Waniʼa. Ja Dyos wa xchamskʼujol ja yaʼtijumik bʼa maloʼaye. Sbʼaja yeʼnle, ja Biblia wa skʼapa: «Ja Jyoba oj skoltay ja yajni maloʼay ja bʼa chʼati» (Salmo 41:3). Ta ay kiʼojtik jun chamel bʼa mey yajnal, ja ili oj kiltik oxe modo bʼa oj jnatik jas oj kʼuluktik:

1.   Skʼanjelyi kiptik ja Dyos bʼa oj kuchkujtik. «Jaxa slamanil ja Dyos, bʼa masto ekʼxel lek yuja janekʼ wa xbʼobʼ yabʼ stojol jun kristyano» oj skoltayotik bʼa mi oj chamjkʼujoltik sok oj yakitik ja kiptik bʼa mi oj el jganatik (Filipenses 4:6, 7).

2.   La jetik jun jmodotik bʼa stojol. Ja Biblia wa xyala: «Jun kʼujolal bʼa gustoʼay juni lekil an, pe jun kʼujolal bʼa tʼenan ay wa xchʼaka ja ipali» (Proverbios 17:22). Ja ajyel gusto mini kechan wa xya lamxuk ja tristeʼil, cha wani xkoltani bʼa mi oj kokotik chamel.

3.   Yajel tsatsbʼuk ja smajlajel kiʼojtik. Ja smajlajel wa skoltayotik bʼa ajyel gusto ama wantik yijel wokol yuj jun chamel (Romanos 12:12). Ja Biblia wa skʼapa oj kʼotuk ja kʼakʼu bʼa mixani maʼ oj yal: «Maloʼayon» (Isaías 33:24). Ja Dyos oj xchʼay spetsanil ja chamel bʼa mi xbʼobʼ ya tojbʼuk ja ciencia. Chomajkil, takal takal oj xchʼay ja wokolik wa xyiʼajan ja wala awelaxitiki, pes ja Biblia wa xyala: «Ayaʼawbʼuk ja sbʼakʼteli masto yuja bʼa skeremili, akumxuk ja jastalni mero syawalil ja skuerpo ja bʼa skeremili» (Job 33:25).

 Nota: Ja testigoʼik bʼa Jyoba wa xjipa jkʼujoltikon ja bʼa koltanel wa xyaʼa ja Dyosi, pe cha wani xleʼa jkoltajeltikon bʼa loktor yajni wantikon yijel wokol yuj jun chamel (Marcos 2:17). Pe mini wa xkʼapatikon jun tikʼe an, pes kada jujune tʼilan oj stsaʼ ja jas oj skʼuluki.