Ja Biblia wa sjeʼa ke ja Dyos mini skʼana oj kokotik ja bʼa «koʼel mulal sok ixuk winik» (1 Tesalonicenses 4:3). Jastalni wa sjeʼa ja Biblia, «ja koʼel mulal sok ixuk winik» tini chʼikan ja xchʼaykʼujolajel ja nupanel, yajni wa staʼa sbʼaj winik sok winik ma ixuk sok ixuk sok yajni wa staʼa sbʼa jun ixuk sok winik bʼa mito nupaneluke.

•  ¿Jas yuj jel tʼilan sbʼaja Dyos ja nupaneli?

•  ¿Stojol ma’ ja lajanxa oj ajyuke bʼajtanto oj nupanuke bʼa oj yil ta oj slaj sbʼaje?

•  ¿Jastal wa xbʼobʼ ajyuk gusto ja nupaneli?

•   Ja Dyosi ya kujlajuk ja nupaneli. Skʼulan yajni ya staʼ sbʼaj ja bʼajtan ixuk sok winik (Génesis 2:22-24). Ja yeʼn mini skʼana ke jun winik sok jun ixuk oj ajyuke lajan ta mi akuerdo ayuke sbʼaja jastik ti chʼikan sbʼaja nupaneli.

•   Ja Dyos wani snaʼa ja jas mas lek bʼa keʼntik. Ja yeʼn skʼulan ja nupaneli bʼa oj ajyuke bʼa tolabida jun winik sok jun ixuk. Ja Dyos wani skʼana ajyi ke ja jasunuk it, oj ya el slekilal sok oj stalnay spetsanil ja pamilya. Pensaraʼan sbʼaja it: bʼa stojbʼesel jun mueble, tʼilani oj jnochjuk ja stojelal ja maʼ skʼuluni. Cha jachni junxta, ta wa xkʼanatik oj ajyuk gusto ja jpamilyatik, tʼilani oj nochtik ja stojelalik ja Dyos. B’a jachuk tolabida oj wajkujtik lek (Isaías 48:17, 18).

•   Stajel sbʼaje jach mito nupaneluke wani xbʼobʼ ya’ niwak wokolik. Jastal, oj kan embarazada yajni mi xchapunejuke, oj tajuke mal chamelik sok wokolik sbʼaja jastal wa xyabʼ aye.

•   Ja Dyosi yaʼunejyi ja kristyanoʼik jun majtanal: jawa xbʼobʼ ajyuk yuntikile ja yajni wa staʼa sbʼaj jun ixuk sok jun winik. Ja jaw juni majtanal jel chaʼanyabʼal. La jpensaraʼuktik ke ja Dyos jelni chaʼanyabʼal xyila ja sakʼanili. Ja yuj wani smajlay ke oj kiltik chaʼanyabʼal ja majtanal jaw sok kechan oj katik makunuk soka maʼ nupanelotiki. Jachuk oj jetik chaʼanyabʼal wa xkilatik ja nupaneli (Hebreos 13:4).

 Bʼa oj bʼobʼ ajyuk jun nupanel bʼa gusto, mini yajnaluk jun «tyempo bʼa prueba» bʼa lajan oj ajyuk ja ixuk sok ja winiki, sok bʼa ojni bʼobʼ spil sbʼaje chikan jas tyempo skʼanawe. Pes, titoni wa stsatsbʼi ja jastal wa xyila sbʼajeʼi yajni xchawanile wa xya’awe skʼapjelalik sok lajan wa x-aʼtijiye bʼa oj stojbʼese ja wokoliki. a Sok jani ja nupaneli ja jas wa xya kʼotuk ja skʼapjelal jaw (Mateo 19:6).

 Mini ay jun nupanel bʼa toj. Pe ojni bʼobʼ ajyuk jun nupanel b’a gusto ta wa x-axi makunuk ja rasonik bʼa Biblia. La kiltik jujuntik ja bʼa it:

•    Aʼawik bʼajtan bʼej ja jas wa xmakuniyuj ja tuk (1 Corintios 7:3-5; Filipenses 2:3, 4).

•    Kʼujolanik bʼa oja yajtabʼajex sok bʼa oja kisabʼajex kada kʼakʼu (Efesios 5:25, 33).

•    Kʼajyanik bʼa oja pensaraʼukex bʼajtanto oj kʼumananik (Proverbios 12:18).

•    Aʼajyuka pasensyaʼex sok wego aʼabʼajik perdon (Colosenses 3:13, 14).