¿Matik oj wajuke ja bʼa satkʼinali?
Ja sjakʼjel wa xyaʼa ja Biblia
Ja Dyos stsaʼunej jun kʼole kristyano bʼa toje bʼa ayta stikʼanil. Ja yeʼnle yajni wa xchamyeʼi wa sakʼwiye sok wa xwajye bʼa satkʼinal (1 Pedro 1:3, 4). Tsaʼan yajni wa xcha sakʼwiyeʼi tʼilani oj ajyukyujile jun skʼuʼajel bʼa tsats sok jun smodoʼe bʼa yaʼtijum Dyos. Pes ta mikʼa skʼulane mini oj sbʼajuke ja majtanal bʼa satkʼinali (Efesios 5:5; Filipenses 3:12-14).
¿Jasa oj skʼulukeʼi?
Ja matik tsaʼubʼaleʼi ojni kʼotuke reyik sok sacerdoteʼik lajan soka Jesús bʼa mil jabʼil (Apocalipsis 5:9, 10; 20:6). Ja yeʼnle oj kʼotuke ja yajkʼachil Gobyerno bʼa satkʼinal, (bʼa wa xya sbʼiʼiluk ja Biblia «jun yajkʼachil satkʼinal») sok oj yayi mandar ja yajkʼachil tsome kristyano (ma «jun yajkʼachil luʼum»). Ja reyik it, ojni lajxukyujile bʼa oj ajyukotik sakʼan bʼa jun modo lek sok toj jastalni skʼanunej ajyi ja Dyosi (Isaías 65:17; 2 Pedro 3:13).
¿Janekʼ oj wajuke ja bʼa satkʼinali?
Ja Biblia wa xyala ke 144.000 kristyanoʼik oj sakʼwuke bʼa oj wajuke bʼa satkʼinal (Apocalipsis 7:4). Bʼa jun nakʼsat, ja jekabʼanum Juan bʼobʼ yil ti «tekʼan ekʼ ja Chej bʼa wits Sion, sok ti smoj 144,000» (Apocalipsis 14:1-3; Juan 1:29; 1 Pedro 1:19). Ja wits Sion, jani wa senyaʼan ja chaʼan cholal yaʼunejyi ja Dyos ja Jesús soka 144.000 bʼa oj yaʼe mandar lajan ja bʼa satkʼinali (Salmos 2:6; Hebreos 12:22).
Ja «matik payubʼale [sok] tsaʼubʼale», ojni yaʼe mandar soka Kristo ja bʼa sGobyerno ja Dyosi, sok cha wa xnaji sbʼaje jastal ja «yal chʼin nole chej» (Apocalipsis 17:14; Lucas 12:32). Ja it wani xchiktes ke ja matik tsaʼubʼale masni tʼusane yuja janekʼ xchej yiʼoj ja Kristo (Juan 10:16).
Jastik mi stojoluk sbʼaja matik oj wajuke bʼa satkʼinali
Ja jas wa xyalawe jujuntik: Yibʼanal ja matik leki oj wajuke bʼa satkʼinal.
Ja smeranili: Jastalni wa skʼapa ja Dyosi, tʼusan mi yibʼanaluk ja kristyano bʼa leki tini oj ajyuke sakʼan bʼa Luʼum (Salmo 37:11, 29, 34).
Ja Jesús yala: «Mini jun winik kʼeʼel ja bʼa satkʼinali» (Juan 3:13). Soka yaljelik it xchiktes jaman lek, kʼe ja lekil kristyano chamye bʼajtanto yuja yeʼn jastal ja Abrahán, Moisés, Job sok David mini wajye bʼa satkʼinal (Hechos 2:29, 34).
Ja sakʼwelal bʼa satkʼinali wani sbʼiʼilan: Ja ‹bʼajtan sakʼwelali› (Apocalipsis 20:6). Ja yuj, ojni ajyuk pilan sakʼwelal sok tini oj ajyuk bʼa Luʼum.
Ja Biblia wa sjeʼa kʼe ja bʼa sGobyerno ja Dyos «mixani oj ajyuk chamelal» (Apocalipsis 21:3, 4). Ja yaljelik it jani wan stajel tiʼal ja bʼa Luʼum, yujni ja bʼa satkʼinal mi bʼa ajyel chamelal.
Ja jas wa skʼuʼane jujuntik: Kada kristyano yeʼni oj stsaʼ ta ti oj ajyuk sakʼan bʼa satkʼinal ma bʼa Luʼum.
Ja smeranili: Ja Dyos yeʼni wa stsaʼa jas tikʼe yaʼtijum toj oj yayi ‹ja premio bʼa ajyel sakʼan bʼa satkʼinal› (Filipenses 3:14). Ja payjelal it mi jaʼukta bʼa wa skʼana oj wajyujile lek (Mateo 20:20-23).
Ja jas wa skʼuʼane jujuntik: Ja smajlajel ajyel sakʼan tolabida bʼa Luʼum, jaʼitani wa xkʼapjiyi ja maʼ mi x-ajyiyuj ja cholal ajyel sakʼan bʼa satkʼinal.
Ja smeranili: Ja matik oj ajyuke sakʼan tolabida ja bʼa Luʼum, ja Dyos wa xya sbʼiʼiluk ‹ja jchonabʼi, ja maʼ jtsaʼuneji sok ja matik akʼubʼal koʼuk slekilale yuja Jyoba› (Isaías 65:21-23). Ja yeʼnle ojni ajyukyujile ja cholal bʼa yajel kʼot smeranil ja jas wa skʼana ajyi ja Dyosi: ke kristyanoʼik matik toje oj ajyuke sakʼan tolabida bʼa jun tsamal lugar ja bʼa Luʼumi (Génesis 1:28; Salmo 115:16; Isaías 45:18).
Ja jas wa skʼuʼane jujuntik: Ja 144.000 wa staʼa tiʼal ja Apocalipsis kechantani jun senya.
Ja smeranili: Anima ay numeroʼik kechanta wa senyaʼan ja bʼa libro it, pe jujuntik merani kʼotel. Jun sjejel, jani «ja 12 sbʼiʼile ja 12 sjekabʼanumik ja Cheji» (Apocalipsis 21:14). La jkiltik pilan prebaʼik wa xchiktes ke ja número 144.000 merani kʼotel.
Ja Apocalipsis 7:4. Wa staʼa tiʼal ja «janekʼe ja matik kʼulajiye seyari, [wa xkʼan alxuk, tsaʼubʼale oj ajyuke sakʼan bʼa satkʼinal], 144.000». Sok tixta wa xcha sjeʼa jas tukil yiʼoj ja número it sok «jun niwan nole kristyano bʼa mini maʼ wa xbʼobʼ ya kuenta». Ja «niwan nole kristyano» it cha ojni staʼ skoltajele (Apocalipsis 7:9, 10). Ta ja número 144.000 kechanta wa senyaʼan sok kechanta wan stajel tiʼal bʼa jitsan kristyano, ojni chʼayuk jas tukil yiʼoj ja chabʼ kʼole it. a
Chomajkil wa xyala ke ja 144.000 «manjiye bʼa kristyano jastal bʼajtanik sat» (Apocalipsis 14:4). Ja yaljelik «bʼajtanik sat», jani wan stajel tiʼal bʼa jun chʼin kʼole tsaʼubʼal. Ja yuj wani xcholo lek ke ja maʼ tsaʼubʼale ojni yaʼe mandar man satkʼinal soka Kristo. Sok oj yaweyi mandar jitsan kristyano oj ajyuke sakʼan ja bʼa Luʼum (Apocalipsis 5:10).
a Ja Maestro Robert Thomas stsʼijbʼan ja it sbʼaja número 144.000 wa staʼa tiʼal ja bʼa Apocalipsis 7:4. «Wani stajel tiʼal bʼa jun número ayta stikʼanil sok tukni lek ja número mey stikʼanil wa staʼa tiʼal ja bʼa 7:9. Ta jcholotik jastal jun senya, mini xbʼobʼ jcholtik jaman lek mini jun número ja bʼa libro» (Revelation 1-7: An Exegetical Commentary [Jun Comentario exegético ja bʼa Apocalipsis ma Revelación 1-7], slam 474).
Bʼobʼta cha ojni akʼul gusto
ESSENTIAL BIBLE TEACHINGS
¿Jasunkiluk ja sGobyerno ja Dyosi?
Ja bʼa aʼtelik skʼulan ja Jesús, jani mas waj skʼujol sjejel sbʼaja sGobyerno ja Dyosi yuj chikan jasa.
