•  ¿Jas tikʼe kristyano kʼotela?

•  ¿Jas yuj jel tʼilan?

•  Ja jas oj bʼobʼ akʼuluk

•  ¿Wan maʼ maxa kʼana oja naʼ mas?

•  Ja jas wa spensarane tuk keremtik akʼixuk

•   Ja maʼ mi xchʼayuj ja smajlajel

   «Wa xleʼa modo bʼa gusto lek oj ajyukon sok tsamal oj jeʼ ja jmodo. ¿Ay maʼ smaloʼil ja tsetsunel tolabida?» (Valerie).

•   Ja maʼ wa xchʼayuj ja smajlajel

   «Yajni jun jasunuk lek wa x-elkʼot, jato bʼajtan wa xpensaraʼan mini lekuk ma jelni leka pe mini meranuk» (Rebeca).

•   Yiljel ja jastalni stojol

   «Ta mi xchʼayawuj ja smajlajel, tolabida mi jach wa x-elkʼot ja jastal waxa majlay. Ta wa chʼayawuj ja smajlajeli, wala chʼinajbʼi. Yiljel ja jastalni stojol, wa skoltayon yiljel ja jastik junuki ja jastalni mero wan ekʼel» (Ana).

 Ja Biblia wa xyala ja maʼ ayiʼoj jun kʼujolal bʼa gusto «tolabida tey bʼa jun kʼin» (Proverbios 15:15). Chikani lek ja kristyanoʼik bʼa wa sleʼawe modo mi ja oj waj skʼujole ja pensarik mi xtulwani masni lek sok gusto wa x-ajyi. Chomajkil, tolabida mas wa x-ajyi yamigoʼe. Pes ¿maʼ wa skʼulan gusto ajyelsoke ja matik tolabida mi xyilawe ja bʼa jastik leki?

 Anima, ja matik mi xchʼayuj ja smajlajeli tʼilani wa stʼaspune tuktukil wokol. Ja sjejelik it:

•   Ja notisyaʼik bʼa bʼutʼel guerra, terrorismo soka skʼokjel ja ley.

•   Spetsanil ja pamilyaʼik ayiʼoje wokol.

•   Jpetsaniltik wa xkʼulantik luchar yuja jpaltatiki soka jastik wa xya wokolanukotiki.

•   Ja kamigotik ayni ekʼele wa syajbʼesotik.

 Jaʼukto maʼ oj kaltik mi meranuk ja jastik jaw wa x-ekʼi ma jaxta oj waj jkʼujoltik bʼa oj ya tristeʼaxukotik, mas lek ila ja jastalni stojol. Ta waxa wila ja jastalni stojoli, mini oj skʼuluka ganar ja pensarik mi xtulwani sok skʼulajel aceptar ja jastik wa x-ekʼi mini oj ya chʼinajbʼanan.

•   Ila jawa paltaʼik jach mi oj jelxan.

   Ja Biblia wa xyala: «Pes mini ay jun winik toj ja bʼa luʼumi bʼa tolabida wa skʼulan ja bʼa leki sok mi oj koʼ mulal» (Eclesiastés 7:20, Dios habla hoy, 1994). Yuja aya palta sok waxa kʼojchin awok wa stojolan kristyanoʼa, sok mi yuj mixa la makuni.

   Jas oj bʼobʼ skoltaya bʼa yiljel ja jastalni stojol: Leʼa modo mas lek oja kʼuluk, pe moka majlay tolabida lek oj chʼak elkʼot. Jun kerem sbʼiʼil Caleb wa xyala: «Wa xleʼa modo mi jel oj waj jkʼujol ja jas mi lek wa xkʼulani». Cha wa xcholo: «Ja jas wa xkʼulani, wa xkʼujolan bʼa snebʼjel mas sbʼaja jas mi lek jkʼulani».

•   Moka lajabʼaj soka tuki.

   Ja Biblia wa xyaʼa rason mok jtoy jbʼajtik cha mok jniktik ja prebaʼaneli sok ‹mok kilkʼujoluk jbʼajtik› (Gálatas 5:26). Ta waxa wa ekʼ tyempo skʼeljel ja potoʼik ja bʼa lugarik bʼa Internet bʼa loʼilanel ja bʼa kʼinik mi lokjiya, kechantani oj chʼinajbʼanan. Bʼobʼta oja pensaraʼuk jawa lekil awamigoʼik jani mero akontraʼik.

   Jas oj bʼobʼ skoltaya bʼa yiljel ja jastalni stojol: Kʼulan aceptar mini oj chʼak lokjan ja bʼa kʼiniki. Chomajkil, ja jastik wa xyawe kʼeʼuk ja bʼa lugarik bʼa Internet bʼa loʼilanel mini wa xchiktes yibʼanal ja sakʼanil jun kristyano. Jun akʼix sbʼiʼil Alexis wa xyala: «Ja bʼa Internet bʼa loʼilanel kechantani waxa wila ja jastik mas lek bʼa jutsʼin ekʼele ja bʼa sakʼanil june». Cha wa xyala: «Ja kristyanoʼik mini wa xchʼak yawe kʼeʼuk ja jastik wa skʼulane bʼa kada kʼakʼu».

•   Jeʼa mansoʼil, pe masto soka wa pamilya.

   Ja Biblia wa xyala: «Cʼulanic ja janecʼ oj bob ahuujilex ja huenlexi ba oj bob laman oj ajyanic apetzanilex» (Romanos 12:18). Mini oj bʼobʼa kom ja jas wa skʼulan ja tuk, pe ojni bʼobʼ akom ja jas waxa kʼulani. Ajyel mansoʼil tini wa xkan bʼa weʼna.

   Jas oj bʼobʼ skoltaya bʼa yiljel ja jastalni stojol: Kʼujolan bʼa ajyel mansoʼil sok bʼa mi oj kʼiʼuk ja stajkelal jawa pamilya, jastalni oja kʼuluksok chikan maʼ kristyano. Jun akʼix sbʼiʼil Melinda wa xyala: «Mini maʼ toj. Ayni ekʼele wa xkalatik yabʼ jas mi lekuk ja tuk». Cha wa xyala: «Ja jasa tʼilan oj jtsatik skʼulajeli jani ja jas oj jkʼuluktiki, oj jetik mansoʼil ma miyuk».

•   Nebʼa yajel tsʼakatal.

   Ja Biblia wa xyaʼa ja rason it: «Sbej ni oj caatic [...] stzʼacatal» (Colosenses 3:15). Ja yajel tsʼakatal oj skoltaya bʼa ja oj wajuka kʼujol ja jastik lek wa x-ekʼawuji, sok miyuk ja bʼa jastik waxa pensaraʼan mi lek wanuk elel kʼoti.

   Jas oj bʼobʼ skoltaya bʼa yiljel ja jastalni stojol: Meraniʼa wani x-ekʼa bʼaj wokola, pe mok stim-a bʼa mi oja wabʼ stsamalil ja jastik lek wa x-ekʼ ja bʼa wa sakʼanili. Jun akʼix sbʼiʼil Rebeca wa xyala: «Kada kʼakʼu wa xkaʼ och jun lista ja bʼa jastik lek ekuji». Cha wa xcholo: «Jelni xkʼulan gusto yajel juljkʼujol, bʼa spetsanil, jelni jitsan jastik bʼa lek bʼa spensarajel».

•   Ila jastal kʼotele ja wamigoʼiki.

   Ja Biblia wa xyala ja matik «jel piero ja smodo» wa sjomo ja jastik lek wa xkʼulantiki (1 Corintios 15:33). Ta waxa nochowe kristyanoʼik bʼa wa xkʼenaniye, wa xyalawe tajnel loʼilik bʼa wa xyajbʼesni sok chʼinajxta aye, ja oja wi ja smodoʼe.

   Jas oj bʼobʼ skoltaya bʼa yiljel ja jastalni stojol: Yajni wan ekʼel sbʼaje wokolik jawa wamigoʼiki, bʼobʼta ojni abʼaltanuke sok oj spensaraʼuke bʼa jastik mi xtulwani. Koltaye, pe moka wakan ja swokole oj yixtalaʼuka. Jun akʼix sbʼiʼil Michelle wa xyala: ‹Mini lekuk ja wamigoʼik tolabida wa spensaraʼane jastik mi xtulwani›. Cha wa xyala: yajni mas waxa pensaraʼan jastik mi xtulwani mastoni wa x-ipaxi.

 Ja Biblia wa xyala ayotik sakʼan bʼa tyempoʼik jel wokol sok mi oj naxuk jas oj kʼulaxuk (2 Timoteo 3:1). ¿Jel maʼ wokolxa wabʼ spensarajel jastik wa xtulwani ja bʼa luʼumkʼinal bʼutʼel jastik mi lekuk? Ta waxa kʼana oja naʼ mas, kʼuman ja artikulo «¿Jas yuj jel ja wokoli?».