¿Oj maʼ bʼobʼ jtaʼ jkoltajel ja bʼa Biblia?
Ja sjakʼjel wa xyaʼa ja Biblia
Ojo (Romanos 15:4). Jitsan kristyano wan ekʼel sbʼaje tsatsal wokolik sok pensarik bʼa mi xtulwani, sok staʼuneje skoltajele ja bʼa Biblia.
Ja bʼa artikulo it oj kiltik jujuntik teksto bʼa Biblia ke oj bʼobʼ skoltaya ja weʼn ja bʼa ekʼeleʼik jastal it:
Tsatsal wokolik
Salmo 23:4: «Ama la bʼejyiyon ja bʼa loman kʼinal xkʼikʼilanixta, mini jas malo oj ya xiwkon, yujni ja weʼn teya jmok; jawa bara sok jawa bastón wa xya ajyukon seguro».
Ja jas wa stojolan: Yajelyi orasyon ja Dyos sok slejel ja stojelal ja bʼa Yabʼal, ja Biblia, oj yawi awip bʼa oj kuchukawuj ja wokolik.
Filipenses 4:13: «Ayni kip sbʼa yibʼanal stsʼakatal ja maʼ wa xyaki ja kipi».
Ja jas wa stojolan: Ja Dyos oj yawi ja ipal wa xmakuniwuj bʼa oj kuchukawuj chikan jas wokol.
Yajni ay maʼ wa xchamkujtik
Eclesiastés 9:10: «Mixa ay aʼtel, mixa tʼabʼan akʼujol bʼa ay jas oja taʼ, mini snajel sok mini biboʼil» ja bʼa kʼeʼen.
Ja jas wa stojolan: Ja matik chamyeta mixa jas snaʼawe, ja yuj mixa xyiʼaje wokol cha mini xbʼobʼ yixtalanotike.
Hechos 24:15: «Oj ajyuk jun sakʼwelal».
Ja jas wa stojolan: Ja Dyosi ojni bʼobʼ ya sakʼwuke ja matik jel xyajtaytike.
Jel mulal wa xkabʼ ayotik
Salmo 86:5: «Jyoba, a jel leka sok puesto aya bʼa oj akʼwanan perdon; jel jitsan ja syajala kʼujol mey stikʼanil sbʼaja matik wa spayawa».
Ja jas wa stojolan: Ja Dyos wa xyaʼa perdon ja matik meran wa snaʼawe malaya ja smule ja bʼa tyempo ekʼta sok puestoʼaye bʼa mixa oj cha skʼuluke.
Salmo 103:12: «Jastal ja snajtil wa xyiʼaj sbʼaj ja bʼa wa x-elkʼen ja Kʼaʼuji sok ja bʼa wa xmukxiʼi, jach najat lek yaʼunej kan ja jmultik ja Dyosi».
Ja jas wa stojolan: Yajni ja Dyos wa x-akʼwani perdon, mixani wa xyaʼ juljkʼujoltik ja jmultiki ma bʼa oj yakitik kastigo. Najat lek wa xyaʼa bʼa keʼntik, najat lek ja bʼa jastal oj bʼobʼ ekʼ bʼa jpensartik.
Tristeʼil
Salmo 31:7: «Awilunej ja jwokoli, tixta waxa kʼela ja jchamkʼujolik mas nakʼani».
Ja jas wa stojolan: Ja Dyos wa snaʼa lek spetsanil ja wokolik wan ekʼelabʼaji. Ja yeʼn wa xyabʼ lek stojol jawa chamkʼujolik mas nakʼan ayi, anima mi xyabʼ stojol ja tuk.
Salmo 34:18: «Ja Jyoba mojan ay soka matik jel tristeʼay skʼujoli, wa skoltay ja matik elel sgana».
Ja jas wa stojolan: Ja Dyos wa skʼapa ti oj ajyuka mok ja yajni triste aya. Ja yeʼn ojni bʼobʼ yawi ja ipal wa xmakuni awuj bʼa oj kuchukawuj ja syajali.
Chamel
Salmo 41:3: «Ja Jyoba oj skoltay ja yajni maloʼay ja bʼa chʼati».
Ja jas wa stojolan: Ja Dyos oj bʼobʼ skoltaya bʼa jun tsatsal chamel yajelawi lamanil, ipalil, kuchelawuj sok biboʼil bʼa oja tsaʼ lek ja jas oja kʼuluki.
Isaías 33:24: «Mini jun swinkil oj yale: ‹Maloʼayon›».
Ja jas wa stojolan: Ja Dyos wa skʼapa ke oj kʼotuk ja kʼakʼu ke spetsanil ja kristyano ja bʼa Luʼumi mixa oj maloʼaxuke.
Estrés sok chamkʼujol
Salmo 94:19: «Yajni ja chamkʼujolik och jitsanbʼuk bʼa keʼna, ja weʼn awaki kulan jkʼujol sok wa lamxukon».
Ja jas wa stojolan: Ta wa xleʼa jkoltajeltik bʼa Dyos ja yajni jel estresado aytik, ja yeʼn ojni skoltayotik bʼa mi oj chʼaykujtik ja lamanil.
1 Pedro 5:7: Awik «ekʼyi spetsanil jawa chamkʼujolex ja yeʼni, yujni ja yeʼni wa xcham skʼujola mokex».
Ja jas wa stojolan: Ja Dyos jel xcham skʼujol ja jas wa x-ekʼ jbʼajtiki, sok ja yuj wa skʼana ke la kaltikyabʼ spetsanil ja jas wa xcham jkʼujoltiki.
Guerra
Salmo 46:9: «Ja Yeʼn wan yajel kʼot tikʼan ja guerra’ik bʼa yibʼanal ja luʼumi».
Ja jas wa stojolan: Bʼa tʼusanxta skʼana, ja sGobyerno ja Dyos oj xchʼay snajel ja guerraʼik.
Salmo 37:11, 29: «Pe ja matik chʼin wa xyaʼa sbʼaji oj sbʼajuke ja luʼumi sok jel oj yabʼye stsamalil ajyel laman». «Ja matik toji oj sbʼajuke ja luʼumi sok ti tiw oj ajyuke sakʼan bʼa tolabida».
Ja jas wa stojolan: Ja matik toji laman oj ajyuke sakʼan bʼa tolabida ja bʼa Luʼumi.
Chamkʼujol yuja bʼa tyempo jakum
Jeremías 29:11: «Yujni wa xnaʼa lek ja jas wanon spensarajel sbʼaja weʼnlexi, jach wa xyala ja Jyoba. Wa xkʼana ke oj ajyuka wujilex lamanil, mi bʼa wokoluk. Wa xkʼana oj kawilex jun lekil smajlajel ja bʼa tyempo jakumi».
Ja jas wa stojolan: Ja Dyos wa skʼapayi ja xchonabʼ ke ayiʼoje jun tsamal smajlajel ja bʼa tyempo jakumi.
Apocalipsis 21:4: «Oj skusyi ja yalel sateʼi, sok mixani oj ajyuk chamelal, mixani tristeʼil, mini mebʼa okʼel sok mini syajal. Ja jastik mi lekuk wa x-ekʼ ajyi chʼayta snajel».
Ja jas wa stojolan: Ja Dyos wa skʼapa ke oj xchʼay spetsanil ja jastik mi lek wa x-ekʼ jbʼajtiki.
a Ja Dyos sbʼiʼil Jyoba (Salmo 83:18). Kʼuman ja artikulo «¿Machunkiluk ja Jyoba?»
Bʼobʼta cha ojni akʼul gusto
JA JUʼUN CHOLUMANI
Ja slekilal ja syajal skʼujol ja Dyos
Ja Biblia wa skoltayotik bʼa ajyelkujtik skʼuʼajel ja bʼa tsamal smajlajel wa skʼapakitik ja Dyosi.
TUK TEMAʼIK
Koltajel sbʼaja matik ay maʼ chamelyuj
Yajni wa xcham june maʼ jel xkʼanatik, bʼobʼta oj pensaraʼuktik mi maʼ xyabʼ stojol ja syajal wa xkabʼtik. Pe ja Dyosi wan sok wani xbʼobʼ skoltayotik.
JA JUʼUN CHOLUMANI
Yajni jelxa wokol ay ja jsakʼaniltik
Aytoni sbʼej ajyel sakʼan ama wa xtʼaspuntik tuktukil wokol.
ESSENTIAL BIBLE TEACHINGS
¿Jas yuj ja Dyos wanto yajelkan aʼekʼuk wokolik?
Jitsan wa sjobʼo sbʼaje jas yuj ja luʼumkʼinal bʼutʼel ilkʼujolanel sok wokol. Ja Biblia wa xyakitik jun sjakʼjel bʼa wa xyaʼa kulan jkʼujoltik sok jun smajlajel.
