Ja Dyosi skʼulan ja bʼajtan winik sok ja bʼajtan ixuki sok tixa ya nupanuke. Ja yeʼn ya kujlajuk ja nupaneli bʼa jachuk oj ajyuke bʼa jun modo chaʼanyabʼal ja winik sok ja ixuki sok makuni jastal skujlayubʼil ja pamilya (Génesis 1:27, 28; 2:18).

 Ja Dyosi wa skʼana ke ja matik nupaneleʼi gusto oj ajyuke (Proverbios 5:18). Ja yuj, ja bʼa Biblia wa xyayi tojelalik sok rasonik bʼa oj koltajuke bʼa lek oj wajyujile ja bʼa nupaneli.

Ja bʼa artikulo it oj kiltik ja jastik it:

•  ¿Jastik rasonik yaʼunej kujlajuk ja Dyos sbʼaja nupaneli?

•  ¿Jastal wa xyila ja Dyos ja spiljel sbʼaje soka skʼutsjel ja nupanel?

•  ¿Tʼilan maʼ oj kʼulxuk registrar ja nupanel bʼa jachuk lek oj yil ja Dyosi?

•  Jastalni wa xyala ja Biblia, ¿jas wa xmajlaxi sbʼaja tatamal soka cheʼumal?

•  ¿Wan maʼ stʼena ja Dyos ja nupanumik bʼa oj ajyuk yuntikile?

•  ¿Wan maʼ xmakuni ja Biblia ja bʼa nupaneli?

•  Tekstoʼik bʼa Biblia bʼa wa staʼa tiʼal ja nupanel

 Ja Dyosi tolabida skʼanunej ke ja bʼa nupaneli, ayiʼ sbʼaj jun winik sok jun ixuk (Génesis 2:24). Ja Dyosi mini lekuk xyila ke jun winik oj sleʼ jitsan xcheʼum, ma jun winik oj yiʼ smoj winikil, ma jun ixuk oj yiʼ smoj ixukil, ma jun winik sok jun ixuk lajan oj ajyuke jach mito nupaneluke (1 Corintios 6:9; 1 Tesalonicenses 4:3). Ja Jesús sjeʼayi ja snochumanik ke tʼilani oj skʼuʼuke ja jas yaʼunej kujlajuk ja Dyos sbʼaja nupaneli (Marcos 10:6-8).

 Bʼa stiʼ sat ja Dyosi ja nupaneli juni jasunuk bʼa tolabida. Yajni jun winik sok jun ixuk wa xnupaniye, wani skʼapa sbʼaje bʼa mi oj xchʼay kʼujoluk sbʼaje sok ajyel lajan ja janekʼ tyempo oj ajyuke sakʼani. Ja Dyosi wani smajlay ke oj yawe kʼotuk ja skʼapjelal jaw (Marcos 10:9).

 Bʼobʼta ayni ekʼele ja tatamal sok ja cheʼumal tʼilani oj yakan sbʼaje bʼa jun tyempo, jun sjejel, yajni june bʼa yeʼnle tʼilan oj waj yil ja spamilya yuj jun jasunuk ekʼel. Pe ja Biblia mini wa xyala ke bʼa oj tojbʼuk ja swokoleʼi tʼilani oj yakan sbʼaje. Pes wani stsatsankʼujolan ja nupaneli bʼa oj yaʼe kʼulan (1 Corintios 7:10).

 Jastalni wa xyala ja Biblia, ja xchʼaykʼujolajel ja nupaneli kechantani jaʼa rason jaw bʼa oj bʼobʼ skʼuts-e ja nupanel (Mateo 19:9). Ja yujil, ta jun nupanum wa skʼana oj sjipkan sbʼaje ma skʼutsjel ja snupanele yuj tuk rason, mini june bʼa yeʼnle libre ay bʼa ay maʼ oj elukesok ma bʼa oj cha nupanuke (Mateo 5:32; 1 Corintios 7:11).

 Ja Dyosi wani smajlay ke ja snochumanik Kristo a-skise ja leyik sbʼaja nupaneli (Tito 3:1). Tʼilani oj skʼuluke ja janekʼ wa xbʼobʼi bʼa jachuk ja nupanumiki oj skʼuluke registar ja snupaneleʼi soka leyi, yajni wa skʼulane wani sjeʼawe ke wa skisawe ja matik ay xcholi, sok jastalni ja Dyosi, wa xyilawe ja snupanele jun jasunuk bʼa tolabida. a

•   Ja jas wa xmajlaxi bʼa xchawanile. Tanto ja tatamal sok ja cheʼumal tʼilani yajxta oj yil sbʼaje sok oj skis sbʼaje (Efesios 5:33). Tʼilani yajxta oj yawe ekʼuk ja kʼankʼunel yiʼojeʼi sok mi oj xchʼay kʼujoluk sbʼaje bʼa chikan jasunuk (1 Corintios 7:3; Hebreos 13:4). Ta ay yuntikile, ayni yiʼoje ja cholal bʼa yajel kʼiʼuk (Proverbios 6:20).

   ¿Jasa oj kʼulaxuk soka aʼtel sok ja jastik junuk oj kʼulaxuk ja bʼa naʼitsi? Ja Biblia mini wa xchiktes lek bʼa jas oj kʼulaxuk sbʼaja it. Kada nupanum yeʼnani oj tsaʼ ja jas mas lek sbʼaja pamilya.

•   Ja jas wa xmajlaxi sbʼaja tatamal. Ja Biblia wa xyala ke ja tatamali yeʼn «kʼotel olomal sbʼaja xcheʼumi» (Efesios 5:23). Ja it wa xkan yal ke yeʼnani oj stoj ja spamilya sok tsajel jastik junuk oj skʼuluke bʼa slekilal ja xcheʼumi sok ja yuntikili.

   Tʼilani oj yil bʼa oj chʼak ajyukyujile ja jastik wa xmakuniyujileʼi, ja bʼa jastal wa xtaxyeʼi, sok ja bʼa jastal wa xtaxye soka Dyos ja spamilya (1 Timoteo 5:8). Yajni lajan wa x-aʼtijiye soka xcheʼumi sok wa xyaʼ tʼabʼan skʼujol ja jas wa spensaraneʼi, ja jastal wa xtaxyeʼi sok ja yajni wa stsaʼawe jun jasunuk, wa sjeʼa ke chaʼanyabʼalil wa xyilawe ja modoʼalik sok ja jastik wa xlajxiyujile skʼulajeli (Proverbios 31:11, 28). Ja Biblia wa xyala ke ja tatamali tʼilani sok yajalkʼujol oj skʼuluk ja xchol yiʼoji (Colosenses 3:19).

•   Ja jas wa xmajlaxi sbʼaja cheʼumali. Ja Biblia wa xyala ke ja cheʼumali «tʼilani oj skis lek ja statami» (Efesios 5:33). Ja Dyosi jelni tsamal xyila ke ja ixukeʼi wa skisawe ja cholal akʼubʼalyile ja statameʼi.

   Wani xmajlaxi ke ja cheʼumaliki a-skoltaye ja statameʼi bʼa oj stsaʼe lek ja jas oj skʼulukeʼi sok a-skis-e ja cholal yiʼoje jastal olomal bʼa pamilya (Génesis 2:18). Ja Biblia jelni tsamal staʼa tiʼal sbʼaja cheʼumal bʼa wa skʼulan ja cholal jel tʼilan yiʼoj ja bʼa nupaneli (Proverbios 31:10).

 Miyuk. Ama ja bʼa tyempo najate, ja Dyosi yala yabʼ jujuntik kristyano bʼa ajyuk yuntikile. Pe ja snochumanik Kristo ja bʼa jtyempotiki mini obligado ayuke bʼa oj snoche ja mandar jaw (Génesis 1:28; 9:1). Ja Jesús nunka yala yabʼ ja snochumanik bʼa ajyuk yuntikile sok ja bʼajtan nochumaniki mini yalawe yabʼ ja matik nupanele bʼa tʼilan oj ajyukyujile. Kada nupanum yeʼnani oj yil ta oj ajyuk yuntikil ma miyuk.

 Wan, yujni ja Biblia ayiʼoj rasonik bʼa oj skoltaya bʼa oj kʼe atulyi lek jawa nupaneli, sok bʼa mi jel oj ekabʼaj wokolik sok kuchelawuj.

 Ja Biblia wani xbʼobʼ skoltay jawa nupaneli bʼa oj lajxukawuj ja jastik it.

•   Bʼa sjejel meran yajtanel (1 Corintios 13:4-7; Colosenses 3:14).

•   Bʼa oj kuchukawuj ja jastal kʼotel ja jun (1 Corintios 10:24).

•   Bʼa snajel smaklajel (Santiago 1:19).

•   Bʼa sjejel kiswanel (Romanos 12:10).

•   Bʼa snajel akʼwanel perdon (1 Pedro 4:8).

•   Bʼa ajyel toj (Marcos 10:9).

•   Bʼa ajyela pasensya (Efesios 4:2, 3).

•   Aʼtel lajan (Eclesiastés 4:9).

•   Yajel yijbʼuk mas ja skʼapjel awaʼunejexi (El Cantar de los Cantares 8:7).