Ja Armagedón jani ja tsaʼanxta tiroʼanel bʼa Dyos soka gobyernoʼik bʼa luʼumi. Ja gobyernoʼik it soka swinikeʼi kontrani aye soka Dyosi, yujni mi skʼanawe aʼajuke mandar (Salmo 2:2). Ja guerra bʼa Armagedón ojni xchʼaysnajel ja sgobyerno ja winiki (Daniel 2:44).

 Ja yaljel Armagedón, bʼa wa xcha tsʼijbʼaxi Har-Magedón, kechantani jun ekʼele wa xtax ja bʼa Biblia. Jaʼitani ja libro bʼa Apocalipsis, ma Revelación. June ja bʼa jas alubʼalkan ja bʼa libro it, wa xyala ke ja «reyik bʼa yibʼanal ja luʼumi» oj stsom sbʼaje «ja bʼa guerra oj ajyuk ja bʼa niwan skʼakʼu ja Dyosi, ja Maʼ kechan jel ja yipi». Ja guerra it tini oj ajyuk «ja bʼa lugar wa sbʼiʼilan Armagedón ja bʼa hebreo» (Apocalipsis 16:14, 16).

 ¿Matik oj tiroʼanuke ja bʼa guerra bʼa Armagedón? Jaʼa soldadoʼik bʼa satkʼinal bʼa tojubʼale yuja Jesukristo, ja matik oj skʼuluke ganar ja skontraʼik ja Dyos (Apocalipsis 19:11-16, 19-21). Ja bʼa matik oj kʼulajuke ganar tini oj ajyuke ja matik wa skʼokowe ja gobyerno bʼa satkʼinal sok ja matik mi skisawe ja Dyosi (Ezequiel 39:7).

 ¿Oj maʼ ajyuk ja tiroʼanel bʼa Armagedón bʼa jun ita parte ja bʼa Luʼumi? Miyuk. Ja tiroʼanel bʼa Armagedón ojni ekʼuk bʼa yibʼanal ja luʼumi, mini kechanta oj ajyuk bʼa jun parte (Jeremías 25:32-34; Ezequiel 39:17-20).

 Ja yaljel Armagedón (bʼa hebreo, Har Meghiddóhn) wa stojolan «Wits bʼa Meguidó». Ja Meguidó juni chonabʼ ti wa xtax bʼa sluʼume ja poko chonabʼ Israel. Ja loʼili wa xchiktes ke mojan tiw ajyi tiroʼanelik. Ja Biblia wa staʼa tiʼal jujuntik ja bʼa it (Jueces 5:19, 20; 2 Reyes 9:27; 23:29). Pe ja Armagedón mini ja wa xkʼan yal ja mero lugar bʼay ja poko Meguidó, pes ja tiw mini ay jun wits. Chomajkil, ja slomanil Jezreel, ja bʼay ja Meguidó, mini oj chʼak och yibʼanal ja matik oj tiroʼanuke soka Dyosi. Ja smeranili, ja Armagedón juni jasunuk oj ekʼ bʼa sutanal ja luʼumi sok bʼa yibʼanal ja chonabʼik oj stsom sbʼaje ja bʼa tsaʼanxta tiroʼanel oj ajyukyujile soka sGobyerno ja Dyos.

 ¿Jasa oj ekʼuk ja bʼa guerra bʼa Armagedón? Mini xnaʼatik jastal oj ya makunuk ja yip ja Dyosi, pe wani xkʼuʼantik oj ya makunuk ja junxta yamkʼabʼal yaʼunej makunuk ja bʼa tyempo ekʼta: jastal bʼat, terremotoʼik, bʼutʼ jaʼik, kʼakʼ,ʼ azufre, slijpelalik chawuk sok chamelik (Job 38:22, 23; Ezequiel 38:19, 22; Habacuc 3:10, 11; Zacarías 14:12). Yuja jom olomil oj ajyuki, jujuntik ja skontraʼik ja Dyos yeʼntani oj smil sbʼaje, ama ja tsaʼanxta oj snaʼe yeʼnani ja Dyos ja wan tiroʼanel soka yeʼnle (Ezequiel 38:21, 23; Zacarías 14:13).

 ¿Oj maʼ xchʼak ja luʼumkʼinal ja Armagedón? Ja luʼumi mini oj xchʼak ja Armagedón. Ja Luʼumi kʼulaji bʼa ti oj ajyuk sakʼan bʼa tolabida ja kristyanoʼik (Salmo 37:29; 96:10; Eclesiastés 1:4). Ja yujil, ja Armagedón mini oj kʼot jun chʼakelal bʼa yibʼanal. Ja smeranili, ja Armagedón ojni ya kan sakʼan «jun niwan nole kristyano» bʼa tojik yaʼtijumik ja Dyosi (Apocalipsis 7:9, 14; Salmo 37:34).

 ¿Pe mi maʼ wani sjeʼa ja Biblia ke ja Armagedón oj yijanyi «xchʼakulabʼil» ja luʼumkʼinali? Meran ama jujuntik bersikuloʼik wa xya makunuk ja yaljel luʼumkʼinal bʼa jani wa xkʼan yal ja luʼumi. Pe ja Biblia wa xcha ya makunuk ja yaljel it bʼa wa xkʼan yal jun nole kristyanoʼik kontra aye soka Dyosi (1 Juan 2: 15-17). Jach jastal jaw ja Armagedón oj yijanyi «xchʼakulabʼil» ja luʼumkʼinal it (Mateo 24:3).

 ¿Jas tyempo oj kʼeʼuk ja Armagedón? Yaljel sbʼaj «jun niwan wokol» bʼa jaxani oj xchʼakan ja guerra bʼa Armagedón, ja Jesús yala: «Sbʼaja kʼakʼu jaw sok ja ora jawi, mini maʼ snaʼa, mini ja anjelik bʼa satkʼinali, cha mini ja Uninali; kechani ja Tatali» (Mateo 24:21, 36). Ama jachuk, ja Biblia wani xchiktes ke ja Armagedón, ojni kʼeʼuk ja bʼa tyempo wa xnaji sbʼaj yajni tixa ay ja Jesús, bʼa kʼe stulyi bʼa jabʼil 1914 (Mateo 24:37-39).