Ja kristyanoʼiki mini oj sta’e ja lamanil b’a sutanal ja luʼum kechanta soka yip yeʼnle. Jani yuja it:

•   «Sok mini ja winik wan bʼejyeli wa sbʼajin oj stoj ja sbʼeji» (Jeremías 10:23). Ja winike’i mini kʼulajiye sok ja derecho sok mini ja snajel bʼa skʼulajel sbʼaje mandar yeʼnleʼita. Ja yuj mini xbʼobʼyujile yajel albʼuk ja lamanil.

•   «Moka jipa kʼujolex b’a olomalik sok cha mini b’a jun winik, yujni mi xbʼobʼ yiʼejan koltajel. Wa x-el ja yikʼi, ja yeʼn wa xpax tsʼubʼil luʼum; ja kʼakʼu jaw ti tikʼan wa xchʼak ja spensari» (Salmo 146:3, 4). Ama ja gobyerno’ik wa skʼanawe oj xchʼaye snajel ja jasa wa snika ja guerra, mini oj bʼobʼ yujile.

•   «Ja bʼa tsaʼanikxta kʼakʼu oj jak tyempoʼik jel wokol sok mi pasiluk oj kuchkujtik. Yujni ja kristyano [...] mi yaj oj ilwanuke oj chʼaykʼujolanuke sok mi oj ochuke abʼal, sok jel niwan oj yaʼ sbʼaje juntiro» (2 Timoteo 3:1-4). Teytik b’a ‹tsaʼanikxta sk’ak’u’il› ja luʼumkʼinal it jel malo, juni tʼusan tyempo yuja jel malo smodo ja kristyano mini xbʼobʼ ajyuk ja lamanil.

•   «¡Pobre ja luʼum sok ja mari! Yujni ja Dyablo tajkel lek koʼelkoʼ ja bʼayexi, pes yujni wa snaʼa tʼusanxta tyempo wa xkanyuj» (Apocalipsis 12:12). Ja mero skontra ja Dyos, ja Dyablo, tixa akʼubʼal b’a luʼum sok wa snika ja kristyano b’a oj yij ja smodo jel sleʼa tiro sok mi snaʼ syajulal ja tuk. Yajni yeʼnto «mandaranum ja b’a luʼumkʼinal it» mini oj bʼobʼ ajyuk kujtik lamanil (Juan 12:31).

•   «[Ja sGobyerno ja Dyos] oj swachʼtalaʼuk sok oj xchʼaysnajel spetsanil ja gobyernoʼik jaw [b’a wa skontra’ane ja Dyos] sok kechantani yeʼn oj kan kulan bʼa tolabida» (Daniel 2:44). Jani ja sGobyerno ja Dyos, sok mi jaʼuk ja gobyerno’ik b’a luʼumi ja ma’ oj ya kʼot smeranil ja ajyel kujtik lamanil b’a tolabida (Salmo 145:16).