Ja bʼa Biblia kechantani jun ekʼele wa staʼa tiʼal ja tatuaje, jaʼa bʼa Levítico 19:28, bʼa wa xyala: «Mok wa ajyuk wa tatuajeʼex». Ja Dyos yayi ja mandar it ja israʼelenyoʼiki, yujni ja yeʼn mi skʼana akʼotuke jastal ja chonabʼik sbesinoʼe bʼa wa xyawe ajyuk bʼa stsʼujmile ja sbʼiʼile ma senyaʼik ja bʼa sdyose (Deuteronomio 14:2). Ama jastal yaʼtijumik Dyos mixa ibʼ kʼabʼal ayotik soka ley yayi ja Dyos ja israʼelenyoʼiki, pe ja rason wa xyaʼa ja bʼa ley it tʼilani oj ilxuk stʼilanil.

¿Lek maʼ oj ya ajyuk statuaje jun yaʼtijum Dyos?

 La jpaklaytik jujuntik tekstoʼik bʼa Biblia bʼa wa skoltayotik yabʼjel stojol.

•   «Ja ixukeʼi tʼilani oj skʼutes sbʼaje toj sok mok jelxuke ja jastal oj xchap sbʼajeʼi sok a-spensaraʼuke lek» (1 Timoteo 2:9). Ja rason it cha wani xkʼot sbʼaje ja winikeʼi. Jun yaʼtijum Dyos tʼilani mok ya kʼixwuk sok mok ya spay ja tuk ja bʼa splanta.

•   Jujuntik wa xyawe ajyuk statuajeʼe bʼa xchiktesel sbʼaje, bʼa ajyel libre, sok bʼa wa sjeʼa yeʼn sbʼaje ja skuerpoʼe. Chomajkil, ja Biblia wa xyalayabʼ ja yaʼtijumik Dyosi: «Oja waʼex jawa kuerpoʼex jastal jun majtanal bʼa sakʼan ay, bʼa sak ay sok bʼa lek xyila ja Dyosi; sok jachuk oj wa makunukex tsʼikan lek jawa pensarex bʼa yaʼteltajel ja Dyosi» (Romanos 12:1). ‹Yajel makunuk tsʼikan lek ja jpensartik› wani xbʼobʼ koltajuk ja matik wa skʼana yajel ajyuk statuajeʼe sbʼaja jas yuj wa skʼanaweʼi. Jun sjejel, bʼobʼta waxa kʼana snochjel jun tikʼe skʼuteselabʼaj ma sjejel ti waxa bʼajin bʼa jun kʼole. Pes sbʼaja jaw jelni lek oja jobʼa bʼaj: «¿Jas oj jkʼuluk ta ja jtatuaje x-ekʼ de moda ma xnaʼa malaya?». Ta june spaklay lek jas yuj wa skʼana, ojni bʼobʼ stsaʼ lek ja jas oj skʼuluki (Proverbios 4:7).

•   «Ja maʼ wa spensaraʼan lek ja jas oj skʼuluki lekni oj wajyuja, pe ja matik wegoxta wa skʼulani ojni ijuk och bʼa mini jas oj ajyukyuj» (Proverbios 21:5). Bʼa jitsan ekʼele, yajel ajyuk juna tatuaje bʼobʼta jani yuja jelxa kʼana. Pe ja maʼ jach wa skʼulani bʼobʼta ojni yil ja swokolil bʼa jitsan tyempo. Ojni bʼobʼ jomjuk ja jastal wa xyila sbʼaj soka tuk ma ja bʼa yaʼteli. Chomajkil, skusjel jun tatuaje jelni chaʼan stsʼakol sok jel yaj. Ilubʼalni bʼa jitsan kristyano snaʼuneje malaya yuja yawe ajyuki. Soka jaw wani xchiktes lek ja jastal jelxa jitsan ja matik wane skusjel ja statuajeʼe.