¿Wan maʼ smajlay ja Dyos oj jtalnaytik ja jnantatik ja yajni wa x-awelaxiye?
Ja sjakʼjel wa xyaʼa ja Biblia
Ja untik bʼa ayxa skʼujole ayni yiʼoje ja niwan cholal bʼa talnanubʼal lek oj yawe ajyuk ja snantate. Ja Biblia wa xyala, yuja tini chʼikan ja bʼa jastik wa skʼana ja relijyon, ja untiki «tʼilan oj snebʼe bʼajtan yajel kʼotuk ja xchole bʼa yojol ja pamilya sok yajelyi tsʼakatal ja snantate, pes jani jaw ja jas lek xyila ja Dyosi» (1 Timoteo 5:4, El libro del Pueblo de Dios). Yajni wa skʼujolane bʼa lek oj ajyuk ja snantate, waneni skʼuʼajel ja mandar wa xyaʼa ja Biblia bʼa oj skis-e (Efesios 6:2, 3).
Ja Biblia mi xyala jastal mero stalnajele ja nantatalik bʼa awelexa, pe wani xcholokabʼtik jasa skʼulane jujuntik ixuk sok winik ja bʼa tyempo najate. Chomajkil wa xyaʼa jujuntik rason bʼa ojni bʼobʼ koltajuke ja matik wane stalnajel june bʼa awelxa.
¿Jastal stalnaye ja snantate bʼa awelexa jujuntik kristyano ja bʼa najate?
Skʼulane tuktukil jasunuk, yuja tuktukil ja jastal wa xtaxye.
Ja José najatni ay ajyi ja yajni awelaxi ja stati. Yajni bʼobʼyuji, sleʼani modo bʼa oj ya ajyuk mas mojan bʼa yeʼn ja stati. Ja José yeʼnani skʼela bʼa yajelyi swaʼel sok jun snaj bʼa oj ajyuk seguro ja Jacob (Génesis 45:9-11; 47:11, 12).
Ja Rut ti waj kulan bʼa spais ja yalibʼi sok jelni tsats aʼtiji bʼa stalnajel (Rut 1:16; 2:2, 17, 18, 23).
Ja Jesús, bʼajtanto oj chamuk sleʼani ma’ oj stalnay ja snani, ja María, b’a lajansok biudaxa (Juan 19:26, 27). a
¿Jas rasonik wa xyaʼa ja Biblia?
Stalnajel ja nantatalik wani xchʼaka kiptik sok ja jastal wa xkabʼ ayotiki. Ja Biblia wa xyaʼa jujuntik rason bʼa jelni xkoltani.
Kisa sok ila chaʼanyabʼalil jawa nantati.
Ja jas wa xyala ja Biblia: «Kisa jawa tat sok jawa nani» (Éxodo 20:12).
Jastal yajel makunuk: Ja bʼa janekʼto wa xbʼobʼi, aʼakan yeʼnto ayil sbʼaje sok a-stsaʼe yeʼnle sbʼaja talnanel oj axuk yileʼi. Mok jelxansoke sok koltaye ja bʼa janekʼ oj bʼobʼ kawuj. Kisawe sok ila chaʼanyabʼalil jawa nantati.
Abʼan stojol sok naʼa yajel perdon.
Ja jas wa xyala ja Biblia: «Ja sbiboʼil jun winik wa xya lamxuk ja skoraja, sok jelni tsamal ja yajni wa xya ekʼ chaʼan ja jasa mi lek wa xkʼulajiyi» (Proverbios 19:11).
Jastal yajel makunuk: Bʼobʼta jawa nantati oj yalawabʼ jastik oj syajbʼesa ma lajansok mi xyaʼawe tsʼakatal yuja jastik waxa kʼulani. Ta jachkʼa, jobʼo abʼaj: «¿Jastal maʼ oj kabʼ ja lek keʼn jach wan ekʼel bʼaji? ¿Mi maʼ triste oj ajyukon?». Ta waxa wabʼ lajansok weʼn wan ekʼelabʼaj sok waxa waʼa perdon, masni mi oj ipaxuk el ja wokoli.
Leʼa akoltajel.
Ja jas wa xyala ja Biblia: «Mini x-elkʼot lek ja jas wa xchapxi yajni mi xjobʼxi, pe wani xlajxi yajni ay jitsan akʼa rason» (Proverbios 15:22).
Jastal yajel makunuk: Paklay jastal oj bʼobʼa koltay soka chamelik yiʼoj jawa nantati. Jobʼo jastik koltanel ay ja bʼa lugar kulaneʼi. Taʼa loʼil ja tuk bʼa cha wane stalnajel ja snantate bʼa awelexa. Ta aya wermanoʼik, ¿oj maʼ tsoma bʼajex bʼa loʼilanel sbʼaja talnanel oj axukyi jawa nantatexi sok spiljel abʼajex ja jas oj kʼulaxuki?
¿Oj maʼ bʼobʼa tsomabʼaj soka wa pamilya bʼa loʼilanel sbʼaja talnanel oj axukyi jawa nantatexi?
Mok jelxan.
Ja jas wa xyala ja Biblia: «Ja bibo’ili tey sbʼaja matik mi xjelxiye’i» (Proverbios 11:2).
Jastal yajel makunuk: Naʼa ja stikʼanil awiʼoj. Ja smeranili, kibʼanaltik ayta stikʼanil ja jtyempotik sok ja kiptik, sok mini oj chʼak bʼobʼ jkʼuluktikyi ja jnantatik yibʼanal ja jas wa xkʼanatiki. Ta ja jastal wana stalnajel jawa nantati mixa xbʼobʼawuj, kʼanayi skoltajel ja tuk wa pamilyaʼik ma june bʼa chapan sbʼaja jaw.
Talnabʼaj.
Ja jas wa xyala ja Biblia: «Mi ni june maʼ huax yila coraja yen mismo ja scuerpoi. Huax talnatic. Huala huaatic» (Efesios 5:29).
Jastal yajel makunuk: Ama weʼn awiʼoj ja cholal oja talnay jawa nantati, cha tʼilani oja talna abʼaj ja weʼn sok ta nupanelaxa, jachuk jawa pamilya. Tʼilan oj waʼan lek, cha tʼilan oj jijlan sok oj wayan lek (Eclesiastés 4:6). Sok ay ekʼele wa skʼana oj jijlan tʼusan. Jachuk stalnajel jawa nantati mini oj ya wokolanan ja bʼa jastal aya xa wabʼ, ja bʼa wa pensar sok mi oj syama chamel.
¿Wan maʼ xyala ja Biblia ja untiki tʼilan ti oj stalnaye bʼa snaje ja snantateʼi?
Ja Biblia mini ja xyala sbʼaj it. Jujuntik pamilyaʼik wa stsaʼawe yajel ajyuk ja snantateʼi bʼa snaje ja janekʼ tyempo oj bʼobʼuki. Pe bʼobʼta oj kʼotuk ja styempoʼil oj spensaraʼuke masni lek oj talnajuke ja bʼa snajtsil ja matik awelexa. Jelni lek oj stsom sbʼaje ja pamilya bʼa oj yil-e jasa mas lek bʼa yeʼnle (Gálatas 6:4, 5).
a Ja bʼa loʼil it, ja Mattew Henry june maʼ jel chapan wa xcholo bʼobʼta ja José, ja statam ja María, ayxa tyempo chamel sok ja Jesús altantoxtani ajyel soka snani. Yajni ojxta chamuki, yaʼanikan jun lekil sjejel sbʼaja untiki: bʼa yeʼnle ayiʼoje ja cholal bʼa stalnajel ja snantate sok yajel kulan skʼujole ja yajni wa xmakuniyujile.
Bʼobʼta cha ojni akʼul gusto
JA JUʼUN CHOLUMANI
Yajni jun jpamilyatik ayiʼoj jun chamel mey yajnal
¿Jastal yajel kulan skʼujol jun jpamilyatik bʼa ayiʼoj jun chamel mey yajnal? ¿Jas oj bʼobʼ skʼuluke ja talnanumik soka wokolik oj stʼaspune soka maʼ maloʼayi?
ESSENTIAL BIBLE TEACHINGS
¿Jas yuj ja Dyos wanto yajelkan aʼekʼuk wokolik?
Jitsan wa sjobʼo sbʼaje jas yuj ja luʼumkʼinal bʼutʼel ilkʼujolanel sok wokol. Ja Biblia wa xyakitik jun sjakʼjel bʼa wa xyaʼa kulan jkʼujoltik sok jun smajlajel.
SBʼAJA KEʼNTIKONI
Kʼana maʼ oj yulataya
Naʼa ja sjakʼjel bʼa jun sjobʼjel bʼa Biblia ma naʼa sbʼaj mas ja testigoʼik bʼa Jyoba.