Ja mulali jani kʼotel chikan jas skʼulajel, bʼa jas wa xkabʼtik ma wa xpensaraʼantik bʼa kontra wa x-ajyi soka jastik yaʼunej kujlajuk ja Dyosi (1 Juan 3:4; 5:17). Ja Biblia wa xyala ke ja mulali kʼotelni jun jasunuk bʼa mi lekuk ma mi stojoluk ja bʼa stiʼ sat ja Dyosi, ma mi skʼulajel ja jas mi stojoluki (Santiago 4:17).

 Ja bʼa mero kʼumalik tsʼijbʼaxi ja Biblia, ja yaljelik wa sutxi jastal «mulal» wani stojolan mi yajelyi ja bʼa mero. Jun sjejel, ja Biblia wa staʼa tiʼal bʼa jun tsome soldadoʼik ja bʼa poko Israel bʼa jelni snaʼawe tsʼawanel soka onda sok «mini skʼulane payar ja bʼa wa skʼana oj yaweyiʼi». Lekbʼi sutxi ja jastalni mero ja yaljel it, ojni alxuk: «mi sleʼa smule» (Jueces 20:16). Ja yujil, ja slejel mulal jani mi oj jkʼuluktik ja jastik toj yaʼunej kujlajuk ja Dyosi.

 Yuja Dyos yeʼnani ja Kʼulumani, ayni yiʼoj derecho bʼa yajel kujlajuk mandarik sbʼaja kristyano (Apocalipsis 4:11). Sok ja keʼntiki ojni katikyi kuenta yuja jastik wa xkʼulantiki (Romanos 14:12).

¿Oj maʼ bʼobʼkujtik bʼa mi oj leʼ jmultik?

 Miyuk. Pes ja Biblia wa xyala ke ‹kibʼanaltik jleʼunej jmultik sok mi xlajxikujtik sjejel ja tsamal smodoʼik ja Dyosi› (Romanos 3:23; 1 Reyes 8:46; Eclesiastés 7:20; 1 Juan 1:8). ¿Jas yuj jachuki?

 Pes ja bʼajtanto, ja Adán soka Eva mini sleʼa smule, yujni kʼulajiye toj jastal splanta Dyos (Génesis 1:27). Pe mixani jachukuk ajyiye yajni skʼokoweyi ja yabʼal ja sKʼulumaneʼi (Génesis 3:5, 6, 17-19). Yajni ajyi yuntikile yawe ekanyi ja mulal spetsanil ja yintileʼi (Romanos 5:12). Jastalni yala ja rey David: «Sok jpaltaʼil pojkiyon» (Salmo 51:5).

¿Ayma jujuntik mulal masto malo yuja tuk?

 Ayniʼa. Jun sjejel, ja Biblia wa xyala ke ja winike ja bʼa poko Sodoma «jelni maloʼe sok jelxani xjelxi ja smuleʼi» sok ja smuleʼi «jelni chaʼan juntiro» (Génesis 13:13; 18:20). La kiltik oxe modo bʼa jastal wa xchiktes kʼotel jun chaʼan mulal.

1.   Ja smaloʼili. Ja Biblia wa xyala ke ja koʼel mulal sok ixuk winik, ja stoyjel kʼulubʼal dyosik, ja elkʼanel, ja yakbʼel, ja sloʼlajel ja kristyano bʼa yijelkan ja jastik sbʼaji, ja milwanel sok ja aʼtel sok pukuj kʼotelni chaʼan mulalik bʼa mok jkʼuluktik (1 Corintios 6:9-11; Apocalipsis 21:8). Ja Biblia wani xyayi stukil ja mulalik it sok ja tuk bʼa mi ganaʼuk kʼulaxi ma mi xpensaraʼaxi ja yajni wa xkʼulaxi. Jujuntik sjejel, jastal yajni wa xkalatik jun jasunuk bʼa ay maʼ wa syajbʼes (Proverbios 12:18; Efesios 4:31, 32). Pe ja Biblia wani stsatsankʼujolanotik bʼa ojni kiltik kʼotel mulalik, pes ta miyuki ojni bʼobʼ yiʼotik bʼa oj jkʼuluktik chaʼan mulalik (Mateo 5:27, 28).

2.   Jas yuj kʼulaxi. Jujuntik mulalik wani xkʼulaxi yuja mi xnaxi ja smandarik ja Dyosi (Hechos 17:30; 1 Timoteo 1:13). Ama ja Biblia mi akuerdo ayuk soka mulalik jaw, pe wani xkʼot ajyuk stukil soka mulalik bʼa gana wa xkʼulaxi bʼa skʼokjel ja smandarik ja Dyosi (Números 15:30, 31). Ja Biblia wa xyala ke ja kristyano bʼa gana wa skʼulan jun mulal ayni yiʼoj jun «skʼujol bʼa jel malo» (Jeremías 16:12).

3.   Ja stikʼanil. Ja Biblia wani xya ajyuk jun stukil bʼa kechanta jun ekʼele koʼel mulal sok ja jitsan ekʼele koʼel ja junxta mulali (1 Juan 3:4-8). Ja Dyosi wani xyala oj skʼul kastigar ja matik mi xyaʼawekan skʼulajel jun mulal, pes ayni snebʼaweta ja jas toji (Hebreos 10:26, 27).

 Ja kristyanoʼik bʼa skʼuluneje chaʼanik mulal bʼobʼta chamkʼujol ay xyabʼye yuja jastik mi lekuk skʼulunejeʼi. Jun sjejel, ja rey David stsʼijbʼan: «Ja jpaltaʼiki ekʼta bʼa kolom; kʼotelxani jun alal kargaʼal bʼa jelni al bʼa keʼna» (Salmo 38:4). Pe ja Biblia wa xyaʼa ja smajlajel it: «Ayakan ja sbʼej ja winik malo sok ja winik mi lekuk ja spensarik; akumxuk soka Jyoba, bʼa ojni najuk syajulal, akumxuk soka jDyostiki, yujni ja yeʼn ojni akʼwanuk lek perdon» (Isaías 55:7).