Ja testigoʼik b’a Jyoba wa x-ochye reunión chabʼ ekʼele ja semana b’a lugar wa sbʼiʼilan Naʼits bʼa Tsomjelal. ¿Jas wa skʼulane ja tiw? ¿Jastal oj skoltaya wajel ja bʼa reunionik jaw?

•  ¿Jas wa xkʼulaxi bʼa jun Naʼits bʼa Tsomjelal?

•  ¿Jas yuj jelni lek oj wajan?

•  Ja jas wa spensarane tuk keremtik akʼixuk

 Ja Naʼits bʼa Tsomjelal jani mero ja lugar bʼa sjejel wa xyaʼa chapjelal ja Biblia ke jel xmakuni. Ja reunionik wa xkʼulaxi ja tiw oj skoltaya bʼa:

•   Snebʼjel ja smeranil sbʼaja Dyos.

•   Yabʼjel stojol jas wa stojolan ja jas wan ekʼel ja bʼa jtyempotiki.

•   Kʼotel jun lekil kristyano.

•    Stajel meran amigoʼik.

 ¿Wan maʼ xa naʼa ja it? Ja lugarik bʼa wa x-ochye reunión ja testigoʼik b’a Jyoba wa sbʼiʼilan Naʼits bʼa Tsomjelal, yujni ja jas mas wa staʼa tiʼal ja tiw jani ja sGobyerno ja Dyos (Mateo 6:9, 10; 24:14; Lucas 4:43).

 Ja jas wa xpaklaxi ja tiw ojni skoltaya. Ja rasonik bʼa Biblia wa xpaklaxi ja bʼa sreunione ja testigoʼik b’a Jyoba, ojni skoltaya bʼa ajyelawuj biboʼil (Proverbios 4:5). Ja it wa xkʼan yal ke ja rasonik bʼa Biblia ojni bʼobʼ skoltaya bʼa oja tsaʼ lek ja jas oja kʼuluki. Cha wani xyaʼa sjakʼjel jujuntik sjobʼjel jel tʼilan jastal ja:

•   ¿Jasa stojolil yiʼoj ja sakʼanil?

•   ¿Yeʼn maʼ smul ja Dyos ja wokoli?

•   ¿Ayto ma’ jas wa xkan sak’an yajni wa xcham june?

 Jujuntik ja bʼa yolomajel ja loʼilik wa x-aji ekʼuk ja bʼa reunión bʼa xchʼakulabʼil ja semana, jani it:

•   ¿Jas yuj oj katikan a-stojotik ja jastik kujlajel ja bʼa Biblia?

•   ¿Bʼa oj jleʼ jkoltajeltik ja bʼa tyempoʼik bʼa wokol?

•   ¿Jasa wan skʼulajel ja sGobyerno ja Dyos bʼa keʼntik?

 «Jun jmok bʼa eskuela jak bʼa jun reunión. Kulanisok ja jpamilya sok lajan jkʼelatikon ja libro. Tsaʼan, yalakabʼ ke jel skʼulunej gusto ja skometarioʼe wa xyaʼawe ja kristyano yajni wa x-axi sjobʼjeliki. Cha yala ke ja bʼa yiglesia mini ayiʼoje yamkʼabʼalik bʼa spaklajel jastalni ay kiʼojtik ja keʼntiki» (Brenda).

 ¿Wan maʼ xa naʼa ja it? Ochel ja bʼa Naʼits bʼa Tsomjelal kʼebʼubʼalni sok mini xkʼanxi stsʼakol.

 Ja matik oja naʼ sbʼaj ja tiw ojni stsatsankʼujoluka. Ja Biblia wa xyala ke june ja bʼa rasonik wa skʼulane reunión ja Testigoʼiki, jani bʼa stsatsankʼujolajel sbʼaje (Hebreos 10:24, 25). Ja bʼa luʼumkʼinal it yeʼnta jel sleʼa slekil, yajel ekʼ tyempo soka matik wa skisawe bʼa Dyos jelni stsatsankʼujolani.

 «Ja wa x-och ja kʼakʼu, ay ekʼele jel tristeʼayon sok yajtikon, pe ja matik wa xwaj ja bʼa Naʼits bʼa Tsomjelal jelni xyawe gustoʼaxukon. Yajni wa xchʼak ja reunión wala kumxiyon ja bʼa jnaji, jelni gusto wala ajyiyon sok wa xkabʼ chapan ayon ja bʼa pilan kʼakʼu» (Elisa).

 ¿Wan maʼ xa naʼa ja it? Bʼa yibʼanal ja luʼum ay mas ja 120.000 kongregasyon bʼa testigoʼik bʼa Jyoba sok mas ja 60.000 lugar bʼa wa x-ajyi ja reunioni. Kada jabʼil, wa xtojbʼi junuk 1.500 Naʼits bʼa Tsomjelal yuja wan jitsanbʼel ja kristyano wa xwajye ja bʼa reunión. a