Miyuk. Ja relijyonik mini naka junukxta. Ja bʼa Biblia wa xtaʼatik jitsan sjejel bʼa toyjelal ke mi lek xyila ja Dyosi. Ja it wa spila bʼa chabʼ modo.

Bʼajtan modo: Ja matik wa stoyowe kʼulubʼal dyosiki

 Ja Biblia wa xchiktes ke stoyjel kʼulubʼal dyosik mini tʼun xmakuni (Jeremías 10:3-5; 16:19, 20). Ja Jyoba yala yabʼ ja chonabʼ Israel bʼa najate: «Mok ajyukawuj pilan dyosik yuja keʼn» (Éxodo 20:3, 23; 23:24). a Yajni ja israʼelenyoʼik stoyowe tuk dyosik, «ja Jyoba jel tajki» (Números 25:3; Levítico 20:2; Jueces 2:13, 14).

 Ja Dyos jachni junxta wa spensaran sbʼaja toyjelal wa x-ajiyi ja «tuktukil tikʼe dyosik» (1 Corintios 8:5, 6; Gálatas 4:8). Ja matik wa skʼanawe oj yaʼteltaye ja Dyos, wa xyala yabʼye ke ayawekan smojtajel ja matik teye b’a relijyon mi meranuki. Ja Biblia wa xyala: «Elanik ja bʼa yeʼnleʼi sok pilabʼajik» (2 Corintios 6:14-17). Lekbʼi ja relijyonik naka junxta sok yibʼanal wa xya mojxukotik soka Dyos, ¿jas yuj oj ya’ ja mandar it?

Xchabʼil modo: Ja matik wa stoyo ja Dyos bʼa jun modo mi lek xyila

 Ja Jyoba mixani skisa ja israʼelenyoʼik yajni ajyiyujile skʼuʼajelik sok kostumbreʼik bʼa wa xyawe makunuk ja bʼa stoyjel kʼulubʼal dyosik, sok cha sokowe ja relijyon smeranil soka bʼa mi meranuki (Éxodo 32:8; Deuteronomio 12:2-4). Ja Jesús skʼulan kastigar ja olomalik bʼa relijyon ja jastal modo wa stoyowe ja Dyos. Ja yeʼnle wani sjeʼa sbʼaje lajansok jel toje, pe ja smeranili kechani chabʼ kara aye bʼa ‹yaʼawetakan jun lado ja jastik mas tʼilan ja bʼa Leyi: ja tojili, ja snajel yajulali sok ja ajyel toji› (Mateo 23:23).

 Ja bʼa jtyempotik, ja único relijyon bʼa wa xya mojxukotik soka Dyos, jani wa sjeʼa ja smeranil ke wa xtaʼatik ja b’a Biblia (Juan 4:24; 17:17; 2 Timoteo 3:16, 17). Chomajkil, ja relijyonik b’a sjeʼawe jastik bʼa kontra ay soka jas wa xyala ja Biblia, wani xyawe jitsuk ja kristyano sbʼaja Dyosi. Jitsan wa skʼuʼane ja b’a sjejelik jastal ja oxe dyos staʼunej sbʼaj, ja skʼuʼajel bʼa ayni jas wa xkan sakʼan ja wala chamtiki sok ja yijel wokol bʼa tolabida tini elel bʼa Biblia. Pe ja skʼuʼajelik it tini eleljan bʼa stoyjel kʼulubʼal dyosik. Ja modoʼik bʼa toyjelal wa xchiktes ja sjejelik it mini tʼun xmakuni, pes wa xya lokʼolaxukan ja rasonik bʼa Biblia yuj skʼuʼajelik bʼa relijyon mi meranuk (Marcos 7:7, 8).

 Chomajkil, ja Dyos wa xyilkʼujolan ja jastal chabʼ kara aye ja relijyoniki (Tito 1:16). Bʼa oj skoltayotik jun relijyon mojxel soka Dyos, mini kechanta oj ajyuk skʼuʼajelik sok kostumbreʼik; tʼilani oj sjeʼ ja bʼa jsakʼaniltiki. Jun sjejel, ja Biblia wa xyala: «Ta ay maʼ wa spensaraʼan wan stoyjel ja Dyosi pe mi skomo ja yakʼi, jani wan sloʼlajel ja skʼujoli, sok mini tʼun xmakuni ja jastal wan stoyjel ja Dyosi. Ja bʼa stiʼ sat ja jDyostik sok ja jTatiki, ja modoʼal bʼa stoyjel sak sok bʼa mi yajel staʼ kux jani it: stalnajel ja mebʼaʼik sok ja biudaʼik ja bʼa swokoleʼi sok mok ajyukujtik ja skuxil ja luʼumkʼinal it» (Santiago 1:26, 27). Yajni staʼa tiʼal ja yaljel ja modoʼal bʼa stoyjel sak sok bʼa mi yajel staʼ kux, ja Biblia La Palabra de Dios para Todos wa xya makunuk ja bʼa bersikulo it, ja yaljel «relijyon sak».