼik sbʼaje?

Xchʼakulabʼil: Bʼa ajyelawuj jun lekil conciencia, tʼilan oja wa makunuk ja snajel bʼa stsajel «ta lek ma mi lekuk» (Hebreos 5:14, Ja yajkʼachil sjuʼunil ja Dyosi, [YD]).

¿Jastal oj bʼobʼa toj jawa conciencia?

Bʼa oja toj jawa conciencia wani skʼana ay jas oja kʼuluk sok yiljel jastal skʼulajel ja jas akʼuluneji. Jujuntik kristyano ja junxta wa snochowe ja bʼa:

spamilyaʼe sok ja skostumbreʼe
tuk keremtik
kristyano jel naʼubʼal sbʼaje

Chomajkil, ja jastik kujlajel ja bʼa Biblia mastoni jel lek. Mini cham xkabʼtik, yujni ja Biblia «Dios ni ya jac scʼujol ja maʼ stzʼijba cani» ja maʼ skʼulanotik sok wani snaʼa ja jas mas lek bʼa keʼntik (2 Timoteo 3:16).

La kiltik jujuntik sjejel.

JA JAS KANEL KUJLAJELI: «Wa xkʼanatikon oj ka‘ jbʼajtikon lek ja bʼa spetzanil ja jas wa xkʼulantikoni» (Hebreos 13:18, YD).

¿Jastal wa xyamakunuk ja bʼa jas kanel kujlajel jawa conciencia yajni waxa leʼa modo oja wa jun trampa bʼa skʼulajel ja examen, slejelyi abʼal jawa nantat ma oj elkʼanan?
Ta jawa conciencia wa snikawa bʼa oja jeʼ lek jawa modo bʼa spetsanil ja jas waxa kʼulani, ¿wan maʼ xa kʼuʼan oj skoltaya ja yan sok ja bʼa tyempo jakumi?

JA JAS KANEL KUJLAJELI: «Jipahuic xa can jun lado ja sleejel ja mulal soc otro» ixuk ma winik (1 Corintios 6:18).

¿Jastal wa xyamakunuk ja bʼa jas kanel kujlajel jawa conciencia yajni aya wiʼoj kʼankʼunel bʼa skʼeljel ixuk winik bʼasan ma stajel abʼaj sok jun ixuk ma winik yajni mito la nupani?
Ta jawa conciencia wa snikawa bʼa mok koʼan mulal sok ixuk ma winik, ¿wan maxa kʼuʼan oj skoltaya ja yan sok ja bʼa tyempo jakumi?

JA JAS KANEL KUJLAJELI: «Sbej que yaj oj cab jbajtic. La jtalna jyaujulal jbajtic. La jcʼul jbajtic perdonar» (Efesios 4:32).

¿Jastal wa xkoltani ja jas kanel kujlajel yajni mi akuerdo ayuka sok jawa wermanoʼik maʼ juna wamigo?
Ta jawa conciencia wa snikawa bʼa oja wa perdon sok snajel syajal, ¿wan maxa kʼuʼan oj skoltaya ja yan sok ja bʼa tyempo jakumi?

JA JAS KANEL KUJLAJELI: Ja Jyoba «wa xyilkʼujolan ja maʼ jel skʼana spekʼjel chikʼi» (Salmo 11:5).

¿Jastal wa xkoltani ja jas kanel kujlajel yajni waxa tsaʼa jas pelikula oja kʼel, programaʼik bʼa telebisyon sok bideojuegoʼik?
Ta jawa conciencia wa snikawa bʼa yajel ekʼ gustoʼil bʼa ay spekʼjel chikʼ, ¿wan maʼ xa kʼuʼan oj skoltaya ja yan sok ja bʼa tyempo jakumi?

JUN JASUNUK MERAN EKʼEL: «Ay kamigoʼik bʼa wa xtajniye sok bideojuegoʼik bʼa ay spekʼjel chikʼ, sok wani xkʼulan ja keʼn. Pe ja jtati yalakabʼ mixa oj tajnukon mas soka tajnelik jaw. Ja yuj kechta wa xkʼulan yajni wala wajyon bʼa snaje ja kamigoʼiki. Pe yajni wala julyon ja bʼa jnaji, mini ja xkala. Ja jtati wa sjobʼoki jas wan ekʼel jbʼaj, sok ja keʼn wa xkalyabʼ mini. Jun kʼakʼu jkʼuman ja Salmo 11:5 sok kʼe kabʼ mini lekuk ja jas wanon skʼulajeli. Kaʼa jbʼaj kuenta bʼa tʼilani oj kakan ja bideojuegoʼik jaw. Sok ja ekʼele it jkʼulani. Yajni yilawe ja jas jkʼulani, june ja bʼa kamigoʼik cha yaʼakan tajnel soka bideojuegoʼik bʼa ay spekʼjel chikʼ» (Jeremy).

Pensaran ja it: ¿Jas tyempo kʼe tojbʼuk ja sconciencia ja Jeremy sok jas sjutsʼinil skisa? ¿jasa waxa nebʼa ja bʼa jas ekʼ sbʼaj ja Jeremy?

Xchʼakulabʼil: Ja conciencia wa xchiktes jastal mero kʼotela sok ja jas mas tʼilan bʼa weʼna. Jaxa wa conciencia, ¿jas wa xyala bʼa weʼna?