¿Jastal kʼotel june maʼ lek wa xyila sbʼaj soka Dyosi? ¿Tʼilan maʼ oj ajyukon bʼa jun relijyon bʼa lek oj kil jbʼaj soka Dyosi?

STSANJEL BʼA

Ja sjakʼjel wa xyaʼa ja Biblia

Ja Biblia wa xya makunuk ja yaljel june maʼ lek wa xyila sbʼaj soka Dyosi bʼa xchiktesel ja kʼankʼunel yiʼoj jun kristyano bʼa yajel gustoʼaxuk ja Dyosi sok bʼa spensarajel jastal Dyos. June maʼ lek wa xyila sbʼaj soka Dyosi wa skʼujolan bʼa skʼulajel ja jas yaʼunej kujlajuk ja Dyosi sok bʼa snochjel ja tojelal wa xyaʼa ja yipi a (Romanos 8:5; Efesios 5:1).

Ja Biblia tikʼan wa xya makunuk slajelal bʼa xcholjel jastal kʼotel june maʼ lek wa xyila sbʼaj soka Dyosi. Jun sjejel, june maʼ mi lek wa xyila sbʼaj soka Dyosi, «mini skisa ja jastik bʼa yip ja Dyosi», wa xkʼan alxuk, ja jas wa sjeʼa ja Dyosi (1 Corintios 2:14-16). Ayni stukil ja maʼ lek wa xyila sbʼaj soka Dyosi, pes ja maʼ mi lek wa xyila sbʼaj soka Dyosi, mini jamanuk skʼujole sok mi xyawe ajyuk ja lamanili, jelni wego x-ajyiyujile ‹imbidia sok wa kʼeye tiro› (1 Corintios 3:1-3). Sok ja Biblia wa xya sbʼiʼiluk ja matik wa x-abʼaltaniye sok wa spilawe ja lekil amigoʼiki jachukebʼi «jastal chanteʼik, mi tojubʼaluke yuja yip ja Dyosi» (Judas 19; Proverbios 16:28). b

Ja bʼa artikulo it oj kiltik ja jastik it:

¿Jas yuj wani xbʼobʼ kil jbʼajtik lek soka Dyosi?

Ja yiljel jbʼajtik lek soka Dyosi wani xbʼobʼi, yujni kʼulubʼalotik jastal Yeʼna (Génesis 1:27). Ja yuj mini chamyabʼjeluk ke bʼa jitsan kristyano masni wa xpayjiyeyuj snajel sbʼaja jas mi xbʼobʼ yil-e sok syam-e.

Man wala pojkitik wani xbʼobʼ ajyukujtik modoʼalik jastalni yiʼoj ja Jyoba, c jastal ja lamanili, ja jel yiʼoj yajulal kʼujolal sok ja maʼ mini menos wa xyila (Santiago 3:17). Chomajkil, sok ja yip ja Dyosi, wani skoltay bʼa masto lek oj yil sbʼajsok ja matik wa skʼujolan bʼa skʼuʼajelyi (Hechos 5:32).

¿Jas yuj jelni tʼilan oj kil jbʼajtik lek soka Dyosi?

Yiljel jbʼajtik lek soka Dyosi ojni skoltayotik bʼa stajel ‹sakʼanil sok lamanil› (Romanos 8:6). Ja majtanalik it bʼa Dyosi mini jas oj slaje.

Sakʼanil: Ja Dyosi wa skʼapayi sakʼanil bʼa tolabida ja matik lek wa xyila sbʼajsoki (Juan 17:3; Gálatas 6:8).
Lamanil: Jani wa xkʼan yal ja lamanil soka Dyosi. Ja matik kechan wa xwaj skʼujole ja bʼa jas wa skʼanaweʼi kʼoteleni skontraʼik ja Dyosi (Romanos 8:7). Pe wani xya koʼuk slekilal ja matik lek wa xyila sbʼajsoki yajelyile ja «slamanil ja Dyos, bʼa masto ekʼxel lek yuja janekʼ wa xbʼobʼ yabʼ stojol jun kristyano» (Filipenses 4:6, 7). Ja tikʼe lamanil it wa xkoltajiyeyuj bʼa oj ajyuke gusto (Mateo 5:3).

¿Jastal oj bʼobʼ ka kʼiʼuk ja jastal wa xkila jbʼaj soka Dyosi?

Nebʼa sok kʼuʼan ja jas wa xyala ja Dyosi. Ojni bʼobʼukawuy ta waxa kʼuman ja Biblia, yujni ja it jani yiʼoj ja spensar ja Dyosi bʼa stsʼijbʼane winike ‹bʼa tojiye yuja yip ja Dyosi› (2 Pedro 1:21). Ja jas oja nebʼi oj skoltaya stoyjel ja Dyosi «yuja yipi sok ja jastalni ja smeranili» wa xkʼan alxuk, yajelkan oj stojotik ja yip ja Dyosi sok skʼulajel ja jas wa skʼana (Juan 4:24).
Kʼuman ja Dyos sok kʼanayi akoltajel (Lucas 11:13). Ja Dyosi oj skoltaya bʼa oj ajyukawuj ja modoʼalik yiʼoje ja matik lek wa xyila sbʼajsoki (Gálatas 5:22, 23). Ja Yeʼn oj yawi biboʼil bʼa oj kuchukawuj ja wokolik wa xjak ja bʼa wa sakʼanili (Santiago 1:5).
Aʼekʼ tyempo soka matik lek wa xtaxye soka Dyosi. Ja yeʼnleʼi oj skoltaya bʼa mastoni lek oja wilabʼajsok ja Dyosi (Romanos 1:11, 12). Pe ta aya wamigoʼik bʼa mi spensaraʼane jastal ja Dyosi, ja jaw oj sjom ja jastal waxa wilabʼajsoki (Santiago 4:4).

¿Tʼilan maʼ oj ajyukon bʼa jun relijyon bʼa lek oj kil jbʼaj soka Dyosi?

Yuja ayaxa bʼa jun relijyon mini wa stojolan ke lekxa waxa wilabʼajsoka Dyosi. Ja Biblia wa xyala: «Ta ay maʼ wa spensaraʼan wan stoyjel ja Dyosi pe mi skomo ja yakʼi, jani wan sloʼlajel ja skʼujoli, sok mini tʼun xmakuni ja jastal wan stoyjel ja Dyosi» (Santiago 1:26).

Ama jachuk, ja Biblia wa sjeʼa ke ja matik lek wa xyila sbʼaj soka Dyosi wani stoyowe ja jastalni wa skʼana ja yeʼni. Wa snaʼawe ke chan ay «jun ipal», ja yip ja Dyosi, sok ja ipal jawi wa xkoltajiyeyuj bʼa oj stoye ja Dyosi «jastal jun kuerpoʼal», wa xkʼan alxuk, jun grupo bʼa tsoman ay bʼa wa xya «ajyanik tsoman ja yip ja Dyosi stsʼakatal yuja lamanil wa xya ajyanik tsomani» (Efesios 4:1-4).

Pensarik mi stojoluk bʼa lek oj kil jbʼajtik soka Dyosi

Ja jas wa skʼuʼane jujuntik: Ja lek yiljel jbʼajtik soka Dyosi jani kʼotel chikan jas tikʼe sakʼanil bʼa wa xyabʼ lek wa xtax jun kristyano ma bʼa wa xkoltajiyuj bʼa oj kʼot jun lekil kristyano.

Ja smeranili: Ja Biblia wa xyala ke ja lek oj kil jbʼajtik soka Dyosi jani kʼotel ja tikʼe modoaʼlik bʼa wa xtojiyuj ja spensarik ja Dyosi. Mini jaʼuk wa xkʼan yal jun jasunuk bʼa oj snikotik bʼa oj jtaʼatik ja jgustoʼiltiki sok mi jaʼuk ja jas wa skʼana ja Dyosi. June maʼ lek wa xyila sbʼaj soka Dyosi gustoni wa x-ajyi yuja wa snaʼ ke yeʼn ja Jyoba ja sKʼulumani sok bʼa jachni yiʼoj ja sakʼanil soka jas wa skʼana (Salmo 100:3).

Ja jas wa skʼuʼane jujuntik: Jun kristyano wani xbʼobʼ yil sbʼaj lek sok Dyosi skomjel sbʼaj soka jastik junuk wa skʼulan gusto ma syajbʼesel sbʼaj.

Ja smeranili: Yixtalajel ja kuerpo juni tikʼe ‹stoyjel Dyos› sok jun modo bʼa jach wa spensaraʼan ja kristyano (Colosenses 2:18, 23). Ja Biblia mini wa xya slaj ja yaʼteltajel ja Dyos soka wokol, jani soka gustoʼili (Proverbios 10:22).

Ja jas wa skʼuʼane jujuntik: Chikan maʼ wa xloʼilanisok ja pukuji wani xbʼobʼ yakan ke jun kristyano mas lek oj bʼobʼ yil sbʼaj soka Dyosi.

Ja smeranili: Jitsan kristyano bʼa wa x-aʼtijiye soka pukuji ma tuk modoʼik wa skʼuʼane ke wani xbʼobʼ loʼilanuke soka cham winiki. Pe ja Biblia wa sjeʼa ke ja cham winiki mixatoni jas snaʼawe (Eclesiastés 9:5). Ja yuj, ja matik wa skʼulane ja jastik it, ja smeranil jani wane loʼilanel soka pukujiki bʼa kontrani ay soka Dyosi. Ja aʼtel sok pukuji ma tuk modoʼik wani syajbʼes ja Dyosi sok wani stima jun kristyano bʼa mi lek oj kʼot yil sbʼajsok (Levítico 20:6; Deuteronomio 18:11, 12).

Ja jas wa skʼuʼane jujuntik: Yibʼanal ja jastik sakʼani lekxani wa xyila sbʼaje soka Dyosi.

Ja smeranili: Yibʼanal ja jas skʼulunej ja Dyosi wani xtoyjiyuj (Salmo 145:10; Romanos 1:20). Pe ja Dyosi yaʼunejniyi ja modoʼal jaw ja kristyanoʼiki bʼa jachuk lek oj bʼobʼ yil sbʼaje sok. Pe ja chanteʼiki mini ay spensare sok mi xbʼobʼ yamigoʼuke ja Dyosi. Jatani wa xwaj skʼujole ja jas wa xmakuniyujileʼi (2 Pedro 2:12). Ja yuj, ja Biblia wani xchiktes ke mini lekuk wa xtax soka Dyos yajni june wa sjeʼa ja smodoʼik sok wa skʼulan jastik junuk jastal chante (Santiago 3:15; Judas 19).

a Ja bʼa kʼumalik tsʼijbʼaxi ja Biblia, ja yaljel bʼa wa sutxi jastal ‹ikʼ ason› kechani wa stojolan ja ‹ikʼ wa xkiʼajtik›. Ja tuk stojoliki jani wa xkʼan yal sbʼa jasunuk mi xbʼobʼ kiltik, pe wani xchiknaji yuja jastik ayi. Ja Biblia wa xchiktes ja Dyos jastal ja Maʼ jel juntiro ja yipi. June maʼ lek wa xyila sbʼaj soka Dyosi wani stsaʼa ja jastik wa skʼulani spensarajel ja jas lek wa xyila ja Dyosi sok jani wa xtojiyuj ja yipi.

b Yajni ja Biblia wa staʼ tiʼal bʼa jun kristyano bʼa wa skisa ja jastik junuk bʼa Dyosi sok june miyuk, jani wa xkʼan yal ke ja kristyano jaw wa spensaraʼan sok wa skʼulan ja jastik junuki pe jani yuja jastik wa xkʼankʼuniyuji, bʼobʼta ja bʼa skuerpo, sok mini tʼun stʼilanil xyayi ja jastik yaʼunej kujlajuk ja Dyosi.

c Ja Biblia wa sjeʼa ke ja sbʼiʼil ja Dyosi jaʼa Jyoba (Salmo 83:18).

Jujuntik teksto ja bʼa jastal wa xkila jbʼajtik soka Dyosi

Mateo 5:3: «Jel gusto wa x-ajyiye ja matik tʼabʼan skʼujole bʼa tʼilan oj snebʼ-e sbʼaja Dyosi».

Jas wa stojolan: Bʼa oj ajyukotik gusto jani oj katik kʼiʼuk ja jastal wa xkila jbʼajtik soka Dyosi.

Gálatas 5:22, 23: «Jaxa satinel wa xyaʼa ja yip ja Dyosi jaʼa yajalkʼujol, gustoʼil, lamanil, pasensya, lekil modoʼal, lekil kʼujolal, skʼuʼajel, mansoʼil, skomjel sbʼaj».

Jas wa stojolan: Ja jastal wa xkila jbʼajtik soka Dyos wani xya ajyuk lekil modoʼalik.

Gálatas 6:8: «Ja maʼ wa stsʼunu spensarajel sbʼaja yip ja Dyosi ojni yil sat ja bʼa yip ja Dyos ja sakʼanil bʼa tolabida».

Jas wa stojolan: Ja Dyos oj ya koʼyi slekilal sok sakʼanil bʼa tolabida yibʼanal ja matik lek wa xtaxye soka yeʼni.

2 Timoteo 3:16: «Yibʼanal ja Yabʼal ja Dyosi jani stojunej soka yipi».

Jas wa stojolan: Ja Biblia wa sjeʼa jas wa spensaraʼan ja Dyos sok ayiʼojan ja jas wa xmakunikujtik bʼa oj katik kʼiʼuk ja jastal wa xkila jbʼajtik soka Dyosi.