¿Jastal maʼ ja splanta ja Jesús?
Ja sjakʼjel wa xyaʼa ja Biblia
Mini maʼ snaʼa jastal mero ja splanta ja Jesús, yujni ja Biblia mi xyala. Ja it wani sjeʼa ke ja splanta ja Jesús mini tʼilanuk. Pe ja Biblia wani xchiktes jujuntik jastik bʼa wa xya jnatik jastal waj ja splanta ja Jesús.
Ja jas tikʼe kʼotel: Ja Jesús wajni jun judío sok bʼobʼta jani yiʼaj ja yintil ja snan bʼa kʼotelni judía (Hebreos 7:14). Pes yujni mi xchiknaji lek jas tikʼe waji, sok bʼa jun ekʼele waj bʼa Galilea man Jerusalén sok mini naji sbʼaj (Juan 7:10, 11). Lajansok junxtatikni soka snebʼumanik mas mojan yiʼoji. La ka juljkʼujoltik ja Judas Iscariote sjeʼani machunkiluk ja Jesús yajni jun nole kristyano chapan aye wa syam-e (Mateo 26:47-49).
Stsoʼotsil yolom: Ja Jesús sen mini ya najatbʼuk ja stsoʼotsil yolom yujni ja Biblia wa xyala: «Kʼixwelani sbʼaj ta jun winik najat ja stsoʼotsil yolomi» (1 Corintios 11:14).
Yisim: Ja Jesús ajyi yisim. Ja yeʼn skʼuʼani ja ley yiʼoje ja judíoʼik, bʼa wa stima ja winik ke oj skʼuts ja yisime (Levítico 19:27; Gálatas 4:4). Chomajkil, june ja bʼa jas alubʼalkan ja bʼa swokol ja Jesús cha wani staʼa tiʼal ja yisimi (Isaías 50:6).
Skuerpo: Ja jastik ekʼi ja Jesús wani xchiktes wajni jun winik jel ja yipi. Bʼejyi jitsan kilometroʼik ja bʼa xcholjeli (Mateo 9:35). Chabʼ ekʼele snutsu-el ja bʼa templo ja matik wa xchonbʼaniye, sjutbʼin el ja smesaʼe sok ya eluk ja chanteʼik sok jun stsʼuʼum (Lucas 19:45, 46; Juan 2:14, 15). Jun libro wa xyala: «Spetsanil ja loʼilik bʼa Evangelio wani xchiktes [ke ja Jesús yabʼni stsamalil] jun lekil sakʼanil» (Cyclopedia de M’Clintock y Strong, volumen IV, página 884).
Ja jastal sjeʼa ja sniʼ sati: Ja Jesús yajxta ilwani sok snaʼa syajal ja tuk, ja modoʼalik it xchiktesni lek ja bʼa sniʼ sati (Mateo 11:28, 29). Ja yuj, tuktukil tikʼe kristyano wa sleʼawe ja Jesús bʼa oj ajuk kulan skʼujole sok bʼa oj koltajuke (Lucas 5:12, 13; 7:37, 38). Asta ja yal untiki jel sgustoʼe wa x-ajyiye ja bʼa stsʼeʼeli (Mateo 19:13-15; Marcos 9:35-37).
Jastik mi stojoluk wa xyalawe sbʼaja splanta ja Jesús
Ja jas wa skʼuʼane jujuntik: Jujuntik kristyano wa spensarane ke ja Jesús tini jakel bʼa rasa kʼikʼ yujni ja libro bʼa Apocalipsis wa xya slaj «ja stsoʼotsil yolomi jastal sakal stsoʼotsil chej» sok ja yoki jastal «ja lekil kobre» (Apocalipsis 1:14, 15).
Ja smeranili: Ja libro bʼa Apocalipsis wani sjeʼa sok «senyaʼik» (Apocalipsis 1:1). Ja wa staʼa tiʼal ja bʼa stsoʼotsil yolom sok ja bʼa yok ja Jesús, tsʼijbʼunubʼalni bʼa jun modo kechanta ay jas wa senyaʼan sok wani xmakuni bʼa yajel slaj jujuntik ja bʼa modoʼalik yiʼoj ja Jesús tsaʼan yajni sakʼwi. Mini jaʼuk wan stajel tiʼal ja bʼa splanta yiʼoj yajni jak ja bʼa luʼumi. Yajni ja Apocalipsis 1:14 wa xyala ke «ja yolom sok ja stsoʼotsil yolomi sakxta jastal sakal stsoʼotsil chej, jastal ja teʼew», jani wan xchiktesel ja yelaw jastik sok mini jaʼuk ja splanta. Ja sakal stsoʼotsil olomal, jani wa senyaʼan ja sbiboʼil ja Jesús yuja jitsan jabʼil ajyel sakʼan (Apocalipsis 3:14). Ja bersikulo it mini slaja sbʼajsok ja splanta ja stsoʼotsil yolom ja Jesús sok ja bʼa splanta ja stsoʼotsil ja cheji jastalni mi xcha slaja sbʼajsok ja teʼewi.
Ja bʼa nakʼsat it wa xyala ke ja yok ja Jesús jachni «jastal ja lekil kobre yajni wan ulbʼel ja bʼa yoj chakal kʼakʼ» (Apocalipsis 1:15). Sok «jaxa sniʼ sati jach jastal yajni xlijpixta ja kʼaʼuji» (Apocalipsis 1:16). Chikani lek ke ja nakʼsati kechanta ay jas wa senyaʼan, yujni mey jun rasa bʼa ay yiʼoj jun yelaw sok stsʼujmil bʼa oj slaj soka jastik it. Ja bʼa bersikuloʼik it jani wan stajel tiʼal bʼa Jesús tsaʼan yajni sakʼwi, yujni tey «bʼa jun ijlabʼ mi maʼ xbʼobʼ mojxuk» (1 Timoteo 6:16).
Ja jas wa skʼuʼane jujuntik: Ja Jesús jel yaʼaw sok mey yip.
Ja smeranili: Ja Jesús mini yaʼawuk, ja yeʼn jel ja yipi sok mi xiwi. Jun sjejel, mini tʼun xiw sjeʼa sbʼajsok jun nole kristyano chapane bʼa jak syam-e (Juan 18:4-8). Jelni seguro ke ja Jesús jelni lek wa xtaxi, yujni ja yaʼtel bʼa karpintero juni aʼtel jel tsats (Marcos 6:3).
Anto, ¿jas yuj skʼana skoltajel ja Jesús bʼa skuchjel ja poste bʼa yijel wokoli? ¿Sok jas yuj yeʼn bʼajtan cham yuja matik aji kʼe sok lokani? (Lucas 23:26; Juan 19:31-33). Bʼajtanto oj ajuk kʼe lokan, ja skuerpo jelxani kʼumbʼel ay. Mini way snajtil ja akwal yuja wan yijel wokoli (Lucas 22:42-44). Ja judíoʼik yixtalane snajtil ja akwali sok ja romanoʼik jachni cha skʼulaneyi yajni el ja kʼakʼu (Mateo 26:67, 68; Juan 19:1-3). Bʼobʼta yuj yibʼanal ja it masni wego aji chamuk.
Ja jas wa skʼuʼane jujuntik: Ja Jesús tolabida triste ay.
Ja smeranili: Ja Jesús snocho tsʼikan lek ja smodoʼik ja sTat bʼa satkʼinali, ja Jyoba, bʼa wa xya sbʼiʼiluk ja Biblia ja «Dyos maʼ jel gustoʼayi» (1 Timoteo 1:11; Juan 14:9). Sok cha sjeʼayi ja tuk jastal oj bʼobʼ ajyuke gusto (Mateo 5:3-9; Lucas 11:28). Ja yuj wani xbʼobʼ kaltik ja bʼa jastik wa xyala ja Jesús wani sjeʼa ja gustoʼili.
Bʼobʼta cha ojni akʼul gusto
ESSENTIAL BIBLE TEACHINGS
¿Jas yuj wa xbʼobʼ jipjkʼujoltik ja Biblia jani ja smeranili?
Jujuntik ixuk winik wax yalawe ja Biblia kechan yiʼoj loiʼilik sok kwentoʼik sok tsibʼuneje ja ixuk winik. Yuj yenuk ja Dyos ja maʼ tsibʼune ja biblia mini oj sla ja jastal jel chaʼanyabʼalil.
SBʼAJA KEʼNTIKONI
Kʼana maʼ oj yulataya
Naʼa ja sjakʼjel bʼa jun sjobʼjel bʼa Biblia ma naʼa sbʼaj mas ja testigoʼik bʼa Jyoba.