Ja Dyablo sakʼaniʼa, juni anjel ke mi xbʼobʼ kiltik, bʼa sjomo sbʼaj sok skʼokoyi ja smandar ja Dyosi. Chomajkil, yeʼnani ja «smandaranumil ja luʼumkʼinali» (Juan 14:30; Efesios 6:11, 12). Ja Biblia wa xya makunuk jujuntik bʼiʼilal bʼa xchiktesel jastal ja yeʼn. Ila ja bʼa jastik wa xyala ja it:

•   Ja Satanás, wa stojolan «Kontraʼanum» (Job 1:6).

•   Ja Dyablo, wa stojolan «Abʼaltanum» (Apocalipsis 12:9).

•   Ja bʼitsʼbʼichan, ja b’a Biblia wa xya makunuk ja yaljel loʼlanum (2 Corintios 11:3).

•   Wa xkʼulwani probar (Mateo 4:3).

•   Leʼa abʼal (Juan 8:44).

Mini jaʼuk jun senyaʼiluk ja bʼa maloʼil cha mini ja bʼa smaloʼil ke ay kada jujune bʼa keʼntik

 Ay jujuntik wa skʼuʼane ke ja Dyablo juni senyaʼil ja bʼa maloʼil ma ja smaloʼil ke ay bʼa kada jujune bʼa keʼntik, cha jachuk ja bʼa Dyos. Pe ja Yabʼal ja Dyos wa staʼa tiʼal bʼa jun loʼilanel ke ajyiyuj ja Dyos soka Dyablo. Pe ja Dyosi tojni sok sakni bʼa spetsanil. Anto, ¿jastal oj bʼobʼ ajyukyuj smaloʼil ja yeʼn? (Deuteronomio 32:4; Job 2:1-6). ¿Sok jas wa xbʼobʼ kaltik ja loʼil bʼa Biblia wa staʼa tiʼal ke ja Dyablo ya och probar ja Jesús, bʼa mini ayiʼoj mulal? (Mateo 4:8-10; 1 Juan 3:5). Chikani lek ke ja Biblia wa sjeʼa ke ja Satanás sakʼani sok mini jun senyaʼiluk ja bʼa maloʼil.

 Ay jitsan kristyano wa skʼuʼane ke ja Dyablo mini sakʼanuk. ¿Tʼilan maʼ cham oj kabʼtik ja jaw? Miyuk, yujni ja Yabʼal ja Dyos wa xyala ke ja Satanás wani xya makunuk bʼa tuktukil loʼlanel bʼa jani oj skʼuluk ja jasa wa skʼana (2 Tesalonicenses 2:9, 10). June ja bʼa loʼlanel jel lajxelyuji jani yajel skʼuʼuk ja kristyano ke mi sakʼanuk (2 Corintios 4:4).

Mi meranuk: Lucifer juni pilan bʼiʼilal wa x-ajiyi ja Dyablo.

 Smeranil: Ja bʼa yaljel hebreo ke bʼa jujuntik Biblia wa sutuwe ja «Lucifer» wa stojolan «ijlabʼanum» (Isaías 14:12). Ja bʼa yaljel it wa xtax june ja bʼa jas yalunejkan ja Biblia oj ekʼuk, sok ja jas wa xyala wa sjeʼa ke jani wan stajel tiʼal ja rey bʼa Babilonia, bʼa ojni ajuk kʼixwuk yuja Dyos yuja jel niwan xyaʼa sbʼaji (Isaías 14:4, 13-20). Ja bʼa jas alubʼalkan oj ekʼuk ja bʼa jaw, yajni ja reyik bʼa Babilonia aji chʼaysnajele, aji sbʼiʼiluk bʼa jun modo bʼa tselanel «ja ijlabʼanum».

Mi meranuk: Ja Dyablo yaʼtijum bʼa Dyos.

 Smeranil: Ja Dyablo jun kontraʼanum bʼa Dyos, mini jun yaʼtijumuk. Ja Dyablo skontrani ja matik wa xyaʼteltaye ja Dyos. Ja yuj ja yeʼn wa xyiʼaj spatik sok lom wa sleʼa smule (1 Pedro 5:8; Apocalipsis 12:10).