Ja Biblia mini xya makunuk ja yaljel sjipjel jun yal alats mito yoraʼuk. Pe jitsan bersikulo wa skoltayotik yabʼjel stojol jastal wa xyila ja Dyos ja sakʼanil ja kristyano, bʼa cha ti chʼikan yajni jun yal alats mito pojkeluk.

 Ja sakʼanili juni majtanal bʼa Dyos (Génesis 9:6; Salmo 36:9). Chomajkil, chikan jas tikʼe sakʼanil jelni chaʼanyabʼalil sbʼaja Dyosi, bʼa tini chʼikan ja sakʼanil jun yal alats yajni tito ay bʼa smatriz ja snani. Ja yuj, yajni ay maʼ gana wa smila jun yal alats mito pojkeluk, wani milwanel.

 Ja ley yayi ja Dyos ja israʼelenyoʼik wa xyala: «Ta jujuntik winik wane tiro sok kʼot syajbʼese jun ixuk embarazada ay sok yuja ja jaw ja ixuki ajyi xa ja yal mito yoraʼuk, pe ja yal alatsi soka nanali kanye sakʼan, ja mulanumi ojni stupa. Ja statam ja ixuki yeʼn oj yal janekʼ oj tupxuk, jaxa mulanumi tʼilan oj stup bʼa stiʼ sat ja jwesiki. Pe ta ay kʼa maʼ chami, anto ja mulanumi tʼilan oj chamuk» (Éxodo 21:22, 23). a

•  ¿Jas tyempo wa xkʼe ajyuk ja sakʼanil jun kristyano?

•  ¿Oj maʼ ya perdon ja Dyos june maʼ sjipunej jun yal alats mito yoraʼuk?

•  ¿Malo maʼ sjipjel jun yal alats mito yoraʼuk yajni xiwela sbʼaj ay ja sakʼanil ja nanal ma ja yal alatsi?

 Sbʼaja Dyosi, ja sakʼanili wa xkʼe ajyuk yajni wa xkan embarazada jun ixuk. Ja bʼa Yabʼali, ja Biblia, ja Dyos tolabida ja wan yaljel sbʼaja yal alats mito pojkeluk bʼa tuktuni lek. La kiltik jujuntik sjejel, bʼa wa xchiktes ke ja Dyos mini ay stukil wa xyila ja sakʼanil jun yal alats yajni tito ay bʼa smatriz ja snani sok bʼa june pojkelto.

•   Bʼa jani aji ekʼi yuja Dyos, ja rey David yala yabʼ ja Dyosi: «Jawa sati kʼotni yil ja yal jkuerpo mito tsʼikanuki» (Salmo 139:16). Ja yuj, ja Dyos yila ja David junxani kristyano bʼajtanto yuj oj pojkuk.

•   La kiltik pilan sjejel. Ja Dyos ayxani yiʼoj jun cholal jel chaʼanyabʼalil sbʼaja aluman Jeremías bʼajtanto yuj oj pojkuk. Ja Dyos yala yabʼ: «Bʼajtanto yuj oj kʼuluka ja bʼa smatriz jawa nani, wanxa xnaʼa abʼaj, sok bʼajtanto yuj oj pojkan ka sakbʼan. Ka kʼotan aluman sbʼaja chonabʼiki» (Jeremías 1:5).

•   Ja Lucas, jun tsʼijbʼanum bʼa Biblia bʼa cha kʼotel jun loktor, ya makunuk ja junxta yaljel bʼa griego bʼa jani wan yaljel sbʼaj jun yal alats mito pojkeluk ma june pojkelto (Lucas 1:41; 2:12, 16).

 Ojniʼa. Ja Dyos ojni ya perdon ja matik sjipunej jun yal alats mito yoraʼuk. Ta wa xkʼajyiye yiljel jastal wa xyila ja Dyos ja sakʼanili, mini ay jun rason oj yabʼye mulal ayeʼi. Ja Biblia wa xyala: «Jyoba jel ja syajulal skʼujoli sok jel lek ja skʼujoli [...]. Jastal ja snajtil wa xyiʼaj sbʼaj ja bʼa wa x-elkʼen ja Kʼaʼuji sok ja bʼa wa xmukxiʼi, jach najat lek yaʼunej kan ja jmultik ja Dyosi» (Salmo 103:8-12). b Ja Jyoba ojni ya perdon ja maʼ meran wa sutxi skʼujol ja bʼa mulalik skʼulunej ja bʼa tyempo ekʼta, bʼa tini chʼikan ja sjipjel jun yal alats mito yoraʼuk (Salmo 86:5).

 Yiljel ja jas wa xyala ja Biblia sbʼaja sakʼanil jun yal alats mito pojkeluk, ma sjipjel jun yal alats mito yoraʼuk mini stojoluk, ama bʼobʼta xiwela sbʼaj ay ja sakʼanil ja nanali ma ja yal alatsi.

 ¿Sok jasa oj ekʼuk ta ja bʼa jutsʼin wan pojkel tʼilan oj tsaxuk machʼa oj kan sakʼan ta jaʼa nanal ma ja yal alatsi? Ja bʼa ekʼeleʼik jaw, bʼa mi jel kʼajyel wa x-ekʼi, jaʼitani ja matik jun ti chʼikane, tʼilan yeʼnle oj stsaʼe maʼ oj yawekan sakʼan.