Ja Jesús sjeʼa ja orasyon bʼa jtatikon Dyos yujni ja snebʼumaniki skʼanaweyi: «Kajwal, jeʼakitikon yajelyi orasyon» (Lucas 11:1). Ja yuj ja orasyon it wa xmakuni bʼa wa stojowotik bʼa snajel jastik oj jkʼantik sok jastal oj jkʼuluktik. Pe ja orasyon bʼa jtatikon Dyos mini jaʼukta wa smaklay ja Dyosi. a Kechantani jun sjejel ja bʼa tikʼe orasyonik wa xyiʼaj gusto ja Dyosi.

Ja bʼa artikulo it oj kiltik ja jas ti nochani:

•  ¿Jasunkiluk ja orasyon bʼa jtatikon Dyos?

•  ¿Jas wa stojolan ja jas wa x-alxi ja bʼa orasyon bʼa jtatikon Dyos?

•  ¿Tʼilan maʼ kada ekʼele jaʼ oj kal ja orasyon bʼa jtatikon Dyos?

•  ¿Jastal oj kayi orasyon?

•  Tuk orasyonik wa xtax ja bʼa Biblia

 Ja orasyon bʼa jtatikon Dyos ti wa xtax bʼa Mateo 6:9-13. Ja jas wa xyala wa xbʼobʼ tukbʼuk yuja jastal sutubʼal kada Biblia. Oj katik chabʼ sjejel:

 Ja Biblia: ja Yabʼal ja Dyos sbʼaja matik oj ajyuk sakʼan ja bʼa Yajkʼachil Luʼumi: «JTatikon teya bʼa satkʼinal, aʼaxuk sakbʼuk jawa bʼiʼili. Ajakuk jawa Gobyerno. Akʼulaxuk ja jas waxa kʼana ja bʼa luʼumi, jastalni wan kʼulaxel ja bʼa satkʼinali. Akitikon ja jwaʼeltikon ja bʼa kʼakʼu iti, sok aʼa perdon ja jmultikoni jastalni kaʼunejtikon perdon ja matik ay smule jmoktikoni. Mok wa kokotikon luʼum yajni x-aji ochkotikon probari sok aʼelkotikon libre sbʼaja Maʼ jel malo».

 Ja Yajcʼachil Testamento: «Jtaticon Dios ti aya ba satqʼuinali, ja hua biili, mi cualquierauc - jel nihuan juntiro. A jacuc ja tiempo oj ni acʼul mandari. A cʼulajuc ja jastal huaxa cʼana. Ja jastal huaxa cʼulan ja ba satqʼuinali, jach ni a cʼulajuc ja ba luum chomajquili. Ja yaan cʼacʼu aa quiticon ja juaelticoni. Como jcʼulanticon ta perdonar ja maʼ huas scʼulan quiticon malo, cʼulanoticon xa perdonar soc ja jmulticon Cajual. Moc hua cʼulajucoticon ganar soc ja jmulticoni. Pilahuoticon ja ba yoj maloili». b

 Ja jas sjeʼunejkan ja Jesús tolabida akuerdo ay soka jas wa xyala ja Biblia, ja yuj ayni sbʼej ke yeʼn mismo ja Biblia a-skoltayotik bʼa yabʼjel stojolil ja orasyon bʼa jtatikon Dyos.

«JTatikon teya bʼa satkʼinal»

 Yuja yeʼn skʼulanotik sok yaʼa jsakʼaniltik, ja yuj ayni sbʼej ja wa xkatik sbʼiʼiluk «jTatikon» (Isaías 64:8).

«Aʼaxuk sakbʼuk jawa bʼiʼili»

 Ja Dyosi sbʼiʼil Jyoba. Yuja bʼiʼilal it jel sak, tʼilani oj toytik sok oj katik sakbʼuk. Ja it wa xkʼulantik yajni wa xkaltik yabʼ ja tuk sbʼaja smodo yiʼoj ja Dyos sok ja jas wa skʼana (Salmo 83:18; Isaías 6:3).

«Ajakuk jawa Gobyerno»

 Ja sGobyerno ja Dyos juni gobyerno tey bʼa satkʼinal, sok yeʼnani ja Jesús ja sReyi. Ja Jesús sjeʼakankitik bʼa oj jkʼantik ke ja Gobyerno it ayaʼ mandar ja bʼa Luʼumi (Daniel 2:44; Apocalipsis 11:15).

«Akʼulaxuk ja jas waxa kʼana ja bʼa luʼumi, jastalni wan kʼulaxel ja bʼa satkʼinali»

 Ja bʼa satkʼinali meyuk ja bʼa malo sok mi maʼ xchami. Ja Dyosi cha jachni wa skʼana ja bʼa Luʼumi: ke la ajyukotik sakʼan bʼa tolabida jach laman sok mey xiwelal (Salmo 37:11, 29).

«Akitikon ja jwaʼeltikon ja bʼa kʼakʼu iti»

 Tʼilani oj juljkʼujoltik ke ja jKʼulumantiki yeʼnani wa xyaʼa ja jwaʼeltik sok tuk jastik wa xmakunikujtik bʼa oj ajyukotik sakʼan (Hechos 17:24, 25).

«Aʼa perdon ja jmultikoni jastalni kaʼunejtikon perdon ja matik ay smule jmoktikoni»

 Kibʼanaltik wa xleʼa jmultik sok wani xkʼanatik oj ajukotik perdon. Pe ta wa xkʼanatik ayaʼotik perdon ja Dyosi, tʼilani oj katik perdon ja tuki (Mateo 6:14, 15).

«Mok wa kokotikon luʼum yajni x-aji ochkotikon probari sok aʼelkotikon libre sbʼaja Maʼ jel malo»

 Ja Jyoba mini xya ochkotik probar bʼa oj jkʼuluktik ja bʼa mi lekuki (Santiago 1:13). Pe ja Satanás ja Dyablo, ja «Maʼ jel malo», wani xya ochkotik probar; ja yuj cha wani x-aji sbʼiʼiluk ja «Maʼ wa xkʼulwani probari» (1 Juan 5:19; Mateo 4:1-4). Yajni wa xkalatik ja it, wantik skʼanjelyi ja Jyoba ke mok sloʼlayotik ja yajni wa x-aji ochkotik probari sok skʼokjelyi ja yabʼali.

 Ja Jesús wa skʼana ke ja orasyon bʼa jtatikon Dyos amakunuk bʼa sjejel, sok mi jaʼuk oj alxuk kada ekʼele ja junxta yaljelik yiʼoji. Yajni ojxta yal ja orasyon it, ja Jesús yala: «Yajni xa wayi orasyon, moka wal ja junxta yaljelik kada ekʼele» (Mateo 6:7). Sok yani makunuk tuktukil yaljelik yajni bʼa pilan ekʼele sjeʼa jastal yajelyi orasyon (Lucas 11:2-4).

 Ja modo mas lek oj katikyi orasyon jani aʼeluk man jkʼujoltik ja jas oj kaltikyabʼi sok yaljel yabʼ ja jas wa xpensaraʼantik sok ja jastal ayotik xkabʼtiki (Salmo 62:8).

 Ja orasyon bʼa jtatikon Dyos juni lekil sjejel sbʼaja tikʼe orasyonik wa smakla ja Dyosi. Ila jastal tuk tekstoʼik bʼa Biblia wa slaja sbʼaj soka jas wa xyala ja orasyon it.

•   Kechanta oj axukyi orasyon ja Dyosi

   Teksto: «Bʼa chikan jastal wala taxyex, sok orasyonik sok spatjel kʼujolal sok yajel tsʼakatal, awik snaʼ ja Dyos ja jastik waxa kʼanawexi» (Filipenses 4:6).

   Ja stojolil: Yajni wala kʼetik yaljel «jTatikon», ja orasyon it wa sjeʼakitik kechantani oj katikyi orasyon ja Jyoba Dyos, sok miyuk ja Jesús, mini ja María sok mini ja kʼulubʼal dyosiki.

•   Tʼilani skʼanjel jastik junuk bʼa akuerdo ay soka jas wa skʼana ja Dyosi

   Teksto: «Wani xbʼobʼ jkʼantikyi chikan jasa bʼa akuerdo ay soka jas wa skʼana sok jaxa yeʼni wani smaklayotik» (1 Juan 5:14).

   Ja stojolil: Yajni yala «akʼulaxuk ja jas waxa kʼana», ja Jesukristo xchiktes ja stʼilanil yiʼoj ja bʼa jsakʼaniltik ja jas wa skʼana ja Dyosi. Ja yuj, yajni wa xkatikyi orasyon ja Dyosi, wani xtaʼatik tiʼal jastik junuk bʼa akuerdo ay soka jas wa skʼana. Bʼa snajel ja jas wa skʼana ja Dyos sbʼaja Luʼum sok sbʼaja kristyano, tʼilani spaklajel ja Biblia.

•   Wani xbʼobʼ jkʼantik jastik bʼa keʼntik

   Teksto: «Jipa jawa wijkats sbʼaja Jyoba, soka yeʼn ojni skoltaya» (Salmo 55:22).

   Ja stojolil: Yuja Dyos wa xcham skʼujol ja jastik wa xmakunikujtik, ja Jesús staʼa tiʼal ja jastik it ja bʼa orasyon bʼa jtatikon Dyos. Yuja it, wani xbʼobʼ jkʼantikyi ja Dyos ke ayakitik ja jas wa xmakunikujtiki, a-stojotik bʼa stsajel jun jasunuk jel tʼilan, ayakitik ja skoltanel ja bʼa ekʼeleʼik jel wokoli sok ayaʼ perdon ja jmultiki. c