Jawa nupi yala ma skʼulan jun jasun bʼa ya tajkan, sok waxa jeʼa lajansok mi jas wan ekʼel. Pe yajni jawa tatami ma jawa cheʼumi yila mi kulanukawuj, anto kʼe ya jitsan sjobʼjel bʼa oj snaʼ ja jasa wan ekʼeli. Ja jaw, masto aji tajkuk. ¿Jasa oj bʼobʼa kʼuluk ja bʼa ekʼeleʼik jaw bʼa skomjel ja tajkelali?

•  Ja jasa tʼilan oja naʼ

•  Ja jas oj bʼobʼa kʼuluk

•   Ja mi xkomxi ja tajkelali wa xyixtalaʼan jawa kwerpo. Pe ja spaklajel axeli ilxel ja mi xkomxi ja tajkelali wani xjelxi el ja jpresiontik, ja chamelik bʼa kaltsiltik, ja tristeʼil soka chamelik bʼa kojoltik. Ja tajkelali jani cha chʼikan soka mi xbʼobʼ och jwayeltik, ja jitsan chamkʼujolik, ja chamelik bʼa jbʼakteltik soka atake bʼa chijnakʼal. Jelni sbʼej ja jas wa xyala ja Biblia: «¡Aʼelkan jun lado jawa tajkelali!; mok tajkan, yujni ja jaw kechan wa xyiʼajan wokol» (Salmo 37:8, Nueva Traducción Viviente).

•   Skomjel ja tajkelali cha wani x-ixtalani. Skomjel ja tajkelali wa xbʼobʼ slaj jastal jun chamel bʼa ti wa xkʼejan bʼa kojoltik. Jun sjejel, ojni bʼobʼ kʼe awa kʼiʼuk juna modo bʼa chabʼ sat ma oj kʼe abʼaltanan. Sok jun modoʼal jastal jaw bʼobʼta jelxani wokol ajyelsok sok jelni oj yijanawi wokol ja bʼa wa nupanel.

•   Ila ja lekil modoʼik yiʼoj jawa nupi. Tsʼijbʼan oxe modo bʼa jel chaʼanyabʼal xa wila yiʼoj jawa nupi. Bʼa pilan ekʼele yajni la tajki yuj bʼa ay skʼulan, pensaraʼan ja modoʼalik atsʼijbʼani. Ja jaw oj skoltaya bʼa skomjel abʼaj.

   Rason bʼa Biblia: «Jeʼawik waxa waʼawex tsʼakatal» (Colosenses 3:15, TNM).

•    Nebʼa yajel perdon. Ja jas oj bʼobʼa kʼuluki, leʼa modo yiljel ja jastal wa spensaraʼan jawa nupi. Ja jaw oj bʼobʼ skoltaya bʼa yabʼjel syajal, ma ja bʼa jastal wa xyala ja Biblia, yabʼjel stojol ja ‹jastal ay xyabʼ› ja tuk (1 Pedro 3:8). Tsaʼan, jobʼo abʼaj: «¿Meran maʼ ay jas sk’ulanki bʼa jel yaj yabʼjel bʼa mi xbʼobʼ kaʼ perdon?

   Rason bʼa Biblia: «Jelni tsamal ja [...] wa xya ekʼ chaʼan ja jasa mi lek wa xkʼulajiyi» (Proverbios 19:11).

•    Tsamalxta ala ja jastal aya xa wabʼi sok kʼunxta. Kʼumanan bʼa weʼn ita. Jun sjejel, jaʼukto maʼ oja wal «Mini tʼun xa kisawon ja yajni mixa kʼumayon bʼa oja walkabʼ bʼa aya ekʼ», mas lek ala «Jelni xcham jkʼujol ja yajni wa x-och ja kʼakʼu sok mi xnaʼa ta ayxa jas ekʼta abʼaj». Yaljel jach laman wani xbʼobʼ skoltaya bʼa oja kom ja tajkelali.

   Rason bʼa Biblia: «Sbej ni tzamal oj ajyuc ja jloiltica» (Colosenses 4:6).

•    Maklay lek jaʼankʼujol. Yajni xchʼak kʼumanan, aʼakan jawa nup aya ja sjakʼjeli sok moka kʼuts ja sloʼili. Yajni xchʼaki, jobʼoyi ja jas awalata bʼa oja wil ta yabʼ lek stojol. Ja kechan smaklajeli ojni skoltaya skomjel ja tajkelali.

   Rason bʼa Biblia: «Sbej huax maclatic, pero mi sbejuc que oj cʼumanucotic huego huego» (Santiago 1:19).