Chikan jas ekʼele, ja untiki ojni skʼuluke jas mi lekuk sok oj tristeʼaxuke soka jas mi lek x-elkʼoti. ¿Jasa oj bʼobʼa kʼuluk bʼa skoltajele?

•  Ja jasa tʼilan oja naʼ

•  Ja jas oj bʼobʼa kʼuluk

 Mulanumotik ja yuj ojni jkʼojchuk koktik. Ja Biblia wa xyala «mi ni ay june ja maʼ mi huax bob staa smuli» (Santiago 3:2). Ja yal untiki wani xcha skʼojchin yokeʼa. Pe cha ayni jun slekilal: wa xkoltaji ja yal untiki bʼa oj kuchyujile ja wokoli. Ja untiki mi wa xpojkiye soka modoʼal it, tʼilan oj snebʼe sjejel. Jun nanal sbʼiʼil Laura wa xyala: «Ja keʼn soka jtatami kilunejtikon mas lek akuchyujile ja jas malo wa x-ekʼ sbʼaje yuja sjejel lajansok mi jas wan ekʼel sbʼaje. Jachuk mi x-el sganaʼe soka jas malo ekʼel sbʼaje».

 Jitsan yal untik mi snaʼawe jas oj skʼuluke soka jas mi lek x-elkʼotyujileʼi. Jujuntik yal untik mi snebʼawe jasa skʼulajel soka jas malo skʼuluneje yuja tolabida wa xkoltajiyujile yuja snantateʼi. Jun sjejel, ta skʼulane reprobar, ja nantatalik jaʼ wa xyawe smuluk ja smaestroʼe. Ta mi xyiʼaj sbʼaj lek sok jun yamigo, jaʼ wa xyawe smuluk ja yamigo.

 Pe ta jach wa skʼulane, ¿jastal oj snebʼ stalnajel sbʼaje?

•   Jeʼayi jawa wuntikil ja jas malo wa skʼulane ojni ijukjanyile wokolik.

   Ja Biblia wa xyala: «Ja jas wa xtzʼunxi ojni jachʼxuka» (Gálatas 6:7, Ja yajkʼachil sju‘unil ja dyosi).

   Spetsanil ja jas wa xkʼulantik ayni jas wa xyiʼajani, ja jas mi lek wa xkʼulantik wa xyiʼajan wokol sok ojni tupxuk ja jas ekʼeli. Ja untiki lekni wa snebʼawe ja jas wa skʼulane ayni jas oj ijukjanyile, sok a-snaʼe kʼinal cha ayni smule ja yeʼnle yuja jas skʼuluneje. Sok mi slejel smul tuk kristyano ma skoltajel ja yuntikil bʼa mey smule, aʼakan a-sleʼe modo bʼa stojbʼesel ja jas skʼuluneje soka janekʼ sjabʼil yiʼoje. Ayabʼ stojol jawa wuntikil ja swokolil bʼa jun jasunuk tini chʼikan soka jas malo wa xkʼulaxi.

•   Koltay jawa wuntikil bʼa a-sleʼe modo stojbʼesel

   Rason bʼa Biblia: «Yujni ja maʼ toji wa xbʼobʼ mokʼuk juke ekʼele, sok ja yeʼn oj kʼejan pilan ekʼele» (Proverbios 24:16).

   Jelni yaj xa wabʼ ja yajni waxa kʼojchin jawa woki, pe mi ti wa xchʼak tiwi. Koltay jawa wuntikil bʼa a-sleʼe modo stojbʼesel sok mi ja awajuk skʼujol ja jas mi lek kʼulajiyi. Jun sjejel, ta skʼulan reprobar jun examen jawa wuntikili, koltay bʼa ayil ja stʼilanil bʼa skʼulajel estudiar mas sok skʼujolajel ja bʼa pilan ekʼele (Proverbios 20:4). Ta jawa wakʼixi kʼe kʼumal sok jun yamiga, koltay bʼa a-sleʼ ja modo yiljel sbʼaj lek yajkʼachil ekʼele soka yamiga, ama mi yeʼnuk smul ja jas ekʼeli (Romanos 12:18; 2 Timoteo 2:24).

•   Jeʼayi jawa wuntikil bʼa mok jelxuke

   Rason bʼa Biblia: «Moc lom jelxanic ba oja toya bajex que quechan ja huenlex jel nihuan[ex]» (Romanos 12:3).

   Mi jaʼukxta mero lek yaljel yabʼ jawa wuntikil kechanta yeʼn mas jel listo. Pes chomajkil ja matik jel snaʼawe ayni ekʼele wa skʼulane reprobar ja exameni sok ja matik jel snaʼawe bʼa jun tajnel ayni ekʼele wa xchʼaye ja bʼa tajneli. Ja yal untik matik mi xjelxiye soka jas wa snaʼawe masni mi wegoxta wa xkoye luʼum yajni mi x-elkʼot ja jas wane smajlajel.

   Ja Biblia wa xyala ja wokolik wa xbʼobʼ skoltayotik bʼa kuchelkujtik sok ajyel mas tsats (Santiago 1:2-4). Ja yuj, ama jel yaj ja yajni wa sjkʼojchin yoke, koltay jawa wuntikil bʼa ayil-e ja jastalni sbʼeji, bʼa mok jelxuke.

   Jastalni ja tuk jasunuki, sjejelyi jawa wuntikil bʼa akuchyujile ojni yiʼ tyempo sok wa skʼana skʼujolajel. Pe yajni wanexa solteroʼaxel ti oja wil mini lomuka. Ja libro Letting Go With Love and Confidence (Déjelos volar con amor y confianza) wa xyala: «Ja matik wane solteroʼaxel bʼa snaʼawe jas skʼulajel soka wokolik mi jaʼ wa sleʼawe ja bʼej mas pasili sok mas jel xiwela sbʼaji ja yajni jel chamkʼujol aye. Ja wokolik wa xjak sbʼaje bʼa mi wanuke smajlajel wa xkoltajiye bʼa oj yijbʼuke». Chomajkil, mok chʼay jkʼujoltik ja kuchelkujtik ja wokolik wa xkoltani man wa xtaʼa jkʼujoltik.

 Kʼulan ja it: Jeʼa weʼn bʼajtan. Ajuluka kʼujol, ta ja weʼn waxa naʼa ja jas mi wanuka smajlajel ja bʼa wa sakʼanil, jawa wuntikili oj cha snebʼ skʼulajel.