¿Jas wa xkʼan yal ja majtanal yaʼa ja Jesús «bʼa yajel el libre jitsan»?

STSANJEL BʼA

Ja sjakʼjel wa xyaʼa ja Biblia

Ja sakʼanil ja Jesús, jani ja jas wa xya makunuk ja Jyoba bʼa oj ya el libre ma oj skoltay ja kristyanoʼik ja bʼa mulal soka bʼa chamelali. Ja Biblia wa xyala ke ja xchikʼel ja Jesús, jani ja stsʼakol tupxi bʼa oj elkotik libre (Efesios 1:7; 1 Pedro 1:18, 19). Ja yujil, ja Jesús yala jakni «bʼa yajel ja sakʼanil jastal slokʼol bʼa yajel el libre jitsan kristyano» (Mateo 20:28).

¿Jas yuj wa xkʼanxi «jun koltanel bʼa yajel el libre jitsan kristyano»?

Ja bʼajtan winik skʼulan ja Dyos, jaʼa Adán, tojni waji sok mini ay smul. Chomajkil ajyiyuj ja cholal bʼa ajyel sakʼan bʼa tolabida, pe xchʼaya yajni stsaʼa skʼokjel ja yabʼal ja Dyosi (Génesis 3:17-19). Ja yuntikil ja Adán ekʼ sbʼaje ja mulali (Romanos 5:12). Sok ja yuj, ja Biblia wa xyala ke ja Adán yeʼnta xchono sbʼaj sok xchono ja yintil bʼa oj kʼotuke mosoʼil sbʼaja mulal sok ja chamelali (Romanos 7:14). Mini maʼ xbʼobʼ ya kumxuk ja jas xchʼaya yuja jpetsaniltik mulanumotiki (Salmo 49:7, 8).

Ja Dyosi snaʼa syajal ja yintil ja Adán, bʼa tini aye bʼa yoj wokol (Juan 3:16). Pe ja yeʼn jelni toj sok mini bʼobʼ ya ekʼ jachta lom ja mulalik sleʼawe ma yajele perdon sok jun rason mey sbʼej (Salmo 89:14; Romanos 3:23-26). Yuja wa syajtay ja kristyanoʼiki, yaʼa ja jas wa xmakuni mi kechan bʼa oj yaʼ perdon ja mulaliki, sbʼajni xchʼayjel snajel (Romanos 5:6-8). Ja jasunuk it yaʼa jani ja sakʼanili.

Ja jas ti chʼikan ja bʼa koltaneli

Ja bʼa Biblia, ja yaljel koltanel tini chʼikan ja oxe jasunuk it:

Jani ja stsʼakol wa xtupxi (Números 3:46, 47).
Sok yuja jaw, ay maʼ wa x-axi eluk libre ma wa xya kumxuk (Éxodo 21:30).
Jani kʼotel chaʼanyabʼalil yuj jun jasunuk wa xtupxi. a

La kiltik jastal wa slaja sbʼaj ja jastik junuk it soka sakʼanil yaʼa ja Jesukristo.

Ja stsʼakol wa xtupxi. Ja Biblia wa xyala ke ja snochumanik ja Kristo ‹jel karo tupjiye› (1 Corintios 6:20; 7:23). Ja stsʼakol jaw jaʼa xchikʼel ja Jesús, bʼa ‹smana sbʼaja Dyos kristyanoʼik bʼa tuktukil kʼole, kʼumal, lugar sok chonabʼ› (Apocalipsis 5:8, 9).
Elel libre. Ja sakʼanil ja Jesús wa xya elkotik libre ja bʼa mulal (1 Corintios 1:30; Colosenses 1:14; Hebreos 9:15).
Ja jastal kʼoteli. Ja sakʼanil yaʼa ja Jesús jastal majtanal, jani junxta kʼotel soka sakʼanil toj xchʼaya ja Adán (1 Corintios 15:21, 22, 45, 46). Ja Biblia wa xyala: «Pes jastalni jitsan kʼotye mulanumik yuja mi kʼuʼabʼal ajyi jun winik [ja Adán] cha jachni jitsan oj kʼotuke toj yuja kʼuʼabʼal ajyi jun winik [Ja Jesukristo]» (Romanos 5:19). Ja it wa xchiktes jas yuja xchamelal jun ita winik wani xmakuni bʼa yajel el libre jitsan mulanumik. Pes ja sakʼanil yaʼa ja Jesús, kʼotelni «jastal slokʼol yuj tuktukil tikʼe kristyano» bʼa wa skʼulane ja jas tʼilani, bʼa oj yawe el slekilal (1 Timoteo 2:5, 6).

a Ja yaljelik elel ja bʼa mero kʼumalik bʼa Biblia bʼa wa sutxi jastal «koltanel», jani wa xchiktes bʼa jun stsʼakol wa xtupxi ma bʼa jun jasunuk wa x-axi yuj slokʼol tuk jasunuk. Jun sjejel, ja yaljel kafár wani stojolan «smusjel» (Génesis 6:14). Wani x-axi makunuk bʼa yaljel bʼa smusjel ja mulaliki (Salmo 65:3). Ja bʼiʼilal ti chʼikan soka yaljel kófer jani wa xkʼan yal ja jas wa xkʼulaxi bʼa oj lajxuk ja jaw, wa xkʼan alxuk, bʼa stupjel ma yajel el libre jun jasunuk (Éxodo 21:30). Cha jachukni ja yaljel bʼa griego lýtron, bʼa kʼajyel bʼa sutxi jastal «koltanel», cha wani xbʼobʼ sutxuk «stsʼakol bʼa koltanel» (Mateo 20:28, The New Testament in Modern Speech, de R. F. Weymouth). Ja tsʼijbʼanumik griego yawe makunuk ja yaljel it bʼa stajel tiʼal sbʼaja stsʼakol wa xtupxi bʼa yajel el libre jun presoʼanum bʼa guerra ma yajel el libre jun mosoʼal.