¿Wan maʼ xa wila lajansok jawa wuntikil mi skʼujolan ja eskwela, mi skʼulan ja starega sok mini skʼana oj skʼul estudiar? Yuja jaw, ja scalificacion wan ipaxel sok jachuk ja smodo. ¿Jas oj bʼobʼa kʼuluk bʼa skoltajele bʼa oj tojbʼuk ja scalificacioni?

•  Ja jasa tʼilan oja naʼ

•  Ja jas oj bʼobʼa kʼuluk

 Ja tʼenjeli mastoni wa xya ipaxuk. Stʼenjel jawa wuntikili mastoni wa xya cham skʼujol ja bʼa yeskwela sok chomajkil ja bʼa wa najexi. Bʼa mi oj cham skʼujol, bʼobʼta oj sleʼ abʼal, mi oj sjeʼ ja scalificacion, yeʼn oj skʼul pirmar ja sboleta bʼa mi oj sjeyi ja snantat ma mi oj wajuk ja bʼa eskwela. Kechantani oj ipaxuk el.

 Yajelyi regaloʼik ayni mi jel xkoltani. Jun tatal sbʼiʼil Andrew wa xyala: «Bʼa snikjelyi skʼujol ja kakʼixtikoni, wa xkatikonyi regaloʼik yuja lek wa x-el yuj ja scalificacioni, pe yuja jaw, jatani wa xwaj skʼujol. Yajni mi lek wa x-el yuj ja scalificacioni, jani mas wa xtristeʼaxi yuja mi ajiyi ja regalo sok mi jaʼuk yuja mi lek el yuj ja scalificacioni».

 Yajel smuluk ja maestro mini oj koltajuk jawa wuntikil. Jawa wuntikil oj skʼuʼuk mi yajnaluk skʼujolajel bʼa lek oj wajyuj. Cha ojni bʼobʼ ya smuluk pilan ja jas mi lek wa skʼulani sok smajlajel pilan maʼ oj tojbʼesjukyi ja swokoli. Bʼa tʼusanta yaljel, mi oj snebʼ jun jasunuk jel tʼilan ja yajni niwanxa: bʼa yeʼn kajan sbʼaj ja jas wa skʼulani.

 Komo ja jastal aya xa wabʼi. Ta tajkel aya, mini jaʼuk ja styempoʼil bʼa oj loʼilanan sok jawa wuntikil sbʼaja scalificacioni. Jun tatal sbʼiʼil Brett wa xyala: «Ja keʼn soka jcheʼumi masni lek wa xwajkujtikon ja yajni laman ayotikoni sok masni wa xkabʼtikon stojol ja kuntikiltikoni».

 Ila ja jas mero wan ekʼel sbʼaji. Ja mi lek x-el yuj ja scalificacioni bʼobʼta ja yuj ja wa ixtalajiye ja bʼa yeskwela, ja yajni wa xjeltesji pilan eskwela, ja xiwel yuja exameni, ja wokolik bʼa pamilya, ja mi x-och swayeli, mi jel xkoltaji ja yorario sok yuja mi xwaj skʼujol. Moka pensaraʼuk yuj jel jaragan jawa wuntikili.

 Leʼa jun lugar bʼa mi jas oj jomjuk yolom. Kʼulan jun programa bʼa skʼulajel estudiar soka staregaʼik. Leʼa jun lugar bʼa oj bʼobʼ skʼuluk ja starega bʼa mi jas oj jomjuk yolom jastal ja telebisyon sok ja celulari. Pila bʼa xentik yaman ja starega jawa wuntikili bʼa jachuk mi oj axwuk. Ja Hector, jun tatal ti sbʼaj bʼa Alemania, wa xyala: «Ja yajni wa xmojxi oj skʼuluk jun examen, wa xpaklaytikon tʼusan kada kʼakʼu sok mini ja wa xmajlaytikon ja mero yoraxa».

 Nikayi ja skʼujol bʼa oj skʼan snebʼjel. Ta yabʼ stojol jawa wuntikil ja slekilal oj ya eluk ja bʼa eskwela ja wego, masni oj nikjuk skʼulajel estudiar. Jun sjejel, ojni yil ja matemáticaʼiki oj koltajuk yajel makunuk ja takʼini.

 Kʼulan ja it: Koltay jawa wuntikil soka staregaʼik wa x-ajikanyi bʼa eskwela, pe moka kʼulyi weʼna. Ja Andrew wa xyala: «Ja kakʼixtikoni wa smajlay keʼn oj jkʼultikonyi». Jeʼayi jawa wuntikil bʼa oj snebʼ oj skʼuluke yeʼnle ja staregaʼe.