¿Ti maʼ ay ja Dyos bʼa tuktukil lugar? ¿Chikan maʼ bʼay ekʼa?
Ja sjakʼjel wa xyaʼa ja Biblia
Ja Dyos wani xbʼobʼ yil spetsanil jastik junuk sok yajel makunuk ja yip chikan bʼa wa skʼanaʼa (Proverbios 15:3; Hebreos 4:13). Pe ja Biblia mini wa sjeʼa ke chikan bʼay ekʼa, wa xkʼan alxuk, bʼa tey bʼa spetsanil lugar sok bʼa spetsanil ja jastik junuki. Pes wani sjeʼa ja yeʼn juni ikʼ ason bʼa ayni jun snaj (ma slugar).
Ja jastal kʼotel ja Dyos: Juni kristyano bʼa ikʼ ason ay (Juan 4:24). Ja yuj, mini jun kristyano wa xbʼobʼ yile (Juan 1:18). Ja bʼa nakʼsatalik wa xtax ja bʼa Biblia, wa sjeʼa ke ja Dyos tini wa xtax bʼa jun ita lugar. Mini xyala ke tey bʼa tuktukil parte (Isaías 6:1, 2; Apocalipsis 4:2, 3, 8).
Ja bʼa wa x-ajyi ja Dyos: Ja Dyos tey bʼa satkʼinal, jun lugar bʼa tukni lek yuja jastik wa x-ilxi ja bʼa sutsatkʼinali. Ayni jun «slugar» ja bʼa «satkʼinali» (1 Reyes 8:30). Ja Biblia wa xyala ke bʼa jun ekʼele ja anjelik ochye «bʼa yijel ja xchole ja bʼa stiʼ sat ja Jyoba», a ja it wa sjeʼa tini ay bʼa jun mero lugar (Job 1:6).
Ta ja Dyos mi teyuk bʼa tuktukil lugar, ¿meran maʼ oj bʼobʼ stalnayon ja keʼn?
Meraniʼa. Ama ja yeʼn tey bʼa satkʼinal, ja Dyosi jelni xcham skʼujol ja matik teye bʼa Luʼumi. Wani xyila ja xkʼujolantik bʼa skʼuʼajelyi sok wani skoltayotik (1 Reyes 8:39; 2 Crónicas 16:9). ¿Jastal wa sjeʼa wa xcham skʼujol bʼa keʼntik sok jastal wa stalnayotik?
Ja yajni wa xkatikyi orasyon: Ja Jyoba wani smaklay ja korasyontik yajni wa xkatikyi (2 Crónicas 18:31).
Ja yajni elel jganatik: «Ja Jyoba mojan ay soka matik jel tristeʼay skʼujoli; sok wa xyayi skoltajel ja matik elel sgana» (Salmo 34:18).
Ja yajni wa xmakunikujtik jun rason: Bʼa jani wa xya makunuk ja Biblia, ja Jyoba wa xyakitik biboʼil sok wa stojowotik ja bʼa bʼej tʼilan oj wajtik (Salmo 32:8).
Pensarik mi stojoluk sbʼaja chikan bʼay ekʼ ja Dyos
Ja jasa wa skʼuʼane jujuntik: Ja Dyos tini ay ekʼ bʼa yibʼanal ja skʼulbʼeni.
Ja smeranili: Ja Dyosi mi teyuk bʼa Luʼum cha mini bʼa jun lugar ja bʼa sutsatkʼinal (1 Reyes 8:27). Anima ja Biblia wa xyala ke ja kʼanaliki sok ja tuk yaʼtelik ja skʼabʼ wa stoyowe «ja sniwanil ja Dyos» (Salmo 19:1). Chomajkil, ja jaw mini wa stojolan ja yeʼn tini ay ekʼ skʼulbʼenik, jachni jastal jun kʼuluman dibujo, mini ti wa x-ajyi ekʼ bʼa sdibujoʼik. Meran, jun kuadro bʼa dibujo ojni bʼobʼ xchiktes jastik junuk sbʼaja maʼ skʼulani. Ja yuj cha junxtani, ja yaʼtelik ke wa xbʼobʼ ilxuk ja Dyos wani xchiktes ja «smodoʼik mi x-ilxi» jastal ja yip, ja sbiboʼil sok ja syajal skʼujol (Romanos 1:20).
Ja jasa wa skʼuʼane jujuntik: Ja Dyos mini yeʼnuk ja Maʼ jel ja yipi sok mini xnaxi b’a yibʼanal ta mi teyuk b’a tuktukil lugar.
Ja smeranili: Ja espíritu santo jani ja yip ja Dyos, ja yip b’a ay jas wa xbʼobʼ skʼuluk. Stsʼakatal sok ja ipal it, ja Dyos wani xbʼobʼ snaʼ yibʼanal ja jas wa x-ekʼi, sok wa xbʼobʼ skʼuluk chikan jasunuk b’a chikan jas ora sok bʼa chikan bʼa lugaril, ama mi teyuk ekʼ ja yeʼn (Salmo 139:7).
Ja jasa wa skʼuʼane jujuntik: Ja Salmo 139:8 wa xya jkʼuʼuktik ke ja Dyos mini chikan bʼay ekʼa, yujni wa xyala: «Ta kʼeyon ja bʼa satkʼinal, tini oj ajyan tiw, sok ta wa jijlukon ja bʼa Kʼeʼeni, ja weʼn tini oj ajyan tiw».
Ja smeranili: Ja teksto it mi wa xkʼan yal ke ja Dyos wa xtax bʼa tuktukil lugar, pes wani yaljel ke ja Dyos ojni bʼobʼ skoltayotik ama chikan bʼayotika.
a Ja Biblia wa xyala ja Dyos sbʼiʼil Jyoba.
Bʼobʼta cha ojni akʼul gusto
SJEJELIK JEL TʼILAN BʼA BIBLIA
¿Ay maʼ jun sakʼan Dyos?
Paklay jujuntik prebaʼik bʼa wa sjeʼa ke stojolni skʼuʼajel bʼa Dyos.
SJOBʼJELIK SBʼAJA BIBLIA
¿Jasunkiluk ja espíritu santo?
Ja Biblia wa xya slaj sbʼaj ja espíritu santo soka «skʼabʼik» ja Dyos. ¿Jas yuj?
SBʼAJA KEʼNTIKONI
Kʼana maʼ oj yulataya
Naʼa ja sjakʼjel bʼa jun sjobʼjel bʼa Biblia ma naʼa sbʼaj mas ja testigoʼik bʼa Jyoba.