¿Oj maʼ chʼayjuk snajel ja Luʼumi?

STSANJEL BʼA

Ja sjakʼjel wa xyaʼa ja Biblia

Miyuk. Ja luʼumi mi oj chʼaysnajel, mi oj tsikuk sok mi oj slokʼoluk pilan. Ja Biblia wa sjeʼa ja Dyos skʼulan ja Luʼum bʼa oj ajyuk swinkil bʼa tolabida.

«Ja matik toji oj sbʼajuke ja luʼumi, sok ti tiw oj ajyuke sakʼan bʼa tolabida» (Salmo 37:29).
«Yeʼn yaʼunej kulan ja luʼumi ja bʼa slugari; mini oj ajuk nijkuk ja bʼa slugari, bʼa tolabida» (Salmo 104:5).
«Ja luʼumi tolabida oj ajyuk» (Eclesiastés 1:4).
«Ja Maʼ stojbʼes ja luʼumi ja Kʼuluman, ja Maʼ yaʼakan kʼulan leki, ja yeʼn mi lom ita skʼulan, stojbʼes bʼa oj ajyuk swinkil» (Isaías 45:18).

¿Oj maʼ xchʼak el ja Luʼum ja kristyano?

Ja Dyos mini oj yakan ja kristyano bʼa oj xchʼake el ja Luʼum yuj smul ja jastik wa xya kuxbʼuki, ja guerraʼiki ma yuj tuk jasunuk. Jaʼuktoma, ja Biblia wa xyala oj ‹xchʼay snajel ja matik wane sjomjel ja luʼumi› (Apocalipsis 11:18). ¿Jastal oj skʼuluk?

Ja gobyernoʼik matik mi snaʼawe stalnajel ja Luʼumi, ja Dyos oj ya slokʼolukan sok jun lekil Gobyerno bʼa satkʼinal (Daniel 2:44; Mateo 6:9, 10). Ja Gobyerno it yeʼn oj ya mandar ja Yunin ja Dyos, ja Jesukristo (Isaías 9:6, 7). Yajni ja Jesús ti ajyi bʼa Luʼum, skʼulan milagroʼik bʼa yaljel lamxuk ja mal tyempo (Marcos 4:35-41). Jastal mandaranum ja bʼa sGobyerno ja Dyos, ja Jesús oj sjeʼ ja yip sbʼaja Luʼumi sok oj ya lamxuk ja jastik yiʼoji. Oj skʼul yajkʼachil ekʼele, wa xkʼan alxuk, oj stojbʼes ja Luʼumi bʼa jachuk ja jastal wa xtaxi oj slaj ja jastal ajyi ja bʼa tsamal lugar bʼa Edén (Mateo 19:28; Lucas 23:43).

¿Mi maʼ wani xyala ja Biblia ja Luʼumi oj chʼaysnajel sok kʼakʼ?

Miyuk. Ja it juni pensar mi stojoluk wa x-ajyi yajni mi x-abʼxi stojol ja 2 Pedro 3:7, bʼa wa xyala: «Ja satkʼinal sok ja luʼum tey ja wego pilubʼalexa bʼa oj chʼakuke sok kʼakʼ». La jpaklaytik chabʼ jasunuk jel tʼilan bʼa oj skoltayotik yabʼjel stojol ja yaljelik it:

Ja bʼa Biblia ja yaljelik satkʼinal, luʼum sok kʼakʼ wa xbʼobʼ stojoluk tuktukil jasunuk. Jun sjejel, ja Génesis 11:1 wa xyala: «Spetsanil ja luʼumi junxtatoni ja skʼumale». Ja yaljel, «luʼum» jani wa stojolan ja kristyanoʼiki.
Ja syakulabʼil ja bʼa 2 Pedro 3:7 wa xcholo sbʼaja jas wa stojolan ja «satkʼinal», ja «luʼum», ja «kʼakʼ» wa staʼa tiʼali. Ja bersikulo 5 sok 6 jani wa staʼa tiʼal ja bʼa niwan Bʼutʼ Jaʼ ja bʼa styempo ja Noé. Ja kristyano ja bʼa tyempo jaw chʼayji snajel, pe mi chʼayji snajel ja luʼumi. Ja jas xchʼaya snajel ja niwan Bʼutʼ Jaʼ jaw ja’a kristyano jel maloʼe, wa xkʼan alxuk ja «luʼum» jaw (Génesis 6:11). Cha xchʼaya snajel ja «satkʼinalik» jaw, wa xkʼan alxuk, ja matik wa xyaʼawe mandar ja kristyanoʼik jaw. Ja yuj, ja luʼumi mi chʼayji snajel, jani ja kristyano jel malo. Ja Noé soka spamilya kanyeni sakʼan ja chʼayji snajel ja kristyanoʼik jaw sok cha sbʼutʼuwe ja Luʼum tsaʼan yajni ekʼ ja niwan Bʼutʼ Jaʼ (Génesis 8:15-18).

Jastalni ja jaʼik ja bʼa niwan Bʼutʼ Jaʼ. Ja «kʼakʼ» ma ja chʼakelal wa staʼa tiʼal ja bʼa 2 Pedro 3:7, jani oj xchʼay snajel ja kristyanoʼik bʼa malo sok mi jaʼuk ja luʼumi. Ja Dyos wa skʼapakitik «jun yajkʼachil satkʼinal sok jun yajkʼachil luʼum» bʼa jaxani ti oj «ajyuk ja bʼa toji» (2 Pedro 3:13). Ja «yajkʼachil luʼum» jaw, ma ja yajkʼachil kristyano, ojxa ajyukyujile jun «yajkʼachil satkʼinal», ma jun yajkʼachil gobyerno, bʼa jani ja sGobyerno ja Dyosi. Ja bʼa gobyerno it, ja Luʼumi oj pax jun tsamal lugar bʼa lamanxa (Apocalipsis 21:1-4).