Jun imporme ja b’a departamento bʼa matik wa skʼelawe ja chamelik sok tuk jastik ja b’a Estados Unidos, wa xyala ke tʼusan mi spetsaniluk ja keremtik ak’ixuk b’a 15 sok 19 sjabʼile wa xyalawe ke yixtalaʼunejexa ja swinkile sok ti’al. Ja Sharlene Azam, tsʼijbʼanum ja b’a libro Sexo oral: el nuevo beso de buenas noches (Oral Sex Is the New Goodnight Kiss), wa xyala: «Ta wa ta’ayi ti’al jun soltero sbʼaja yixtalajel ja swinkil june sok ti’al, ojni yalawabʼ jani ja jas mas k’ajyel wa skʼulane ja kristyanoʼiki». Sok cha yala: «Mini skʼuʼane ta meran stajel sbʼajsok june».

•  ¿Jas waxa pensaran ja weʼn?

•  ¿B’ay ja smeranil?

•  ¿Ay ma’ stʼilanil?

 Ayi sjakʼjel ja sjobʼjelik nochani.

1.   ¿Oj maʼ kan embarazada jun akʼix ja yixtalajel ja swinkil sok ti’al?

   1.   Ojo

   2.   Miyuk

2.   ¿Peligro ma’ ja yixtalajel ja swinkil june sok ti’al?

   1.   Jaʼi

   2.   Miyuk

3.   Ja yixtalajel ja swinkil june sok tiʼal, ¿meran maʼ stajel sbʼajsok june?

   1.   Meran

   2.   Miyuk

 A-slaj sbʼaj ja sjakʼjelika wayi soka b’a yibʼeli.

1.   ¿Oj maʼ kan embarazada jun akʼix ja yixtalajel ja swinkil sok ti’al?

    Sjakʼjel: Miyuk. Yuja it jitsan wa xkʼot spensaraʼuke ke ja yixtalajel ja swinkil june sok ti’al mini maloʼuk.

2.   ¿Peligro ma’ ja yixtalajel ja swinkil june sok ti’al?

    Sjakʼjel: Ja’i. Ja oj yixtalajel ja swinkil june sok ti’al ojni bʼobʼ ajyukyuj chamelik jastal ja hepatitis A ma B, verrugas genitales, gonorrea, herpes, sida ma sífilis.

3.   Ja yixtalajel ja swinkil june sok tiʼal, ¿meran maʼ stajel sbʼajsok june?

    Sjakʼjel: Meran. Spetsanil ja jas wa xkʼulaxi b’a yixtalajel ja swinkil june merani lek stajel sbʼajsok june, b’a ti chʼikan ja stajel sbʼajsok june, ja yixtalajel ja swinkil jun ixuk ma winik sok ti’al ma ja yixtalajelyi ja swinkil pilan kristyano sok kʼabʼal.

 La kiltik ja jas wa xyala ja Biblia sbʼaja yixtalajel ja swinkil june sok ti’al.

 Ja Biblia wa xyala: «Ja jas wa skʼana ja Dyosi [...] ke oja talnabʼajex sbʼaja koʼel mulal sok ixuk winik» (1 Tesalonicenses 4:3).

 Ja b’a Biblia ja yaljel «koʼel mulal sok ixuk winik» jani kʼotel spetsanil ja tikʼe yixtalajel ja swinkil june mito nupaneluk, wa xkʼan alxuk, ja stajel sbʼajsok june, ja yixtalajel ja swinkil jun ixuk ma winik sok ti’al sok ja yixtalajelyi ja swinkil pilan kristyano sok kʼabʼal. Ja ma’ wa xkoʼ mulal sok ixuk winik jelni oj yil ja swokolili; sok ojni sjom ja jastal wa xyila sbʼajsok ja Dyosi (1 Pedro 3:12).

 Ja Biblia wa xyala: «Ja maʼ wa xkoʼ mulal sok ixuk winik jani mero wan sjomjel ja skuerpo» (1 Corintios 6:18).

 Ja yixtalajel ja swinkil june sok ti’al wani xbʼobʼ sjom ja jsakʼaniltik sok ja jastal wa xkila jbʼajtik soka Dyosi. Sok cha wani xbʼobʼ sjom ja jastal wa ay xkabʼtiki. Ja libro Cómo hablar de sexo con los adolescentes para que te escuchen, wa xyala: «Ja oja wabʼ ixtalanubʼala, ja oja naʼ malaya sok ja oj chamukakʼujol mini jaʼukta wa x-ajyi ja yajni oja taʼa bʼajsok june. B’a spetsanil ja jastik mi lek oja wabʼ tsaʼan ja b’a stajela bʼajsok june cha jachni oja wabʼ yajni xkʼulaxi b’a chikan jas stajel sbʼajsok june b’a mi stojoluk. B’a chikan jas stajel sbʼajsok june wani xyiʼajan ja wokolik it».

 Ja Biblia wa xyala: «Keʼnon ja Jyoba wa Dyosi, ja Maʼ wa sjeʼawi bʼa wa lekilal weʼna» (Isaías 48:17).

 ¿Wan maxa k’u’an ke ja sleyik ja Dyos sbʼaja yixtalajel ja swinkil june sok ti’al kʼotel b’a wa lekilal? ¿Ma’ waxa pensaraʼan wa sjapawi ja libre’ila wi’oj? Pensaraʼan b’a jun karretera jel ja karro sok ay senyaʼik b’a wa sjeʼa janekʼ oj bʼobʼ ajnuk ja karro sok b’a oj wa kʼot tekʼan. ¿Oj ma’ awal ke ja senyaʼik it wa sjapawi ja libre’il ma wa skoltaya? ¿Jas oj ekʼuk ta ja weʼn soka tuk mixa kisawex?

 Jachni junxta wa x-ekʼ soka jastik yaʼunej kujlajuk ja Dyos. Ta mixa kisa ojni awil ja swokolili (Gálatas 6:7). Ja libro Sexo inteligente (Sex Smart), wa xyala: «Yajni mas waxa wakan ja jas waxa kʼuʼani, ja jastik kujlajeli sok waxa kʼulan jastik b’a waxa naʼa mi lekuk masni mixa jel oja kisabʼaj». Pe ta waxa wiʼaj juna sakʼanil jastalni wa xyala ja sleyik ja Dyos, ojni jeʼ meran waxa kisa ja jastik kujlajeli. Sok chomajkil, ojni ajyukawuj juna conciencia laman (1 Pedro 3:16).