Ja kamigotiki wani xbʼobʼ ya gustoʼaxukotik sok wa xbʼobʼ skoltayotik bʼa oj wajkujtik lek. Ja lekil amigoʼiki wa xkoltaniye bʼa oj jchiktestik ja lekil jmodotiki sok bʼa oj jkʼuluktik ja jas wa xnaʼatiki (Proverbios 27:17).

 Pe ja la Biblia wa xyala ke jelni tʼilan oj tsatik lek ja kamigotiki sok wa xyala kabʼtik ja swokolil oj kitik ta jtsaʼatik kamigotik bʼa mi lekuk (Proverbios 13:20; 1 Corintios 15:33). Wani xbʼobʼ yaʼekan bʼa oj tsatik jastik bʼa mi lekuk ma oj chʼaytik ja lekil jmodotiki.

Ja bʼa artikulo it oj kiltik ja jastik it:

•  ¿Jastal jun lekil amigoʼal?

•  ¿Jas sjejelik bʼa lekil amigoʼik wa xtax ja bʼa Biblia?

•  ¿Wan maʼ xbʼobʼ kamigoʼuktik ja Dyosi?

•  Tekstoʼik bʼa Biblia bʼa wa staʼa tiʼal bʼa amigoʼik

 Ja Biblia wa xyala ke ja lekil amigoʼiki mini kechan jaʼuk yuja jas junxta wa xkʼulantik gusto. Jun sjejel, ja Salmo 119:63 wa xyala: «Kʼotelon yamigoʼe ja matik wa xiwye awuji a sok ja bʼa matik wa skʼuʼane jawa mandariki». Ja tsʼijbʼanum it yala ke stsaʼa yamigoʼik bʼa wa skʼana oj skʼuluke ja jas wa skʼana ja Dyosi sok skʼuʼajel ja smandariki.

 Ja Biblia cha wa staʼa tiʼal modoʼalik bʼa tʼilan oj ajyukyuj jun lekil amigo. Jun sjejel:

•   «Jun mero amigo wa xkʼanwani spetsanil tyempo, sok wa sjeʼa sbʼaj lajansok juna wermano ja yajni wan ekʼel wokoli» (Proverbios 17:17).

•   «Ayni jmojtik bʼa puestoxta aye bʼa yeʼnta oj xchʼaykʼujoluk sbʼaje, pe ay jun kamigotik mas kʼubʼan yuj jun kermanotik» (Proverbios 18:24).

 Ja bersikuloʼik it wa sjeʼakitik ke jun lekil amigo mini xchʼaykʼujolani, yajxta wa x-ilwani, wa sjeʼa lek ja smodo sok jel jaman skʼujol. Jun meran amigo tini oj ajyuk jmoktik ja yajni lek aytik sok ja yajni mi lek aytik. Chomajkil, mini oj xiwuk bʼa oj yalkabʼtik ta ay jas mi lekuk wantik skʼulajel ma ta ay jas mi lekuk oj jtsatik skʼulajel (Proverbios 27:6, 9).

 Ja bʼa Biblia wa xtaʼatik sjejelik bʼa kristyanoʼik bʼa kʼot yamigoʼuk sbʼaje ama mini junukxta kʼotele, ayni tuk skostumbreʼe, sjabʼile ma tikʼe cholal yiʼoje. La kiltik oxe sjejelik:

•   Ja Rut sok ja Noemí. Yuja Rut jani ja yalibʼ ja Noemí, sen mastoni akʼix yuja yeʼn. Chomajkil, tukni ja skostumbreʼi. Pe ama jachuk, jelni lek kʼot yamigaʼuk sbʼaje sok jelni syajtay sbʼaje (Rut 1:16).

•   Ja David sok ja Jonatán. Lajansok, ja Jonatán 30 jabʼil bʼankilal yuja David, pe ja Biblia wa xyala ke «jel mojxi xchikʼel sbʼaje» (1 Samuel 18:1).

•   Ja Jesús sok ja sjekabʼanumik. Ja Jesús ajyiniyuj cholal sbʼaja sjekabʼanumiki yujni yeʼn kʼotel «Maestro» sok «Ajwalal» (Juan 13:13). Ama jachuk, kʼotni yil jastal yamigoʼik. Chomajkil, ja Jesús jelni lek kʼot yil ja matik wa skisawe ja jastik wa sjeʼa. Ja yeʼn yala: «Wa xkalawabʼyex kamigoʼik, yujni kaluneja wabʼyex yibʼanal ja jastik kabʼunej yalunej ja jTati». (Juan 15:14, 15).

 Wan, ja kristyanoʼiki wani xbʼobʼ kamigoʼuktik ja Dyosi. Ja Biblia wa xyala ke «ja Yeʼn jel mojan ay soka matik toj ayi» (Proverbios 3:32). Wa xkʼan kaltik, ja Dyos wani xyamigoʼan ja matik wa skʼujolan bʼa lek oj ajyuk ja sakʼanili sok mi sleʼawe abʼal, sok wa skʼujolane bʼa yajel makunuk ja bʼa sakʼanile ja jas wa xyala. Jun sjejel, ja bʼa Biblia wa xyala ke ja Abrahán, jun winik toj, yamigoʼan ja Dyosi (2 Crónicas 20:7; Isaías 41:8; Santiago 2:23).